ଇସ୍ଲାମାବାଦ,୧୮ା୫(ପି.ଟି.): ଗିଲ୍ଗିଟ୍-ବଲ୍ଟିସ୍ତାନ ପ୍ରଦେଶରେ ନିର୍ବାଚନକୁ ଭାରତ ଜୋର୍ଦାର ବିରୋଧ କରିଆସୁଥିବାବେଳେ ପାକିସ୍ତାନ ରାଷ୍ଟ୍ରପତି ଅରିଫ୍ ଆଲ୍ଭି ସେଠାରେ କାମଚଳା ସରକାର ଗଠନ ସହ ଭୋଟଗ୍ରହଣ ଲାଗି ଏକ ନିର୍ଦ୍ଦେଶନାମା ଜାରି କରିଛନ୍ତି। ଉକ୍ତ ଅଞ୍ଚଳରେ ସାଧାରଣ ନିର୍ବାଚନ କରାଇବା ଲାଗି ୨୦୧୮ ପ୍ରଶାସନିକ ନିର୍ଦ୍ଦେଶନାମାରେ ସଂଶୋଧନ କରିବା ଲାଗି ପାକ୍ ସୁପ୍ରିମକୋର୍ଟ ଗତ ଏପ୍ରିଲ ୩୦ରେ ସଂଘୀୟ ସରକାରଙ୍କୁ ଅନୁମତି ଦେଇଥିଲେ। ପାକ୍ ବେଆଇନ ଭାବେ ବଳପୂର୍ବକ ଦଖଲ କରିଥିବା ଏହି ଅଞ୍ଚଳରେ ନିର୍ବାଚନ କରାଇବା ପାଇଁ ସୁପ୍ରିମକୋର୍ଟ ଅନୁମତି ଦେବା ପରେ ଭାରତ ପକ୍ଷରୁ ଏହାର ବିରୋଧ କରାଯାଇଥିଲା। ଗିଲ୍ଗିଟ୍-ବଲ୍ଟିସ୍ତାନ ନିର୍ଦ୍ଦେଶନାମା, ୨୦୧୮ରେ ପରିବର୍ତ୍ତନକୁ ବିରୋଧକରି ଭାରତ ଇସ୍ଲାମାବାଦ ନିକଟରେ ପ୍ରତିବାଦ କରିଥିଲା। ଜମ୍ମୁ-କଶ୍ମୀର, ଲଦାଖ ସମେତ ଗିଲ୍ଗିଟ୍ ଓ ବଲ୍ଟିସ୍ତାନ ଭାରତର ଅବିଚ୍ଛେଦ୍ୟ ଅଙ୍ଗ ବୋଲି ଗତମାସରେ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା।
କଶ୍ମୀର ବ୍ୟାପାର ଓ ଗିଲ୍ଗିଟ୍-ବଲ୍ଟିସ୍ତାନ ମନ୍ତ୍ରଣାଳୟ ପକ୍ଷରୁ ଶନିବାର ଜାରି ବିଜ୍ଞପ୍ତି ଅନୁଯାୟୀ ରାଷ୍ଟ୍ରପତି ଆଲ୍ଭି ଗିଲ୍ଗିଟ୍-ବଲ୍ଟିସ୍ତାନ ନିର୍ବାଚନ ଓ କାମଚଳା ସଂଶୋଧନ ନିର୍ଦ୍ଦେଶନାମା ନିର୍ଦ୍ଦେଶନାମା ଜାରି କରିଛନ୍ତି। ଗିଲ୍ଗିଟ୍-ବଲ୍ଟିସ୍ତାନ ବିଧାନସଭା ଜୁନ୍ ୨୪ରେ ୫ ବର୍ଷ କାର୍ଯ୍ୟକାଳ ପୂରଣ କରିବ। କାମଚଳା ସରକାର ଗଠନ କରିବାର ବ୍ୟବସ୍ଥା ନ ଥିବାବେଳେ ରାଷ୍ଟ୍ରପତିଙ୍କ ନିର୍ଦ୍ଦେଶନାମା ପରେ ଏହି ସମସ୍ୟା ଦୂର ହୋଇଥିବା ଗିଲ୍ଗିଟ୍-ବଲ୍ଟିସ୍ତାନର ପାକିସ୍ତାନ ତେହରିକ୍-ଇ-ଇନ୍ସାଫ୍ ଅଧ୍ୟକ୍ଷ ସୟେଦ ଜାଫର ଶାହ କହିଛନ୍ତି।