ବରଗଡ଼ ଅଫିସ୍,୧।୪-ଘାତକ କରୋନା ଭୂତାଣୁ ସଂକ୍ରମଣ ଏବେ ବିଶ୍ୱବ୍ୟାପୀ ଚିନ୍ତା ପାଲଟିଛି । ଏହାକୁ ପ୍ରତିହତ ଏ ପର୍ଯ୍ୟନ୍ତ କୌଣସି ଔଷଧ ବାହାରି ପାରି ନଥିବା ଯୋଗୁ କରୋନାକୁ ମୁକାବିଲା କରିବା ପାଇଁ ଦେଶବ୍ୟାପୀ ଲକ୍ ଡାଉନ୍ କଟକଣା ଲାଗୁ କରାଯାଇଛି । ଏହି ଲକ୍ ଡାଉନ୍କୁ ସଫଳ କରିବା ତଥା କରୋନା ମୁକାବିଲା ସଚେତନତା ପାଇଁ ବରଗଡ଼ ପୋଲିସ ପକ୍ଷରୁ ନିଆରା ପ୍ରୟାସ ଆରମ୍ଭ ହୋଇଛି । ଜିଲା ପୋଲିସ ପକ୍ଷରୁ ଗୀତ ମାଧ୍ୟମରେ ସଚେତନତା କରାଯାଉଛି । ପୋଲିସ୍ ଏକ ସମ୍ବଲପୁରୀ ଗୀତ ଆସ ଆମେ ସଚେତନ ହେମା, ଆସ ହୋ କରୋନା କେ ଭଗେଇ ଦେମା… ରେକର୍ଡ଼ିଂ କରିଛି । ଗୀତକୁ କୁଚିଣ୍ଡା ଡିଏସପି ରାଜକିଶୋର ମିଶ୍ର ଲେଖିଥିବାବେଳେ ବରଗଡ଼ର ଟ୍ରାଫିକ କନଷ୍ଟେବଳ ବୃନ୍ଦାବତୀ ସାହୁ କଣ୍ଠଦାନ କରିଛନ୍ତି । ସେହିପରି ଅନ୍ୟ ଏକ ହିନ୍ଦୀ ଗୀତ ମେରେ ବେହେନୋ ଭାଇ ସବ୍କୋ ହେ ନିବେଦନ୍, ଇସ୍ କରୋନା କୋ ଦୁନିଆଁ ସେ ହଟାନା ହେ ରେକର୍ଡ଼ିଂ କରାଯାଇଛି । ସ୍ଥାନୀୟ ଆର୍.ଆର୍ ଷ୍ଟୁଡ଼ିଓରେ ଏହି ଗୀତଟି ରେକର୍ଡ଼ିଂ ହୋଇଛି । ଗୀତ ରେକର୍ଡ଼ିଂ ସମୟରେ ଅତିରିକ୍ତ ଏସପି ଅମରେନ୍ଦ୍ର ରଣା, ଟାଉନ ଥାନା ଆଇଆଇସି ସଦାନନ୍ଦ ପୂଜାହାରୀ ପ୍ରମୁଖ ଉପସ୍ଥିତ ଥିଲେ । ଏହି ଗୀତ ଦୁଇଟି ଏବେ ସୋସିଆଲ ମିଡ଼ିଆରେ ଭାଇରାଲ୍ ହେବା ପରେ କରୋନା ସଚେତନତା ପାଇଁ ବରଗଡ଼ ପୋଲିସର ଏଭଳି ଉଦ୍ୟମକୁ ବିଭିନ୍ନ ମହଲରେ ପ୍ରଶଂସା କରାଯାଉଛି।