କରାଚୀ,୧୮।୧୦- ପୂର୍ବତନ ପାକିସ୍ତାନ ସ୍ପିଡ୍ଷ୍ଟାର ଶୋଏବ ଅଖତର ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର ନୂଆ ଅଧ୍ୟକ୍ଷ ହେବାକୁ ଯାଉଥିବା ସୌରଭ ଗାଙ୍ଗୁଲିଙ୍କୁ ସମର୍ଥନ କରିଛନ୍ତି। ଏହା ଏକ ଭଲ ଖବର କହିବା ସହ ଗାଙ୍ଗୁଲିଙ୍କୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ସହ ତୁଳନା କରିବାକୁ ପଛାଇ ନାହାନ୍ତି। ପ୍ରଥମତଃ ଗାଙ୍ଗୁଲି ସର୍ବଦା ନୂଆ ପ୍ରତିଭା ଉପରେ ବିଶ୍ୱାସ କରନ୍ତି। ଦ୍ୱିତୀୟଟି ହେଲା ସେମାନଙ୍କୁ ସୁଯୋଗ ଦିଅନ୍ତି। ଏହା ଇମ୍ରାନ ପାକିସ୍ତାନ ଦଳ ପାଇଁ କରିଥିଲେ। ଗାଙ୍ଗୁଲି ଅଧିନାୟକ ହେବା ପରେ ଭାରତୀୟ ଦଳର ପରିବର୍ତ୍ତନ ଅତୁଳନୀୟ ଥିଲା। ମୁଁ କଦାପି ଚିନ୍ତା କରି ନ ଥିଲି ଭାରତ ପାକିସ୍ତାନକୁ ହରାଇ ଦେବ। କିନ୍ତୁ ଗାଙ୍ଗୁଲି ସବୁ ବଦଳାଇ ଦେଲେ। ସେ ଅଧିନାୟକ ହେବା ପରେ ବୀରେନ୍ଦ୍ର ସେହ୍ବାଗ, ଯୁବରାଜ ସିଂ, ଜାହିର ଖାନଙ୍କ ଭଳି ବହୁ ଯୁବ ଖେଳାଳିଙ୍କୁ ଦଳକୁ ଆଣିଥିଲେ ବୋଲି ଅଖତର ନିଜ ୟୁଟ୍ୟୁବ ଚ୍ୟାନେଲରେ ଅପଲୋଡ୍ କରିଥିବା ଏକ ଭିଡିଓରେ କହିଛନ୍ତି। ୪୪ ବର୍ଷୀୟ ଅଖତର ଆହୁରି କହିଛନ୍ତି, ଗାଙ୍ଗୁଲିଙ୍କ କ୍ରିକେଟ ସମ୍ପର୍କିତ ଜ୍ଞାନ ରହିଛି। ସେ ଟ୍ୟାଲେଣ୍ଟ ଯୁବ ଖେଳାଳିଙ୍କ ଉପରେ ନଜର ରଖନ୍ତି, ଯାହାକି ଭାରତୀୟ କ୍ରିକେଟ ଦଳର ଉନ୍ନତି କରିବ। ଗାଙ୍ଗୁଲିଙ୍କ ସହ କୋଲକାତା ନାଇଟ ରାଇଡର୍ସ ପାଇଁ ଖେଳୁଥିବାବେଳର କିଛି ଭଲ ସ୍ମୃତି ରହିଛି।