ବେଜିଂ,୧୮ା୬: ଲଦାଖସ୍ଥିତ ଗଲଓ୍ବାନ ଉପତ୍ୟକା ଉପରେ ବୁଧବାର ପୁଣିଥରେ ନିଜର ଦାବି ଦୋହରାଇଛି ଚାଇନା। ଏହି ଅଞ୍ଚଳ ସବୁବେଳେ ଚାଇନାର ଥିଲା ବୋଲି ବେଜିଂ ପକ୍ଷରୁ କୁହାଯାଇଛି। ଅନ୍ୟପକ୍ଷରେ ସମ୍ପୃକ୍ତ ଭୂଖଣ୍ଡର ସ୍ଥିତାବସ୍ଥାରେ ଚାଇନା ସେନାର ଏକତରଫା ପରିବର୍ତ୍ତନ ଉଦ୍ୟମ ଯୋଗୁ ଦୁଇଦେଶ ମଧ୍ୟରେ ସଂଘର୍ଷ ଘଟିଥିବା ଭାରତର ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ଜାରି ଏକ ବିବୃତିରେ କୁହାଯାଇଛି।
ଚାଇନା ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଝାଓ ଲିଜିଆନ୍ ଏକ ଖବରଦାତା ସମ୍ମିଳନୀରେ କହିଛନ୍ତି, ଗଲଓ୍ବାନ ଉପତ୍ୟକା ଅଞ୍ଚଳରେ ସବୁବେଳେ ଚାଇନାର ସାର୍ବଭୌମତ୍ୱ ରହିଆସିଛି। ଏହା ଚାଇନାର ଅଞ୍ଚଳ। ତେବେ ଗଲଓ୍ବାନକୁ ଭାରତ-ଚାଇନାର ସୀମା ଭାବେ ବିବେଚନା କରାଯାଉଥିବାବେଳେ ବେଜିଂ ଏହା ଉପରେ ସାର୍ବଭୌମତ୍ୱ କାହିଁକି ଜାହିର କରୁଛି ବୋଲି ଖବରଦାତାମାନେ ପ୍ରଶ୍ନ କରିଥିଲେ। ଏହାର ଉତ୍ତରରେ ଝାଓ କହିଥିଲେ, ଏହି ଅଞ୍ଚଳ ଏଲ୍ଏସିର ଚାଇନା ପଟେ ଅଛି। ତେଣୁ ଚାଇନାକୁ ଦୋଷ ଦିଆଯାଇ ପାରିବ ନାହିଁ। ସେହିପରି ପିଏଲ୍ଏର ୪୩ ସୈନ୍ୟ ନିହତ ହେବା ନେଇ ପ୍ରଶ୍ନ କରାଯିବାରୁ ସେ ଏହାର ଉତ୍ତର ଦେବାକୁ ଏଡ଼ାଇଯାଇଥିଲେ। ସୀମା ସୁରକ୍ଷା ବଳ ଏହି ପ୍ରସଙ୍ଗରେ କାର୍ଯ୍ୟ କରୁଛନ୍ତି ବୋଲି ସେ କହିଥିଲେ। ଭାରତ ନିଜ ଯବାନଙ୍କ ମୃତାହତ ହେବା ନେଇ ସ୍ପଷ୍ଟ କରିଥିବାବେଳେ ଚାଇନା କାହିଁକି ନିଜ ପକ୍ଷର କିଛି ସ୍ପଷ୍ଟ କରୁନାହିଁ ବୋଲି ଝାଓଙ୍କୁ ପ୍ରଶ୍ନ କରାଯାଇଥିଲା। ସେ କହିଥିଲେ, ଭାରତ ଓ ଚାଇନା ସୈନ୍ୟମାନେ ଗ୍ରାଉଣ୍ଡରେ ଏହି ବିଷୟରେ ସମାଧାନ ନେଇ ନିୟୋଜିତ। ତେଣୁ ଏହା ଉପରେ କିଛି ମନ୍ତବ୍ୟ ଦେବାକୁ ସେ ଚାହୁଁ ନାହାନ୍ତି।
