ଜାମଟିକ୍ରା, ୧୩।୮ (ଡି.ଏନ୍.ଏ.):
ସମାଜର ପରିବରତନ୍ ସଂଗେ ଲୁକ୍କର ଖାଏଦ୍ ରୁଚି ବି ବଦଲୁଛେ। ଆଏଜ୍କାଲି ଅନେକ ଜାଗାରେ ରାସ୍ତା ତରେ, ବଜାରରେ ନାନା ଜାତିର ଚଟପଟା ଖାଏଦ୍ ମିଲୁଛେ। ଲୋକ୍ ଠିଆଡ଼େ ଠିଆଡ଼େ ଖାଏବାର ମଜା ନେଉଛନ୍। ଏନ୍ତା ଖାଏଦ୍ ଭିତରୁ ଗୁଟେ ହେଉଛେ ଆଲୁଦମ୍ ଦହିବରା। ପିଲାନୁ ବୁଢ଼ା ତକ୍ ସମ୍କର ପସନ୍ ଆଲୁଦମ୍ ଦହିବରା। ଗୁଟେ ପ୍ଲେଟ ଖାଏଲେ ପେଟ୍ ବି ଭରତି। ଏନ୍ତା ଝନେ ଦହିବରା ବିକାଲିକୁଁ ଭେଟିଥିଲେ ଆମର ଥାନୀୟ ଧରିତ୍ରୀ ପରତିନିଧି।
ସୂଚନା ଅନ୍ସାରେ ନୟାଗଡ଼ ଜିଲାର ମୂଲ ବାସିନ୍ଦା ପ୍ରହଲ୍ଲାଦ ଡାକୁଆ(୩୭)। ସେ ଯୁକ୍ତ ୨ ପାସ୍ କଲା ଉତାରୁ ଅଭାବ ଅନାଟନ ଲାଗି ଆଗ୍କେ ପଢ଼ି ନାଇଁପାରଲେ। ଶେଷେ କମେଇ ଖାଏବାର ଲାଗି ଆଏଜ୍କେ ୧୦ ବଛର ତଲେ ବରଗଡ଼ ଜିଲାକେ ଆସିଥିଲେ। ଏହେଦେ ସେ କୁଟୁମବସିଆ ବରଗଡ଼ ପାସର ବରାହଗୋଡ଼ା କେନାଲ ଛକରେ ରହୁଛନ୍। ସଖାଲର ୭ ବାଜ୍ଲେ ବରାହଗୋଡ଼ା ଛକରେ ଗୁଟେ ଛତା ଲଗେଇ ସେ ଦହିବରା ବିକ୍ବାର ଆରମ୍ କରୁଛନ୍। ଘରେ ତାକର ମାଏକିନା ଦହିବରା, ଆଲୁଦମ୍ ଆର ମଟରଚନା ତରକାରି(ଘୁଗୁନି) ତିଆର କରବାରେ ସାହାଯ୍ କରୁଛନ୍। ଏହେଦେ ତାକର ଝି’ ୮ମ ଶ୍ରେଣୀରେ ପଢ଼ୁଥିଲାବେଲେ ପୁଓ ୩ୟ ଶ୍ରେଣୀରେ ପଢ଼ୁଛନ୍। ପରିବାରର ଜମିବାଡ଼ି ବଲି କିଛି ନାଇଁ। ପ୍ରହଲ୍ଲାଦ ଆଲୁଦମ୍ ଦହିବରା ବିକି ଯାହା କମଉଛନ୍ ସେଥ୍ରେ ପରିବାର ଚଲବାର ସଂଗେ ଛୁଆପିଲାକର ପାଠ୍ପଢ଼ା ଖରଚ୍ ତୁଲଉଛନ୍। ଖରାଦିନେ ବିକ୍ରି ବେଶି ହେଉଥିଲାବେଲେ ସଖାଲର ୭ରୁ ବିକ୍ରି ଆରମ୍ କଲେ ୧୦ ବଜେ ତକ୍ ସରିଯାଏସି ବଲି ସେ କହିଛନ୍। ବିକିରିବଟା ସଏଲା ଉତାରୁ ପ୍ରହଲ୍ଲାଦ ଘରକେ ଫିରି ଆରକ ଦିନର ଲାଗି ସବୁ ସଜବାଜ କରୁଥିବାର ସେ କହିଛନ୍। ଅଂଚଲରେ ପ୍ରହଲ୍ଲାଦକଁର ଆଲୁଦମ୍ ଦହିବରାର ଚାହିଦା ରହିଥିଲାବେଲେ ବଡ଼ଭାଗି ଯୁବକ, ଛାତ୍ରୀଛାତ୍ର ତାକର ଫିଦିନିଅଁା ଗରାଖ ବଲି ସେ କହିଛନ୍। ସେନ୍ତା କେତେ ଗରାଖକଁର କହିବାର ହେଲା ପ୍ରହଲ୍ଲାଦକଁର ଦହିବରା ଯେତ୍କି ମିଠା ତାକର ସରଲ କଥାବାରତାଟା ଆହୁରି ମନ୍ ଛୁଅଁା ବଲି କହିଛନ୍। ପ୍ରହଲ୍ଲାଦ ବରାହଗୋଡ଼ା ଛକରେ ଫିଦିନ୍ ଛତା ଲଗେଇ ଦହିବରା ବିକୁଥିଲାବେଲେ ଅଂଚଲରେ ହେଉଥିବାର ଯାନିଯାତ୍ରାରେ ବି ତାକର ଷ୍ଟଲ ଲଗେଇ ଭଲ ଦୁଇପଏସା ରୁଜଗାର କରୁଛନ୍।