ରଣପୁର,୧ା୧(ସ୍ବ.ପ୍ର.): ରଣପୁର ପୋଲିସ ଅଟକ ରଖିଥିବା ୫ ଗୋଚାଲାଣକାରୀଙ୍କୁ ସୋମବାର ଗିରଫ କରି କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ପରେ ସେମାନଙ୍କୁ ରଣପୁର ସବ୍ଜେଲକୁ ପଠାଇ ଦିଆଯାଇଛି। ଗିରଫ ଅଭିଯୁକ୍ତମାନେ ହେଲେ ନୟାଗଡ ଟାଉନ ଥାନା ସିନ୍ଦୂରିଆ କରଣସାହିର ସଲମନ ଖଁା (୨୮) ଓ ମିହିର ମୋହିବୁଲ୍ଲା (୨୪), ଇଟାମାଟି ଥାନା ଇଟାମାଟି ବେହେରାସାହିର ଜୁହୁରୁଦ୍ଦିନ ଖାନ୍ (୩୦) ଓ ଏସ୍.କେ. ରାମଜନ (୨୪), ଖୋର୍ଦ୍ଧା ଜିଲା ବେଗୁନିଆ ଥାନା ବେଗୁନିଆ ଜାମୁସାହିର ନାସିର ଖାନ୍ (୨୩)। ରଣପୁର ଥାନା ପରିସରରେ ଆୟୋଜିତ ଖବରଦାତା ସମ୍ମିଳନୀରେ ଆଇଆଇସି ରଶ୍ମିରଞ୍ଜନ ଦାଶ ଏହି ସୂଚନା ଦେଇଛନ୍ତି। ତାଙ୍କ ସୂଚନା ଅନୁସାରେ ନୟାଗଡ଼ ଓ ଖୋର୍ଦ୍ଧା ଜିଲାର ବିଭିନ୍ନ ଅଞ୍ଚଳରୁ ଗୋରୁମାନଙ୍କୁ ଚୋରି କରି ଆନ୍ଧ୍ରପ୍ରଦେଶର ନରସିଂହପାଟଣାକୁ ଚାଲାଣ କରାଯାଉଥିଲା। ଏଥିପାଇଁ ଏକ ର଼୍ୟାକେଟ କାମ କରୁଥିବା ତଦନ୍ତରୁ ଜଣାପଡିଛି। ଗୋଚାଲାଣକୁ ସୁରକ୍ଷା ଦେବା ପାଇଁ ଏକ ପାଇଲଟିଂ ଗାଡି ଯାଉଥିଲା। ପୋଲିସ ରବିବାର ରାତିରେ ୬୮ ଗୋରୁ ଥିବା ଆଇଚର କଣ୍ଟେନର ଗାଡି ଜବତ କରି ୨ଜଣଙ୍କୁ ଗିରଫ କରିଥିଲା। ସେହିପରି ପାଇଲଟିଂ କରି ଯାଉଥିବା କାର ଜବତ ହୋଇଥିବାବେଳେ ୩ଜଣ ବ୍ୟକ୍ତି ଗିରଫ ହୋଇଛନ୍ତି। ରଣପୁର ବାସିନ୍ଦାଙ୍କ ସହଯୋଗରେ ଗୋ ଚାଲାଣକାରୀଙ୍କୁ ଗିରଫ କରିବା ସମ୍ଭବ ହେଲା। ଗୋରୁଙ୍କୁ ମଧ୍ୟ ଉଦ୍ଧାର କରାଯାଇଛି। ଉଦ୍ଧାର ୬୮ ଗୋରୁଙ୍କୁ ଚିକିତ୍ସା କରାଯାଇ ଖଣ୍ଡପଡା ଗିରିଡିପଲ୍ଲି ଗୋଶାଳାରେ ସୋମବାର ଛଡାଯାଇଛି।