ନୂଆଦିଲ୍ଲୀ, ୧୭।୬: ଭାରତ ଚାଇନା ମଧ୍ୟରେ ଲଦାଖର ଗଲଓ୍ବାନ ଘାଟିରେ ଘଟିଥିବା ହିଂସକ ସଂଘର୍ଷରେ ୨୦ ଭାରତୀୟ ଯବାନ ଶହୀଦ ହୋଇଛନ୍ତି। ସେମାନଙ୍କ ମଧ୍ୟରେ ୬ ଭିନ୍ନ ଭିନ୍ନ ରେଜିମେଣ୍ଟର ଯବାନ ରହିଛନ୍ତି। ୧୬-ବିହାର ରେଜିମେଣ୍ଟର ସର୍ବାଧିକ ୧୨ ଜଣ ଯବାନ ଅଛନ୍ତି। ସେହିପରି ୩-ପଞ୍ଜାବ ରେଜିମେଣ୍ଟର ୩ ଜଣ, ୩-ମିଡ଼ିୟମ୍ ରେଜିମେଣ୍ଟର ୨ ଜଣ, ୧୨-ବିହାର ରେଜିମେଣ୍ଟର ଜଣେ ଯବାନ ଶହୀଦ ହୋଇଛନ୍ତି। ୮୧- ମାଉଣ୍ଟ ବିଗ୍ରେଡ୍ ସିଗନାଲ କମ୍ପାନୀର ଜଣେ ଏବଂ ୮୧-ଫିଲ୍ଡ ରେଜିମେଣ୍ଟର ଜଣେ ଯବାନ ଅଛନ୍ତି। ବିହାର ରେଜିମେଣ୍ଟର ୧୩ ଜଣ ଯବାନ ଏଥିରେ ଶହୀଦ ହୋଇଛନ୍ତି। ୧୬-ବିହାର ରେଜିମେଣ୍ଟର ଶହୀଦ ଯବାନମାନେ ହେଉଛନ୍ତି ସିପାହୀ କୁନ୍ଦନ କୁମାର, ଅମନ କୁୁମାର, ସୁନୀଲ କୁମାର, ଦୀପକ କୁମାର, ଚନ୍ଦନ କୁମାର, ଗଣେଶ କୁଞ୍ଜାମ, ଗଣେଶ ରାମ, କେ.କେ. ଓଝା, ରାଜେଶ ଓରାମ୍, ସି.କେ. ପ୍ରଧାନ, ନାଏବ ସୁବେଦାର ନନ୍ଦୁରାମ, କର୍ନେଲ ବି. ସନ୍ତୋଷ ବାବୁ ପ୍ରମୁଖ। ପଞ୍ଜାବ ରେଜିମେଣ୍ଟର ସିପାହୀ ଗୁରତେଜ ସିଂ, ଅଙ୍କୁଶ, ଗୁରବିନ୍ଦର ସିଂ ଶହୀଦ ହୋଇଛନ୍ତି। ଶହୀଦଙ୍କ ମଧ୍ୟରେ ମିଡ଼ିୟମ୍ ରେଜିମେଣ୍ଟର ନାଏବ ସୁବେଦାର ସତନାମ୍ ସିଂ, ମନଦୀପ୍ ସିଂ ରହିଛନ୍ତି। ୧୨ ବିହାର ରେଜିମେଣ୍ଟର ସିପାହୀ ଜୟ କିଶୋର ସିଂ, ମାଉଣ୍ଟ ବ୍ରିଗେଡ୍ ସିଗନାଲ କମ୍ପାନୀର ହାବିଲଦାର ବିପୁଲ ରାୟ ଏବଂ ଫିଲ୍ଡ ରେଜିମେଣ୍ଟର ହାବିଲଦାର କେ. ପାଲାନି ଶହୀଦ ହୋଇଛନ୍ତି।