ଔପଦା, ୨୨।୬(ଡି.ଏନ.ଏ.): ବାଲେଶ୍ୱର ଜିଲା ଔପଦା ବ୍ଲକ ଗଡ଼ସାହି ପଞ୍ଚାୟତର ଗଡ଼ସାହି ଗ୍ରାମରେ ହାତୀ ଉପଦ୍ରବ ଥମିବାରେ ନାଁ ଧରୁନି। ଗତ ୪/୫ଦିନ ହେବ କୁଲଡ଼ିହା ଅଭୟାରଣ୍ୟରୁ ହାତୀମାନେ ପାହାଡ଼ ତଳକୁ ଆସି ରାତିରେ ଆଦିବାସୀ ଅଧ୍ୟୁଷିତ ଗଡ଼ସାହି ଗ୍ରାମରେ ପଶି ଛଣଛପର, ଝାଟିମାଟି ଘରୁ, ଡୋଲିରୁ, ବସ୍ତାରୁ ଚାଉଳ, ଆମ୍ବଟୋଇରୁ ପାଚିଲା ଆମ୍ବ, ଖମ୍ବଆଳୁ ଆଦି ଖାଇବା ସହ ପନିପରିବା କ୍ଷେତ ମାଡ଼ି ଦଳି ଦେଉଛନ୍ତି। ଗ୍ରାମବାସୀ ବାଣ ଫୁଟାଇବା ସହ ଘଣ୍ଟା ପିଟି ଶବ୍ଦ କରି ହାତୀ ଘଉଡ଼ାଇବାକୁ ଚେଷ୍ଟା କଲେ ମଧ୍ୟ କିଛି ଫଳ ହେଉନି। ହାତୀପଲ ଗାଁ ଛାଡି ଯାଉ ନ ଥିବାରୁ ଗ୍ରାମବାସୀ ଆତଙ୍କିତ ହୋଇପଡିଛନ୍ତି। ଏପରିକି ଗ୍ରାମବାସୀ ହାତୀ ଉପରକୁ ଠେଙ୍ଗା ବାଡ଼ି ଫିଙ୍ଗିଲେ ସେମାନେ ଶୁଣ୍ଢରେ ଠେଙ୍ଗାବାଡ଼ି ନେଇ ଖେଳୁଛନ୍ତି ବୋଲି ଗ୍ରାମର ବାବୁ ମଢ଼େଇ, ଭାସ୍କର ସେନାପତି, ନଟବର ଗିିରି, ଦୁର୍ଯ୍ୟୋଧନ ଖେଜୁରିଆ ପ୍ରମୁଖ କହିଛନ୍ତି। ଅନ୍ୟପକ୍ଷରେ ବନବିଭାଗ ମଧ୍ୟ ହାତୀ ଘଉଡ଼ାଇବାରେ ନାକେଦମ୍ ହେଉଥିବା ବିଭାଗୀୟ ସୂତ୍ରରୁ ପ୍ରକାଶ। ଗ୍ରାମବାସୀ ହାତୀ ଉପଦ୍ରବର ସ୍ଥାୟୀ ପ୍ରତିକାର ପାଇଁ ସ୍ଥାନୀୟ ଔପଦାସ୍ଥ ବନବିଭାଗ ରେଞ୍ଜ କାର୍ଯ୍ୟାଳୟରେ ଦାବି କରିଛନ୍ତି।