ବାରିପଦା ଅଫିସ, ୨୦ା୪- କରୋନା ସଂକ୍ରମଣକୁ ରୋକିବା ପାଇଁ ଦେଶରେ ଦ୍ୱିତୀୟ ପର୍ଯ୍ୟାୟ ଲକ ଡ଼ାଉନ ହୋଇଛି। ଏହି ସମୟରେ ଅତି ଆବଶ୍ୟକ ନ ପଡ଼ିଲେ ଘରୁ ବାହାରିବାକୁ ବାରଣ କରାଯାଇଛି। ମୟୂରଭଞ୍ଜ ଜିଲାର ବିଭିନ୍ନ ଗ୍ରାମରେ ଅନ୍ୟ ଲୋକମାନଙ୍କୁ କୌଣସି ଜରୁରୀ କାମ ନ ଥିଲେ ପ୍ରବେଶ ନ କରିବା ପାଇଁ ଗାଁ ମୁଣ୍ଡରେ ବାଉଁଶ ବନ୍ଧା ହେଉଥିବା ମଧ୍ୟ ଦେଖିବାକୁ ମିଳୁଛି। ଏପରି ସ୍ଥଳେ ରବିବାର ସକାଳେ ବାରିପଦା ସହରର ୧୭ନଂ. ୱାର୍ଡ଼ରେ ରହୁଥିବା ଜଣେ ବ୍ୟକ୍ତିଙ୍କ ଘରକୁ ଯଶିପୁର ଅଞ୍ଚଳର କିଛି ଲୋକ ଆସିଥିବା ଜାଣି ସ୍ଥାନୀୟ ଲୋକମାନେ ଏହାକୁ ବିରୋଧ କରିଥିଲେ। ଯଶିପୁର ଅଞ୍ଚଳରୁ ଆସିଥିବା ୮ ଜଣ ଲୋକ ଏବଂ ସ୍ଥାନୀୟ ଲୋକଙ୍କ ମଧ୍ୟରେ ସାହିକୁ ପ୍ରବେଶ ନେଇ ଉତ୍ତେଜନା ଦେଖା ଦେଇଥିଲା। ଖବର ପାଇ ବାରିପଦା ଟାଉନ ପାଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକମାନଙ୍କୁ ବୁଝାସୁଝା କରିଥିଲା। ମିଳିଥିବା ସୂଚନା ଅନୁସାରେ ଯଶିପୁର ଅଞ୍ଚଳର ଜଣେ ମହିଳାଙ୍କୁ ୩ ଦିନ ତଳେ ଜ୍ୱର ହେବାରୁ ତାଙ୍କୁ ଯଶିପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କ ଜ୍ୱର ନ କମିବାରୁ ବାରିପଦା ପିଆରଏମ୍ ମେଡ଼ିକାଲ୍କୁ ସ୍ଥାନାନ୍ତର କରାଯାଇଥିଲା। ତେବେ ଉକ୍ତ ମହିଳା ଓ ତାଙ୍କ ସମ୍ପର୍କୀୟ ପିଆରଏମ୍ ମେଡ଼ିକାଲକୁ ନ ଯାଇ ବାରିପଦା ସହରର ୧୭ ନଂ. ୱାର୍ଡ଼ରେ ଥିବା ତାଙ୍କ ବନ୍ଧୁଙ୍କ ଘରକୁ ଆସିଥିଲେ। ସ୍ଥାନୀୟବାସିନ୍ଦା ଏହାକୁ ବିରୋଧ କରିବାରୁ ଗ୍ରାମରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଥିଲା। ଖବରପାଇ ବାରିପଦା ତହସିଲଦାର ରାମଚନ୍ଦ୍ର ସୋରେନ୍ ଘଟଣାସ୍ଥଳରେ ପହଞ୍ଚି ବୁଝାସୁଝା କରିବା ସହିତ ଜ୍ୱରରେ ଆକ୍ରାନ୍ତ ମହିଳାଙ୍କୁ ସେଠାରୁ ପିଆରଏମ୍ ମେଡ଼ିକାଲ୍କୁ ପଠାଇ ଦେବା ପରେ ପରିସ୍ଥିତି ଶାନ୍ତ ପଡ଼ିଥିଲା।