ନୂଆଦିଲ୍ଲୀ,୨୦।୬(ପି.ଟି.): ପୂର୍ବତନ ଅଧିନାୟକ ତଥା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ପରିବାରର କେତେଜଣ ସଦସ୍ୟ କରୋନା ଭାଇରସ ଦ୍ୱାରା ସଂକ୍ରମିତ ହୋଇଛନ୍ତି। ଟେଷ୍ଟ ରିପୋର୍ଟରେ ଏମାନେ ପଜିଟିଭ୍ ବୋଲି ଜଣାପଡିଛି। ଗାଙ୍ଗୁଲିଙ୍କ ବଡ଼ ଭାଇ ତଥା କ୍ରିକେଟ ଆସୋସିଏଶନ ଅଫ୍ ବେଙ୍ଗଲ (ସିଏବି) ସମ୍ପାଦକ ସ୍ନେହାଶିଷଙ୍କ ସ୍ତ୍ରୀ ଏହି ଭାଇରସ୍ ଦ୍ୱାରା ସଂକ୍ରମିତ ହୋଇଛନ୍ତି। ପଶ୍ଚିମବଙ୍ଗ ସ୍ବାସ୍ଥ୍ୟ ବିଭାଗର ସୂଚନା ଅନୁସାରେ ଗତ ସପ୍ତାହରେ ସ୍ନେହାଶିଷଙ୍କ ଶାଶୁ, ଶ୍ୱଶୁର ଓ ତାଙ୍କ ଘରେ କାମ କରୁଥିବା ବ୍ୟକ୍ତି କରୋନାରେ ଆକ୍ରାନ୍ତ ହୋଇଛନ୍ତି। ପଜିଟିଭ୍ ବୋଲି ଜଣାପଡିବା ପରେ ସମସ୍ତଙ୍କୁ ଏକ ଘରୋଇ ନର୍ସିଂ ହୋମ୍ରେ ଭର୍ତ୍ତି କରାଯାଇଛି। ଲକ୍ଷଣ ପ୍ରକାଶ ପାଇବାରୁ ଏମାନଙ୍କର ପରୀକ୍ଷା କରାଯାଇଥିଲା। ତେବେ ସ୍ନେହାଶିଷଙ୍କ ରିପୋର୍ଟ ନେଗେଟିଭ୍ ଆସିଛି। ସେ କରୋନା ପଜିଟିଭ୍ ବୋଲି କେତେକ ମିଡିଆରେ ପ୍ରକାଶିତ ରିପୋର୍ଟକୁ ସ୍ନେହାଶିଷ ଖଣ୍ଡନ କରିଛନ୍ତି। ”ମୁଁ ସମ୍ପୂର୍ଣ୍ଣ ସୁସ୍ଥ ଅଛି ଏବଂ ପ୍ରତିଦିନ ଅଫିସ କାର୍ଯ୍ୟ କରୁଛି। ମୋ ସ୍ବାସ୍ଥ୍ୟକୁ ନେଇ ପ୍ରକାଶିତ ଖବର ଭିତ୍ତିହୀନ। ଏପରି ସମୟରେ ଏପରି ଖବର ପ୍ରକାଶ ଆଶା କରାଯାଉନାହିଁ“ ବୋଲି ସେ କହିଛନ୍ତି। ସ୍ନେହାଶିଷ ଜଣେ ପୂର୍ବତନ ରଣଜୀ କ୍ରିକେଟର। ପରିବାର ସହିତ ସେ ମୋମିନପୁରଠାରେ ବାସ କରୁଛନ୍ତି। ଗାଙ୍ଗୁଲି ନିଜ ପରିବାର ସହ ପୈତୃକ ଘର ବେହେଲାଠାରେ ରହୁଛନ୍ତି।