କୋଲକାତା, ୧୪।୮:ଭାଗ୍ୟ କେତେବେଳେ ଯେ କାହାକୁ କେଉଁଠି ଆଣି ଛିଡା କରାଇଦିଏ ତାହା କେହି କହିପାରିବେ ନାହିଁ। ସେମିତି ଜଣେ ଭିକ୍ଷା ବୃତ୍ତି କରୁଥିବ ରାନୁ ମଣ୍ଡଳ ରାତାରାତି ବନିଯାଇଛନ୍ତି ସେଲିବ୍ରିଟି। ଗତ କିଛି ଦିନ ହେବ ପଶ୍ଚିମବଙ୍ଗର ରାଣାଘାଟ ରେଲଓ୍ବେ ଷ୍ଟେଶନରେ ସୁରସାମ୍ରାଜ୍ଞୀ ଲତା ମଞ୍ଜେସ୍କରଙ୍କ ‘ପ୍ୟାର୍ କା ନଗମା ହୈ..’ ଗୀତ ଗାଉଥିବା ରାନୁଙ୍କ ଭିଡିଓ ସାମ୍ନାକୁ ଆସିଥିଲା। ଅତିନ୍ଦ୍ର ଚକ୍ରବର୍ତ୍ତୀ ନାମକ ଜଣେ ଯାତ୍ରୀ ଏହି ଗୀତକୁ ନିଜ ମୋବାଇଲରେ ରେକର୍ଡ କରିଥିଲେ। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏବେ ସେହି ମହିଳାଙ୍କୁ ମୁମ୍ବାଇର ଏକ ରିୟଲିଟି ଶୋ’ରେ ଗୀତ ଗାଇବା ପାଇଁ ଅଫର ମିଳିଛି। ରାନୁଙ୍କର ମୁମ୍ବାଇରେ ହେବାକୁ ଥିବା ଖର୍ଚ୍ଚ ବହନ କରିବେ ବୋଲି ଇଭେଣ୍ଟ ଜଣାଇଛି। କେବଳ ଏତିକି ନୁହେଁ ରାନୁ ଦୀର୍ଘ ୧୦ ବର୍ଷ ପରେ ନିଜ ଝିଅଙ୍କୁ ଭେଟିଛନ୍ତି। ମୁଁ ଦ୍ୱିତୀୟ ଜୀବନ ପାଇଛି, ତାକୁ ଭଲ କରିବାକୁ ଚେଷ୍ଟା କରିବି ବୋଲି ରାନୁ କହିଛନ୍ତି। ସୂଚନାଯୋଗ୍ୟ, ରାନୁଙ୍କ ବିବାହ ମୁମ୍ବାଇର ବାବୁଲ ମଣ୍ଡଳଙ୍କ ସହିତ ହୋଇଥିଲା। କିନ୍ତୁ କିଛିବର୍ଷ ପରେ ତାଙ୍କ ସ୍ବାମୀଙ୍କର ଦେହାନ୍ତ ହୋଇଗଲା ପରେ ସେ କୋଲକାତା ଫେରି ଆସିଥିଲେ।ରାନୁଙ୍କ କହିବାନୁଯାୟୀ, ସେ ପେଟ ପୋଶିବା ପାଇଁ ଷ୍ଟେସନରେ ଗୀତ ଗାଉଥିଲେ।