ବେଜିଂ,୧୭।୩: କରୋନା ଭାଇରସ ଏବେ ବିଶ୍ୱକୁ ଚିନ୍ତାରେ ପକାଇ ଦେଇଥିବା ବେଳେ ଏହି ଭୂତାଣୁ ଗର୍ଭବତୀ ମା’ଠାରୁ ନବଜାତ ଶିଶୁକୁ ସଂକ୍ରମଣ କରିବ ନାହିଁ ବୋଲି ବିଶେଷଜ୍ଞମାନେ କହିଛନ୍ତି। ଚାଇନାର ହୁଆଝୋଙ୍ଗ ୟୁନିଭର୍ସିଟି ଅଫ୍ ସାଇନ୍ସ ଆଣ୍ଡ ଟେକ୍ନୋଲୋଜିର ବିଶେଷଜ୍ଞମାନେ ଏହି ମତ ଦେଇଛନ୍ତି। ସେମାନେ କହିଛନ୍ତି ଯେଉଁ ଗର୍ଭବତୀମାନେ କରୋନା ଭାଇରସରେ ସଂକ୍ରମିତ ହୋଇଛନ୍ତି ସେମାନଙ୍କ ଗର୍ଭସ୍ଥ ଶିଶୁଙ୍କ ନିକଟରେ କରୋନାର କୌଣସି ଗୁଣ ଦେଖାଯାଇନାହିଁ। ଫ୍ରଣ୍ଟିୟର ଇନ୍ ପେଡିଆଟ୍ରିକ୍ ଜର୍ନାଲରେ ସୋମବାର ଏହା ପ୍ରକାଶ ପାଇଥିଲା। ଚାଇନାର ହୁବଇରେ ଥିବା ଉହାନ ସହରରେ ପ୍ରଥେମେ କରୋନା ସଂକ୍ରମଣ ଦେଖାଯାଇଥିବା ବେଳେ ସେଠାକାର ୪ଜଣ ଗର୍ଭବତୀଙ୍କୁ ନେଇ ଏହି ପରୀକ୍ଷା କରାଯାଇଥିବା ବିଶେଷଜ୍ଞମାନେ ପ୍ରକାଶ କରିଛନ୍ତି। ପ୍ରଥମେ ଏହି ଶିଶୁମାନଙ୍କୁ ଏନ୍ଆଇସିୟୁରେ ରଖାଯାଇଥିବା ବେଳେ ଏମାନଙ୍କ ମଧ୍ୟରୁ ୩ ଶିଶୁଙ୍କ ନମୁନା କରୋନା ନେଗେଟିଭ ଆସିଥିବା ବେଳେ ଚତୁର୍ଥ ଶିଶୁର ମା’ କରୋନା ନମୁନା ପରୀକ୍ଷା ପାଇଁ ଅରାଜି ହୋଇଥିଲେ। ଉକ୍ତ ଗବେଷଣାକୁ ନେଇ ବିଶେଷଜ୍ଞମାନେ ଏହା ସ୍ପଷ୍ଟ କରି ନ ଥିବା ମଧ୍ୟ କହିଛନ୍ତି। ଅନ୍ୟପଟେ ଇଟାଲିରେ ଜଣେ ନବଜାତକକୁ କରୋନା ଭାଇରସ ସଂକ୍ରମଣ ହୋଇଥିବା ବେଳେ ସେ ସବୁଠାରୁ କମ୍ ବୟସର କରୋନା ସଂକ୍ରମିତ ରୋଗୀ ବୋଲି କୁହାଯାଇଥିଲା।