ଝାରସୁଗୁଡ଼ା ଅଫିସ,୨୨ା୫-କରୋନା ଭୂତାଣୁ ସହ ଲଢ଼େଇ ଯୋଗୁ ସମଗ୍ର ଦେଶରେ ଲକ୍ଡାଉନ୍ କରାଯାଇଛି। ଏପରିସ୍ଥିତିରେ ବାହାରେ କାର୍ଯ୍ୟ କରୁଥିବା ଲୋକେ ନିଜ ନିଜ ଘରକୁ ଫେରୁଛନ୍ତି। ତେବେ ଏକ ଦମ୍ପତି ମହାରାଷ୍ଟ୍ର ରାଜ୍ୟ ମଲାଡରୁ ୪ ଦିନ ହେବ ବିଭିନ୍ନ ଗାଡିକୁ ଲିଫ୍ଟ ମାଗି ବାଲେଶ୍ୱର ଜିଲା ଭୋଗରାଇକୁ ଫେରୁଥିଲେ। ହେଲେ ସେମାନେ ଶୁକ୍ରବାର ଭୁଲ୍ରେ ବାଲେଶ୍ୱର ବଦଳରେ ଝାରସୁଗୁଡ଼ାରେ ପହଞ୍ଚିଥିଲେ। ମହିଳା ଜଣକ ୯ ମାସର ଗର୍ଭବତୀ ଥିବା ପୋଲିସ ଜାଣିବା ପରେ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟକୁ ନେଇ ଚିକିତ୍ସା କରାଇଥିଲା। ଏହା ପରେ ଏକ ଗାଡ଼ି ଭଡା କରି ସ୍ବାମୀ, ସ୍ତ୍ରୀଙ୍କୁ ବାଲେଶ୍ୱର ପଠାଇଛି।
ବାଲେଶ୍ୱର ଜିଲା ଭୋଗରାଇ ଅଞ୍ଚଳର ଆଶିଷ ମହାନ୍ତି ଓ ତାଙ୍କ ସ୍ତ୍ରୀ ଅର୍ଚ୍ଚନା ମହାନ୍ତି ମହାରାଷ୍ଟ୍ର ରାଜ୍ୟ ମଲାଡ ଅଞ୍ଚଳର ଏକ ଚୁଡି କମ୍ପାନୀରେ କାମ କରୁଥିଲେ। ଲକ୍ଡାଉନ୍ ଯୋଗୁ ସେମାନେ ସେଠାରେ ଫସି ରହିଥିଲେ। ତାଙ୍କ ପାଖରେ ଟଙ୍କା ସରିଯିବାରୁ ସେମାନେ ନିଜ ଘରକୁ ଯିବା ପାଇଁ ବାହାରିଥିଲେ। ଗତ ମଙ୍ଗଳବାରଠାରୁ ବିଭିନ୍ନ ଗାଡିକୁ ଲିଫ୍ଟ ମାଗି ସେମାନେ ଓଡ଼ିଶା ଆସିଥିଲେ। ହେଲେ ଭୁଲ୍ରେ ଶୁକ୍ରବାର ମଧ୍ୟାହ୍ନରେ ଝାରସୁଗୁଡାରେ ପହଞ୍ଚିଥିଲେ। ଏ ନେଇ ଝାରସୁଗୁଡ଼ା ଥାନା ଅଧିକାରୀ ସାବିତ୍ରୀ ବଳ ସୂଚନା ପାଇବା ପରେ ସେମାନଙ୍କୁ ପୋଲିସ ପକ୍ଷରୁ କରାଯାଇଥିବା କ୍ୟାମ୍ପରେ ରଖାଯାଇଥିଲା। ସେଠାରୁ ମେଡିକାଲ ନିଆଯାଇଥିଲା।