ଗୁଆହାଟି,୨୭ା୨- ସ୍ଥାନୀୟ ବର୍ସାପାରା ଷ୍ଟାଡିୟମରେ ପ୍ରଥମ ଥର ପାଇଁ ଆଇପିଏଲ ମ୍ୟାଚ୍ ଖେଳାଯିବ। ଆଇପିଏଲ ଗଭର୍ନିଂ କାଉନ୍ସିଲ ରାଜସ୍ଥାନ ରୟାଲ୍ସ ଫ୍ରାଞ୍ଚାଇଜକୁ ୭ଟି ଘରୋଇ ମ୍ୟାଚ୍ ମଧ୍ୟରୁ ପ୍ରଥମ ଦୁଇଟି ମ୍ୟାଚ୍ ଗୁଆହାଟିଠାରେ ଆୟୋଜନ କରିବାକୁ ଅନୁମତି ଦେଇଛି। ରାଜସ୍ଥାନ ଏପ୍ରିଲ ୫ ଓ ୮ ତାରିଖରେ ଦିଲ୍ଲୀ କ୍ୟାପିଟାଲ୍ସ ଓ କୋଲକାତା ନାଇଟ୍ ରାଇଡର୍ସ ସହ ମ୍ୟାଚ୍ ଖେଳିବ। ଉଭୟ ମ୍ୟାଚ୍ ରାତି ୮ଟାରେ ଆରମ୍ଭ ହେବ। ଜୟପୁରସ୍ଥିତ ସଓ୍ବାଇ ମାନସିଂ ଷ୍ଟାଡିୟମ ରାଜସ୍ଥାନ ରୟାଲ୍ସର ମୁଖ୍ୟ ହୋମ ଭେନ୍ୟୁ। କିନ୍ତୁ ୨୦୧୦ରେ ଅହମ୍ମଦାବାଦ ଓ ୨୦୧୫ରେ ଅହମ୍ମଦାବଦ ଓ ମୁମ୍ବାଇ ବ୍ରାବୋର୍ନେ ଷ୍ଟାଡିୟମଠାରେ କିଛି ଘରୋଇ ମ୍ୟାଚ୍ ଖେଳିଥିଲା। ଚଳିତ ସିଜନରେ ଗୁଆହାଟିକୁ ତା’ର ବିକଳ୍ପ ଭେନ୍ୟୁ ରୂପେ ଚୟନ କରିବା ପୂର୍ବରୁ ଲକ୍ଷ୍ନୌ, ଅମ୍ମଦାବାଦ ଓ ମୁମ୍ବାଇର ଷ୍ଟାଡିୟମ ଉପରେ ନଜର ରଖିଥିଲା। ଆମେ ଏକ ଦଳ ଓ ପରିବାର ଭାବେ ଐତିହାସିକ ନିଷ୍ପତ୍ତି ଯୋଗୁ ଖୁବ୍ ଉତ୍ସାହିତ ଅଛୁ। ଯେଉଁଠାରେ କ୍ରିକେଟର ଉନ୍ନତି ହୋଇନାହିଁ, ସେଠାରେ ଆମେ ମିଳିତ ଉଦ୍ୟମ କରିଛୁ। ଉକ୍ତ ଷ୍ଟାଡିୟମରେ ମ୍ୟାଚ୍ ଆୟୋଜନ କରିବାର ଉଦ୍ଦେଶ୍ୟ ଦେଶର ବିଭିନ୍ନ ଅନ୍ତରରୁ ପ୍ରଶଂସକଙ୍କୁ ଆକୃଷ୍ଟ କରିବା ବୋଲି ଫ୍ରାଞ୍ଚାଇଜର କାର୍ଯ୍ୟକାରୀ ମୁଖ୍ୟ ରଣଜିତ ବାର୍ଥକର କହିଛନ୍ତି।