ନୂଆଦିଲ୍ଲୀ, ୧୮।୬: କରୋନା ମହାମାରୀର ଆତଙ୍କ ଯୋଗୁ ଦେଶରେ ଅଚଳାବସ୍ଥା ଜାରି ରହିଛି। ଏପରିସ୍ଥଳେ ଗାଁରେ କରୋନା ଟେଷ୍ଟ ପାଇଁ ସରକାରଙ୍କ ପକ୍ଷରୁ ମୋବାଇଲ ଲ୍ୟାବ୍ର ଶୁଭାରମ୍ଭ କରାଯାଇଛି। ଏହା ଦ୍ୱାରା ଅଧିକ ଲୋକଙ୍କ ନମୁନା ପରୀକ୍ଷା କରାଯାଇପାରିବ। କେନ୍ଦ୍ରୀୟ ସ୍ବାସ୍ଥ୍ୟମନ୍ତ୍ରୀ ହର୍ଷ ବର୍ଦ୍ଧନ ଏହି ଲ୍ୟାବ୍ର ଶୁଭାରମ୍ଭ କରିଥିବା ନେଇ ଟୁଇଟ୍ କରି ସୂଚନା ଦେଇଛନ୍ତି। ଏହା ଦ୍ୱାରା ପ୍ରତିଦିନ ୨୫ ଜଣଙ୍କର କରୋନା ପରୀକ୍ଷା ଆରଟି-ପିସିଆର୍ ପ୍ରଣାଳୀରେ କରାଯାଇ ପାରିବ। ସେହିପରି ୩୦୦ ଜଣଙ୍କର ଏଲିସା ପ୍ରଣାଳୀରେ ପରୀକ୍ଷା ହୋଇପାରିବ। ଏହି ଲ୍ୟାବ୍ରେ ଟିବି ଏବଂ ଏଚଆଇଭି ପରୀକ୍ଷା ମଧ୍ୟ ସମ୍ପନ୍ନ ହେବ। ଯେଉଁ ଅଞ୍ଚଳରେ ଲ୍ୟାବ୍ର ସୁବିଧା ନ ଥିବ ସେଠାରେ ଏହାର ବ୍ୟବହାର କରାଯିବ ବୋଲି କୁହାଯାଉଛି।