ଭାପୁର, ୧ା୮(ଡି.ଏନ.ଏ.) – ରାସ୍ତା ନ ଥିବାରୁ ଗାଁରେ ପଶି ପାରି ନ ଥିଲା ଆମ୍ବୁଲାନ୍ସ। ଫଳରେ ଯନ୍ତ୍ରଣାରେ ଛଟପଟ ହେଉଥିବା ପ୍ରସୂତିଙ୍କୁ ଷ୍ଟ୍ରେଚରରେ ବୋହି ପ୍ରାୟ ୨ କିମି ଚାଲିବା ଦୃଶ୍ୟ ଦେଖିବାକୁ ମିଳିଛି ଢେଙ୍କାନାଳ ଜିଲା ଭାପୁର ସଦର ବ୍ଲକ କରଡାପଡା ଗ୍ରାମରେ। ବାରମ୍ବାର ଅଭିଯୋଗ ସତ୍ତ୍ୱେ ରାସ୍ତାଟିଏ ଗ୍ରାମରେ ନିର୍ମାଣ ହେଉ ନ ଥିବାରୁ ଏପରି ଅସୁବିଧା ଉପୁଜିଥିବା ନେଇ ଗ୍ରାମବାସୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।
ବୁଧବାର ସକାଳେ ଗାଁର ପାତୁ ବେହେରାଙ୍କ ସ୍ତ୍ରୀଙ୍କ ପ୍ରସବ ଯନ୍ତ୍ରଣା ହୋଇଥିଲା। ପରିବାର ଲୋକେ ସଙ୍ଗେ ସଙ୍ଗେ ୧୦୮ ଆମ୍ବୁଲାନ୍ସକୁ ଫୋନ କରିଥିଲେ। ହେଲେ ଗ୍ରାମ ଭିତରକୁ ଯାଇ ନ ପାରି ଆମ୍ବୁଲାନ୍ସଟି ଭାପୁରଠାରୁ ବେଗୁନିଆଁପାଳ ରାସ୍ତାରେ ଅଟକି ରହିଥିଲା। ସେଠାରେ ଗାଡ଼ିର ଚକ ଦବିଯିବାରୁ ଏହା ଆଉ ଆଗକୁ ଗଡିପାରି ନ ଥିଲା। ସେପଟେ ପ୍ରସୂତିଙ୍କୁ ଏକ ଷ୍ଟ୍ରେଚରରେ ପ୍ରାୟ ୨ କିମି ବୋହି ସମ୍ପର୍କୀୟମାନେ ଆମ୍ବୁଲାନ୍ସ ନିକଟକୁ ଆଣିଥିଲେ। ତେଣୁ ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚିଲାବେଳକୁ ବହୁତ ବିଳମ୍ବ ହୋଇଥିଲା। ଏହି ଘଟଣାକୁ ନେଇ ପରିବାର ତଥା ଗ୍ରାମବାସୀଙ୍କ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ପୁରୁଣା କଟକ-ସମ୍ବଲପୁର ରାସ୍ତାଠାରୁ ମାତ୍ର ୬ କିମି ରାସ୍ତାକୁ ପ୍ରଶାସନ ପକ୍ଷରୁ ପୁନରୁଦ୍ଧାର କିମ୍ବା ନିର୍ମାଣ କରାଯାଉ ନ ଥିବାବେଳେ ଓଡ଼ାପଡା ବ୍ଲକର ଘଟିପିରି-କଳାଙ୍ଗ ରାସ୍ତାଠାରୁ ଗ୍ରାମକୁ ଯାଇଥିବା ମାତ୍ର ୨ କିମି ରାସ୍ତାରେ ଆଜି ପର୍ଯ୍ୟନ୍ତ ଥରୁଟିଏ ବି ମାଟି ପକାଯାଇ ନ ଥିବା ଅଭିଯୋଗ ହୋଇଛି। ଏ ସମ୍ପର୍କରେ ସରପଞ୍ଚ ପୁଷ୍ପଲତା ଭୋଇ କୁହନ୍ତି, ଗ୍ରାମ ରାସ୍ତା ପାଇଁ ପଞ୍ଚାୟତ ତରଫରୁ ଅଧିକ ଟଙ୍କା ମଞ୍ଜୁର ହୋଇପାରୁନାହିଁ। ୨୦୧୫ରେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଅନ୍ତର୍ଭୂୁକ୍ତ ପାଇଁ ପ୍ରସ୍ତାବ ଦିଆଯାଇଛି।