ଭଦ୍ରକ ଅଫିସ,୧୪।୪: କରୋନା ମହାମାରୀ ପାଇଁ ସାରା ଦେଶରେ ଲକ୍ଡାଉନ୍ ଜାରି ରହିଥିବା ବେଳେ ରାଜ୍ୟରେ ଏପ୍ରିଲ ୩୦ ଯାଏଁ ଲକ୍ଡାଉନ୍ ଘୋଷଣା କରାଯାଇଛି। ଏଥିଯୋଗୁଁ ରାଜ୍ୟରେ ଅନେକ ପରିବାର ମୁଠେ ଖାଇବା ପାଇଁ ସଂଗ୍ରାମ କରୁଛନ୍ତି। ଅନ୍ୟପଟେ ରାଜ୍ୟବାସୀ ଯେପରି ଭୋକିଲା ନ ରୁହନ୍ତି ସେଥିପ୍ରତି ମୁଖ୍ୟମନ୍ତ୍ରୀ ସଜାଗ ହେବା ସହ ଅଧିକାରୀଙ୍କୁ ତାଗିଦ୍ ମଧ୍ୟ କରିଛନ୍ତି। ସମସ୍ତ ସରକାରୀ ଯୋଜନା ମାଧ୍ୟମରେ ସେମାନଙ୍କୁ ରନ୍ଧା ଖାଦ୍ୟଠାରୁ ଆରମ୍ଭ କରି ଭତ୍ତା ଓ ଟଙ୍କା ଯୋଗାଇଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ତେବେ ଯେଉଁମାନେ ଏଥିରୁ ବଞ୍ଚିତ ହୋଇଛନ୍ତି ସେମାନଙ୍କ ପାଇଁ ବିଧାୟକମାନେ ନିଜ ପ୍ରଚେଷ୍ଟାରେ ଖାଦ୍ୟ ବ୍ୟବସ୍ଥା କରୁଥିବା ଦେଖିବାକୁ ମିଳୁଛି। ଏପରିସ୍ଥଳେ ଭଦ୍ରକ ପୌରପାଳିକା ଅଧିନସ୍ଥ ୩୦ଟି ୱାର୍ଡରେ ଯେଉଁମାନେ ସରକାରୀ ଯୋଜନାରୁ ବଞ୍ଚିତ ହୋଇଛନ୍ତି କିମ୍ବା ସେମାନଙ୍କ ପାଖରେ ରାଶନ କାର୍ଡ ନାହିଁ ସେଭଳି ଗରିବ ଓ ଅସହାୟ ପରିବାରଙ୍କୁ ଭଦ୍ରକ ବିଧାୟକ ସହାୟତାର ହାତ ବଢ଼ାଇଛନ୍ତି। ବିଧାୟକ ସଞ୍ଜୀବ କୁମାର ମଲ୍ଲିକ ସେମାନଙ୍କୁ ୧୦ କେଜି ଚାଉଳ ଏବଂ ଡାଲି ଯୋଗାଇ ଦେଇଛନ୍ତି। ମଙ୍ଗଳବାର ପ୍ରଥମ ପର୍ଯ୍ୟାୟରେ ହଜାରେରୁ ଊର୍ଦ୍ଧ୍ୱ ଗରିବ ପରିବାରଙ୍କ ପାଇଁ ବିଭିନ୍ନ ୱାର୍ଡରେ ରାଶନର ବ୍ୟବସ୍ଥା କରାଯାଇଥିବା ବେଳେ ଏହା ପର୍ଯ୍ୟାୟ କ୍ରମେ ଜାରି ରହିବ ବୋଲି ବିଧାୟକ ମଲ୍ଲିକ କହିଛନ୍ତି । ତେବେ ରାଶନ ନେବା ସମୟରେ ସମସ୍ତେ ସାମାଜିକ ଦୂରତ୍ୱକୁ ମାନି ଚଳିବା ପାଇଁ ବିଧାୟକ ସମସ୍ତଙ୍କୁ ନିବେଦନ କରିଛନ୍ତି।