ପୁରୀ ଅଫିସ,୨୯।୨: ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀ ଉପଲକ୍ଷେ ତ୍ରୈମାସିକ ସାହିତ୍ୟ ପତ୍ରିକା ସୁଲେଖା ପକ୍ଷରୁ ଗାନ୍ଧୀ ବିଶେଷାଙ୍କ ପ୍ରସ୍ତୁତ କରାଯାଇଛି। ଓଡ଼ିଶାର ବିଭିନ୍ନ କବି ଓ ଲେଖକଙ୍କ ଲେଖାରେ ସମୃଦ୍ଧ ସୁଲେଖାର ଏହି ପ୍ରଥମ ସଂଖ୍ୟାକୁ ଶୁକ୍ରବାର ରାଜ୍ୟପାଳ ପ୍ରଫେସର ଗଣେଶୀ ଲାଲ ସର୍କିଟ ହାଉସ୍ ପରିସରରେ ଲୋକାର୍ପଣ କରିଛନ୍ତି। ସୁଲେଖାର ମୁଖ୍ୟ ସମ୍ପାଦକ ସଦାଶିବ ମିଶ୍ର, କବି ରକ୍ଷକ ନାୟକ, ସୁଲେଖା ସମ୍ପାଦନାମଣ୍ଡଳୀ ସଭ୍ୟ ଶିବସୁନ୍ଦର ମିଶ୍ର, ସୁରେଶ ପଟ୍ଟନାୟକ, ବିଶିଷ୍ଟ ଗାନ୍ଧୀବାଦୀ ଲେଖକ ଗୌରାଙ୍ଗ ଚରଣ ପରିଡ଼ା, କିରଣ ଜ୍ୟୋତି ସଙ୍ଗୀତ ପରିଷଦର ପ୍ରତିଷ୍ଠାତା ନାରାୟଣ ଚନ୍ଦ୍ର ସିହ୍ନା, ଶ୍ରୀକ୍ଷେତ୍ର ଲେଖକ ସାମ୍ମୁଖ୍ୟ ସମ୍ପାଦକ କୃଷ୍ଣଚନ୍ଦ୍ର ରଥ ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ ରାଜ୍ୟପାଳ ଗୌରାଙ୍ଗ ପରିଡ଼ାଙ୍କ ମହାତ୍ମାଙ୍କ ମନକଥା ଏବଂ କିରଣ ଜ୍ୟୋତି ସଙ୍ଗୀତ ପରିଷଦର ମୁଖପତ୍ର ତାନପୁରାକୁ ମଧ୍ୟ ଉନ୍ମୋଚିତ କରିଥିଲେ। ଗାନ୍ଧୀଙ୍କ ଜୟନ୍ତୀ ଉପଲକ୍ଷେ ଏଭଳି ସାରସ୍ବତ ଶ୍ରଦ୍ଧାଞ୍ଜଳିକୁ ରାଜ୍ୟପାଳ ପ୍ରଶଂସା କରିଥିଲେ।