ଜହାନାବାଦ,୨୮।୧: ଜବାହରଲାଲ ନେହେରୁ ୟୁନିଭର୍ସିଟି (ଜେଏନ୍ୟୁ)ର ଛାତ୍ର ଶରଜିଲ ଇମାମଙ୍କୁ ଦେଶଦ୍ରୋହ ମାମଲାରେ ଗିରଫ କରାଯାଇଛି। ଦିଲ୍ଲୀ ପୋଲିସର କ୍ରାଇମ୍ବ୍ରାଞ୍ଚ ଟିମ୍ ଓ ବିହାର ପୋଲିସର ମିଳିତ ଅଭିଯାନରେ ଜହାନାବାଦରୁ ଶରଜିଲଙ୍କୁ ମଙ୍ଗଳବାର ଦ୍ୱିପ୍ରହରରେ ଗିରଫ କରାଯାଇଥିବା ଜଣାପଡ଼ିଛି। ତାଙ୍କୁ ଗିରଫ କରାଯିବା ପରେ କାକୋ ଥାନାକୁ ନିଆଯାଇ ପୋଲିସ ପଚରାଉଚୁରା କରୁଛି। ସୂଚନାଯୋଗ୍ୟ, ଦିଲ୍ଲୀର ସାହିନ ବାଗରେ ନାଗରିକତ୍ୱ ସଂଶୋଧନ ଆଇନ(ସିଏଏ) ଓ ଏନଆର୍ସିକୁ ନେଇ ବିରୋଧ ପ୍ରଦର୍ଶନର ସୂତ୍ରଧର ଶରଜିଲ ସେଠାରେ ବିବାଦୀୟ ବୟାନ ଦେଇଥିବା ଅଭିଯୋଗ ହୋଇଥିଲା। ତାଙ୍କ ବିରୋଧରେ ୬ରାଜ୍ୟର ପୋଲିସ ଦେଶଦ୍ରୋହ ମାମଲା ରଜୁ କରିଥିଲା। ଦିଲ୍ଲୀ, ବିହାର, ଆସାମ, ଅରୁଣାଞ୍ଚଳ ପ୍ରଦେଶ, ମଣିପୁର ଓ ଉତ୍ତରପ୍ରଦେଶ ପୋଲିସ ଶରଜିଲଙ୍କ ଖାନତଲାସି ଜାରି ରଖିଥିଲା। ଏହା ପୂର୍ବରୁ ଅର୍ଥାତ୍ ସୋମବାର ରାତିରେ ଶରଜିଲଙ୍କ ସାନଭାଇ ସମେତ ଅନ୍ୟ୨ ଜଣଙ୍କୁ ପୋଲିସ ଗିରଫ କରି ପଚରାଉଚରା କରିଥିଲା। ଏଥିରୁ ମିଳିଥିବା ତଥ୍ୟକୁ ଆଧାର କରି ଦିଲ୍ଲୀ ପୋଲିସର କ୍ରାଇମ୍ବ୍ରାଞ୍ଚ ଟିମ୍ ଓ ବିହାର ପୋଲିସ ଏହି ଅପରେଶନ୍ରେ ସଫଳ ହୋଇଛି।