ଭାରତ-ଚାଇନା ସୀମା ସ୍ଥିତିକୁ ନେଇ ସେ କହିଥିଲେ, ଉଭୟ ପକ୍ଷ ଏହାର ସମାଧାନ ପାଇଁ କୂଟନୈତିକ ଓ ସାମରିକ ଚ୍ୟାନେଲ ଜରିଆରେ ପରସ୍ପର ସହିତ ଯୋଗାଯୋଗ ରଖିଛନ୍ତି। ସୀମା ସ୍ଥିତି ସ୍ଥିର ଓ ନିୟନ୍ତ୍ରଣାଧୀନ ବୋଲି ଝାଓ କହିଥିଲେ। ସେହିପରି ଭବିଷ୍ୟତରେ ଏପରି ସଂଘର୍ଷକୁ ଏଡ଼ାଯାଇପାରିବ କି ବୋଲି ପ୍ରଶ୍ନର ଉତ୍ତରରେ ଝାଓ କହିଥିଲେ, ଚାଇନା ପକ୍ଷରୁ ଆମେ ଅଧିକ ସଂଘର୍ଷ ଦେଖିବାକୁ ଚାହୁଁନାହୁଁ। ସୀମାରେ ଶାନ୍ତି ପ୍ରତିଷ୍ଠା ପାଇଁ ଦୁଇଦେଶ ପକ୍ଷରୁ ଉଦ୍ୟମ ହେଉଛି। ବିଶ୍ୱର ଦୁଇ ବୃହତ୍ ଦେଶ ତଥା ବିକାଶଶୀଳ ଅର୍ଥନୀତି ମଧ୍ୟରେ ଆଲୋଚନା ଜରିଆରେ ମତଭେଦ ଦୂର ହେବ। ପୂର୍ବରୁ ଦୁଇଦେଶର ନେତା (ଚାଇନା ରାଷ୍ଟ୍ରପତି ଜି ଜିନ୍ପିଙ୍ଗ୍ ଓ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି)ଙ୍କ ମଧ୍ୟରେ ହୋଇଥିବା ସହମତିକୁ ନେଇ ଦ୍ୱିପାକ୍ଷିକ ସମ୍ପର୍କକୁ ଆଗକୁ ବଢ଼ାଯିବା ଉଚିତ। ଭାରତ ଏହି କ୍ଷେତ୍ରରେ ଚାଇନା ସହ ମିଶି କାମ କରିବ ବୋଲି ଝାଓ ଆଶାବ୍ୟକ୍ତ କରିଛନ୍ତି।
ପ୍ରକାଶ ଯେ, ଗଲଓ୍ବାନ ଉପତ୍ୟକାକୁ ଚାଇନା ପ୍ରଥମେ ୧୯୫୬ରେ ନିଜର ବୋଲି ଦାବି କରିଥିଲା। ୧୯୬୦ରେ ଏହି ଦାବିକୁ ଜୋର୍ଦାର କରିବା ସହ ଦୁଇବର୍ଷ ମଧ୍ୟରେ ଏହାକୁ ସମ୍ପୂର୍ଣ୍ଣ ଭାବେ ଦଖଲ କରିଥିଲା। ସେବେଠୁ ଉଭୟ ଭାରତ ଓ ଚାଇନା ସମ୍ପୃକ୍ତ କ୍ଷେତ୍ରରେ ଶାନ୍ତି ବଜାୟ ରଖିଆସୁଛନ୍ତି। ତେବେ ଗଲଓ୍ବାନ ଉପତ୍ୟକାକୁ ନେଇ କୌଣସି ମ୍ୟାପ ଉପରେ ଦୁଇଦେଶ ମଧ୍ୟରେ ସହମତି ପ୍ରକାଶ ପାଇନାହିଁ। କେବଳ ସ୍ଥାନୀୟ ସ୍ତରରେ ଦୁଇ ସେନା ମଧ୍ୟରେ ବୁଝାମଣା ହୋଇଛି।