ଧାମନଗର, ୧୦।୬ (ଡି.ଏନ.ଏ.) – ଭଦ୍ରକ ଜିଲା ଧାମନଗର ବ୍ଲକ ଅନ୍ତର୍ଗତ ଦଇପୁର ପଞ୍ଚାୟତ ନାରାୟଣପୁର ରାସ୍ତାରେ ରବିବାର ସନ୍ଧ୍ୟାରେ ଗାଡ଼ି ଚଢ଼ିଯିବାରୁ ଜଣେ ଯୁବକଙ୍କର ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ହୋଇଛନ୍ତି। ନାରାୟଣପୁର ଗ୍ରାମର ସୌଭାଗ୍ୟ ଧଳଙ୍କର ଭଦ୍ରକ ଡାକ୍ତରଖାନାରେ ମୃତ୍ୟୁ ହୋଇଥିବା ବେଳେ ଗୁରୁତର ସନ୍ତୋଷ ଜେନା ଏବଂ ଦୁର୍ଗାପ୍ରସନ୍ନ ପଣ୍ଡା ଚିକିତ୍ସାଧୀନ ଅଛନ୍ତି। ଏହି ୩ ସାଙ୍ଗ ନାରାୟଣପୁର ଛକରେ ଠିଆ ହୋଇଥିବା ବେଳେ ଏକ ମିନିଟ୍ରକ ସେମାନଙ୍କ ଉପରେ ମାଡ଼ି ଯାଇଥିଲା। ୩ ଜଣଙ୍କୁ ଗୁରୁତର ଅବସ୍ଥାରେ ଭଦ୍ରକ ମେଡିକାଲକୁ ନିଆଯାଇଥିଲା। ସେଠାରେ ଡାକ୍ତର ସୌଭାଗ୍ୟଙ୍କୁ ମୃତ ଘୋଷଣା କରିଥିଲେ। ସ୍ଥାନୀୟ ଲୋକେ ଦୁର୍ଘଟଣା ଘଟାଇଥିବା ଗାଡ଼ିକୁ ଅଟକ ରଖିଥିଲେ। ଏହାକୁ ନେଇ ନାରାୟଣପୁର ଛକରେ କିଛି ସମୟ ଉତ୍ତେଜନା ଦେଖାଦେଇଥିଲା। ପରେ ଲୋକେ ଗାଡ଼ି ସହ ଡ୍ରାଇଭରଙ୍କୁ ଧାମନଗର ଥାନା ପୋଲିସ ଜିମା ଦେଇଛନ୍ତି।
