ନୂଆଦିଲ୍ଲୀ,୪।୧୧: ରାଜଧାନୀ ଦିଲ୍ଲୀରେ ପ୍ରଦୂଷଣର ମାତ୍ରା ସାଂଘାତିକ ହେବା ପରେ ଏବେ ଏହା ସମସ୍ତଙ୍କ ପାଇଁ ମୁଣ୍ଡ ବ୍ୟଥାର କାରଣ ପାଲଟିଛି। ଦିଲ୍ଲୀ ସରକାର ଏହାକୁ ନେଇ ଅଡ୍-ଇଭିନ୍ ନମ୍ବର ଲାଗୁ କରିଥିବା ବେଳେ ପ୍ରଦୂଷଣର ମାତ୍ରା କମ୍ କରିବାକୁ ବିଭିନ୍ନ ସ୍ଥାନରେ ସୋମବାର ସକାଳୁ ପାଣି ପକାଯାଉଥିବା ଦେଖାଯାଇଛି। ରବିବାର ଦିଲ୍ଲୀର ପଦୂଷଣ ମାତ୍ରା ଏତେ ଅଧିକ ଦେଖି ସୋମବାର କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ ଲୋକଙ୍କୁ ଗାଜର ଖାଇବାକୁ କହିଛନ୍ତି। ଯାହା ଏବେ ଚର୍ଚ୍ଚାର ବିଷୟ ପାଲଟିଛି। ଏକ ଫଟୋ ସହ ହର୍ଷବର୍ଦ୍ଧନ ଟୁଇଟ୍ କରି ଲେଖିଛନ୍ତି, ଗାଜରରେ ଭିଟାମିନ୍ ଏ, ପୋଟାସିୟମ ଓ ଆଣ୍ଟିଅକ୍ସିଡାଣ୍ଟସ୍ ଭରପୁର ମାତ୍ରାରେ ଥିବାରୁ ଏହା ନାଇଟ୍ ବ୍ଲାଇଣ୍ଡସେନ୍ ସମସ୍ୟାକୁ ଦୂରେଇ ଦେଇଥାଏ। ସେହିପରି ଏହା ଶରୀରରେ ପ୍ରଦୂଷଣର ପ୍ରଭାବକୁ ମଧ୍ୟ କମ୍ କରିଥାଏ ବୋଲି ସେ କହିଛନ୍ତି। ତେବେ ହର୍ଷବର୍ଦ୍ଧନ ଜଣେ ଡାକ୍ତର ହୋଇଥିବାରୁ ତାଙ୍କର ଏଭଳି ଉକ୍ତି ଏବେ ଚର୍ଚ୍ଚାକୁ ଆସିଛି। କିନ୍ତୁ ଦିନକ ମଧ୍ୟରେ କେତେ ପରିମାଣର ଗାଜର ଖାଇବା ଦରକାର ସେ କଥା ସ୍ପଷ୍ଟ କରାଯାଇ ନାହିଁ। ଏହାକୁ ନେଇ ଚିକିତ୍ସକମାନେ ମତ ଦେଇଛନ୍ତି, ହର୍ଷବର୍ଦ୍ଧନ ଯାହା କହିଛନ୍ତି ତାହା କେତେକାଂଶରେ ଠିକ୍ ହୋଇପାରେ। ହେଲେ ଏହା ପ୍ରଦୂଷଣର ପ୍ରଭାବକୁ କେତେ ପରିମାଣରେ କମ୍ କରିବ ଓ ଦିନକୁ କେତେ ପରିମାଣରେ ଏହାକୁ ଖାଇବା ଆବଶ୍ୟକ ତାହା କହିବା କଷ୍ଟକର ବ୍ୟାପାର।