ରାଜନଗର, ୧୮।୩(ଡି.ଏନ.ଏ.)-ଗହୀରମଥା ସାମୁଦ୍ରିକ ଅଭୟାରଣ୍ୟରେ ଏବେ ଅଲିଭରିଡଲେ କଇଁଛଙ୍କ ସମୂହ ଅଣ୍ଡାଦାନ ପ୍ରକ୍ରିୟା ଚାଲୁ ରହିଛି। ୩ଦିନରେ ୨ଲକ୍ଷ କଇଁଛ ଅଣ୍ଡାଦାନ କରିଛନ୍ତି। କଇଁଛମାନଙ୍କୁ ବାହ୍ୟ ଶତ୍ରୁଠାରୁ ସୁରକ୍ଷା ଦେବା ପାଇଁ ରାଜନଗର ବନ ବିଭାଗ କର୍ମଚାରୀମାନେ ସେଠାରେ ଅସ୍ଥାୟୀ କ୍ୟାମ୍ପ କରି କଇଁଛମାନଙ୍କ ଅଣ୍ଡାଦାନ ସମୟରେ ସୁରକ୍ଷା ପ୍ରଦାନ କରିଛନ୍ତି। ପାଗ ଅନୁକୂଳ ଥିବାରୁ କଇଁଛମାନେ ଏହି ସମୂହ ଅଣ୍ଡାଦାନ ପ୍ରକ୍ରିୟାକୁ ୩/୪ ଦିନ ଜାରି ରଖିବେ ବୋଲି କଇଁଛ ବିଷାରଦମାନେ ଆଶାବ୍ୟକ୍ତ କରିଛନ୍ତି। ସମୂହ ଅଣ୍ଡାଦାନ ପ୍ରକ୍ରିୟାକୁ ଅନୁଧ୍ୟାନ କରିବା ପାଇଁ ରାଜ୍ୟ ପ୍ରମୁଖ ମୁଖ୍ୟ ବନସରଂକ୍ଷକ ସନ୍ଦୀପ ତ୍ରିପାଠୀ, ଆଞ୍ଚଳିକ ରାଜ୍ୟ ବନ ସଂରକ୍ଷକ ମନୋଜ ମହାପାତ୍ର, ଡିଏଫଓ ବିକାଶ ରଞ୍ଜନ ଦାସ ପ୍ରମୁଖ ଗହୀରମଥାର ବାବୁବାଲି ଦ୍ୱୀପରେ ପହଁଚି ସମୂହ ଅଣ୍ଡାଦାନ ପ୍ରକ୍ରିୟାକୁ ଅନୁଧ୍ୟାନ କରିଛନ୍ତି। ପ୍ରତ୍ୟହ ସନ୍ଧ୍ୟା ପରଠୁଁ ବିଳମ୍ବିତ ରାତ୍ରି ଯାଏଁ କଇଁଛମାନେ ସମୁଦ୍ରର ଢେଉକୁ ଅତିକ୍ରମ କରି ବାବୁବାଲି ଦ୍ୱୀପର ବାଲୁକା ରାଶିରେ ଅଣ୍ଡାଦାନ କରୁଛନ୍ତି। ଅପରପକ୍ଷେ ସମୂହ ଅଣ୍ଡାଦାନଠାରୁ ଅଳ୍ପ ଦୂରରେ ଥିବା ପ୍ରତିରକ୍ଷା ବିଭାଗର କ୍ଷେପଣାସ୍ତ୍ର ଘାଟିର ଉଜ୍ଜ୍ୱଳ ଆଲୋକକୁ ଅଣ୍ଡାଦାନ ସମୟରେ ବନ୍ଦ ରଖାଯାଉଛି। ସମୁଦ୍ରକୂଳଠାରୁ ୫ କିଲୋମିଟର ପରିଧି ଭିତରେ ଲକ୍ଷ ଲକ୍ଷ କଇଁଛ ଏବେ ଅଣ୍ଡାଦାନ ଅପେକ୍ଷାରେ ରହିଛନ୍ତି। ବାବୁବାଲି ଦ୍ୱୀପର ସୀମା ସରହଦ ଦିନକୁ ଦିନ ହ୍ରାସ ପାଉଥିବାରୁ ଏହି ଦ୍ୱୀପରେ ଲକ୍ଷ ଲକ୍ଷ କଇଁଛ ଅଣ୍ଡାଦେବା ସମୟରେ ବିଘଟଣ ଘଟୁଥିବା ଦୃଷ୍ଟିକୁ ଆସିଛି। ପ୍ରଥମେ କଇଁଛମାନେ ଅଣ୍ଡାଦାନ କରି ଫେରିଯିବା ପରେ ଅନ୍ୟ କଇଁଛମାନେ ଅନୁରୂପ ଭାବେ ସେହି ସ୍ଥାନକୁ ନିଜ ପାଦରେ ଗାତଖୋଳି ଅଣ୍ଡାଦେବା ସମୟରେ ପୂର୍ବରୁ ସେଠାରେ ଦିଆଯାଇଥିବା ଅଣ୍ଡାଗୁଡିକ ନଷ୍ଟ ହେବାରେ ଲାଗିଛି। ବିଶ୍ୱ ପଯର୍ର୍ୟଟନ ମାନଚିତ୍ରରେ ଅଲିଭରିଡଲେ କଇଁଛମାନଙ୍କର ସବୁଠୁ ନିରାପଦ ଓ ସୁରକ୍ଷିତ ସ୍ଥାନ ଭାବେ ଗହୀରମଥାର ବାବୁବାଲି ଦ୍ୱୀପ ସ୍ବତନ୍ତ୍ର ସ୍ଥାନ ଅଧିକାର କରିଛି।