ବଅଁରପାଳ,୨୩।୬ – କେବେ ବ୍ରହ୍ମା ତ କେବେ ବିଷ୍ଣୁ, ପୁଣି କେବେ ମହେଶ୍ୱର ବେଶରେ ଆସିଛନ୍ତି ଦର୍ଶକଙ୍କ ଆଗକୁ। କେତେବେଳେ ରାଜା, ମନ୍ତ୍ରୀ ସାଜିଛନ୍ତି ଗୀତିନାଟ୍ୟରେ। ବାଇଧନ, ଶିବ, ବିଣାକାରିଆ ଓ ବାବାଜୀ ଭୂମିକା ନିଭାଇଛନ୍ତି ଦଣ୍ଡନୃତ୍ୟରେ। ଦୀର୍ଘ ୩୦ ବର୍ଷ ମଧ୍ୟରେ ଏପରି ଶତାଧିକ ଚରିତ୍ରରେ ଅଭିନୟ କରି ନିଜ ଚମକ ଦେଖାଇଛନ୍ତି ବଅଁରପାଳ ବ୍ଲକ କୁଲାଡ଼ ଗ୍ରାମର ଅକ୍ଷୟ ଜେନା (୫୨)।
ନାଲ୍କୋ ସ୍ମେଲଟର ପ୍ଲାଣ୍ଟର କାର୍ବନ ଏରିଆ ଗ୍ରୀନ ଆନର୍ଡର ସୁପରିଣ୍ଟେଣ୍ଡେଣ୍ଟ ଭାବେ କାମ କରୁଥିବା ଅକ୍ଷୟଙ୍କ କଳାକାର ଜୀବନ ଆରମ୍ଭ ହୋଇଥିଲା ସ୍କୁଲରୁ। ସପ୍ତମରେ ପଢ଼ୁଥିବାବେଳେ କଳା ପ୍ରତି ତାଙ୍କର ଆଗ୍ରହ ବଢ଼ିଥିଲା। ସ୍କୁଲସ୍ତରୀୟ ଅନେକ ଗୀତିନାଟ୍ୟ ଓ ଡ୍ରାମାରେ ସେ ଅଭିନୟ କରିଥିଲେ। ହେଲେ ଅସଲ କଳାକାର ଜୀବନ ଆରମ୍ଭ ହୋଇଥିଲା ୧୯୯୦ରୁ। କୁଲାଡ଼ ମା’ କାଳୀ ଦଣ୍ଡ ଅନୁଷ୍ଠାନରେ ସେ ସାମିଲ ହୋଇ ଗୀତିନାଟ୍ୟରେ ଅଭିନୟ କରିଥିଲେ। କେତେବେଳେ ତାଙ୍କୁ ଶ୍ରୀକୃଷ୍ଣଙ୍କ ବେଶ ଧାରଣ କରିବାକୁ ପଡ଼ୁଥିଲା ତ ପୁଣି କେବେ ଯୁଧିଷ୍ଠିର, ଅର୍ଜୁନ ହେବାକୁ ପଡ଼ୁଥିଲା। ଦାରୁ ଦେବତା, ଭୂତକିଳି, ନାବକେଳି, ଗଣ୍ଡାବଧ, ଜୟଦ୍ରଥ ବଧ, କୀଚକ ବଧ, ଲକ୍ଷ୍ମୀପୁରାଣ ଆଦି ଶତାଧିକ ଗୀତିନାଟ୍ୟରେ ସେ ଅଭିନୟ କରିଛନ୍ତି। ଅନୁଷ୍ଠାନର କଳାକାରମାନଙ୍କ ସହ ସେ ଗଁ। ଗଁ। ବୁଲି ନାଟକ ପରିବେଷଣ କରିଛନ୍ତି। ସେ ଯେଉଁ ଚରିତ୍ରରେ ଅଭିନୟ କରନ୍ତି ତାଙ୍କୁ ତାହା ବେଶ୍ ମାନିଥାଏ। ସେଥିପାଇଁ ଅନୁଷ୍ଠାନର ସବୁ ଗୀତିନାଟ୍ୟ, ନାଟକରେ ତାଙ୍କ ଅଭିନୟକୁ ପ୍ରଶଂସା ମିଳେ। ଦିନରେ ପ୍ଲାଣ୍ଟରେ କାର୍ଯ୍ୟ କରିବା ପରେ ରାତିରେ ମୁହଁରେ ରଙ୍ଗମାରି ସେ କଳା ପ୍ରଦର୍ଶନ କରିଥାନ୍ତି। ଗୀତିନାଟ୍ୟ ବ୍ୟତୀତ ଦଣ୍ଡନୃତ୍ୟରେ ମଧ୍ୟ ସେ ଅଭିନୟ କରିଛନ୍ତି। ଏବେ ବୟସ ସହ ଅଭିଜ୍ଞତା ବଢ଼ିଯାଇଥିବାରୁ ତାଙ୍କୁ କଳାକାର ବଦଳରେ ଅନେକ ସମୟରେ ଦଣ୍ଡନୃତ୍ୟ ପ୍ରତିଯୋଗିତାର ବିଚାରକ ଭାବେ ଦେଖିବାକୁ ମିଳୁଛି। ଇତିମଧ୍ୟରେ ୩୦ରୁ ଊର୍ଦ୍ଧ୍ୱ ପ୍ରତିଯୋଗିତାରେ ସେ ବିଚାରକ କାର୍ଯ୍ୟ ତୁଲାଇ ସାରିଛନ୍ତି। ଦଣ୍ଡଗୁରୁ ଅଜାତି ଅମାନ୍ତ ଓ ଗୀତିନାଟ୍ୟ ଗୁରୁ ରାଧାନାଥ ଧୀରଙ୍କ ପାଇଁ ସେ ଆଜି ସ୍ଥାନୀୟ ଅଞ୍ଚଳରେ ଜଣେ ଦକ୍ଷ କଳାକାର ଭାବେ ନିଜକୁ ପରିଚିତ କରିପାରିଛନ୍ତି ବୋଲି ଅକ୍ଷୟ ପ୍ରକାଶ କରିଛନ୍ତି।
