ଗୁଡଭେଲା, ୧୦ା୪(ଡି.ଏନ୍.ଏ.): ଦିନକୁ ଦିନ କରୋନା ସଂକ୍ରମଣ ଭୟାବହତା ବଢି ଚାଲିଥିବାରୁ ରାଜ୍ୟବାସୀ ଭୟଭୀତ ହୋଇ ପଡିଛନ୍ତି। ସଂଗରୋଧ ସହ ସାମାଜିକ ଦୂରତ୍ୱ ରକ୍ଷା କରିବା ଦ୍ୱାରା ସଂକ୍ରମଣକୁ ରୋକାଯାଇପାରିବ। ତେବେ ଏହି ପରିପ୍ରେକ୍ଷୀରେ ବଲାଙ୍ଗୀର-ବୌଦ୍ଧ ଜିଲାକୁ ସଂଯୋଗ କରୁଥିବା ଗୁଡଭେଲା ବ୍ଳକ ଅନ୍ତର୍ଗତ ଖଡଙ୍ଗ ନଦୀ ଜାମୁଟ ବ୍ରିଜର ଦୁଇ ମୁଣ୍ଡକୁ ଶୁକ୍ରବାର ଜାମୁଟ ଗ୍ରାମବାସୀ କାଠ, ବାଉଁଶ ଦେଇ ବନ୍ଦ କରି ଦେଇଛନ୍ତି । ସେହିପରି ଗୁଡଭେଲା ବ୍ଲକ ବିଭିନ୍ନ ଅଞ୍ଚଳର ଏକାଧିକ ଗ୍ରାମର ଲୋକେ ନିଜ ଗ୍ରାମର ପ୍ରବେଶ ପଥକୁ ସିଲ କରୁଥିବା ଦେଖିବାକୁ ମିଳିଛି। ଗାଁ ମୁଣ୍ଡ ତଥା ଗାଁର ମୁଖ୍ୟ ରାସ୍ତାରେ ବାଉଁଶ, ଡାଳ କଣ୍ଟା, ଦୌଡି ପକାଇ ଗ୍ରାମବାସୀ ପାଳି କରି ଜଗି ରହିଛନ୍ତି। ଅତ୍ୟାବଶ୍ୟକ ସାମଗ୍ରୀ ପାଇଁ ଲୋକେ ଚାଲି କରି କିମ୍ବା ସାଇକେଲରେ ଯିବା ଆସିବା କରୁଛନ୍ତି। ଫଳରେ ସମ୍ପକ୍ତ ଗ୍ରାମମାନଙ୍କୁ ଅନ୍ୟାନ୍ୟ ଗ୍ରାମର ଲୋକେ ତଥା ଯାନବାହନ ଚଳାଚଳ ହେଉ ନ ଥିବା ସୂଚନା ମିଳିଛି।