ଓ୍ବାଶିଂଟନ: ବିଭିନ୍ନ ପ୍ରକାର ହୋଟେଲ ଦେଖିଥିବେ। ମାତ୍ର ଗିଟାର ଆକୃତିର ହୋଟେଲ କେବେ ଦେଖିଛନ୍ତି। ଏପରି ହୋଟେଲ ଆମେରିକାର ଫ୍ଲୋରିଡ଼ାର ହଲିଉଡ୍ରେ ରହିଛି। ୩୨ ମହଲା କୋଠା ବିଶିଷ୍ଟ ଏହି ହୋଟେଲଟି ୪୫୦ଫୁଟ ଉଚ୍ଚର ହୋଇଥିବା ବେଳେ ଏଥିରେ ୬୩୮ଟି ବିଳାସପୂର୍ଣ୍ଣ କୋଠରି ରହିଛି। ଗୋଟିଏ କୋଠରିରେ ରାତିରେ ରହିବାକୁ ହେଲେ ଗ୍ରାହକଙ୍କୁ ୭୦ ହଜାର ଟଙ୍କା ଦେବାକୁ ପଡ଼ିଥାଏ। ଏହି ହୋଟେଲ ନିର୍ମାଣରେ ୧.୫ ବିଲିୟନ ଡଲାର ଖର୍ଚ୍ଚ ହୋଇଛି।
ଖାଲି ଗିଟାର ଆକୃତିର ନୁହେଁ, ଏଠାରେ ସଙ୍ଗୀତର ମୂର୍ଚ୍ଛନା ପାଇଁ ମଧ୍ୟ ସୁବ୍ୟବସ୍ଥା କରାଯାଇଛି। ଏଥିରେ ଏକ ବଡ଼ ହଲ ରହିଛି, ଯେଉଁଠାରେ ୬,୫୦୦ ଅତିଥି ଏକାଠି ବସି କାର୍ଯ୍ୟକ୍ରମ ଉପଭୋଗ କରିପାରିବେ। ଏଥିସହିତ କ୍ୟାମ୍ପସର ୧୩ ଏକର ଜମିରେ ଏକ ଲାଗୁନ ପୁଲ୍, ୩୨ ହଜାର ବର୍ଗଫୁଟରେ ସ୍ପା ଏବଂ ସେଲୁନ୍ ଆଦି ରହିଛି। ହୋଟେଲ କାନ୍ଥରେ ଛୋଟଛୋଟ ଗଛ ମଧ୍ୟ ଲଗାଯାଇଛି। ଏଠାରେ ୧୯ଟି ରେଷ୍ଟୁରାଣ୍ଟ ରହିଛି। ହୋଟେଲର ନିର୍ମାଣଶୈଳୀ ବେଶ୍ ଆକର୍ଷଣୀୟ ହୋଇଛି।