ସାନ୍ଫ୍ରାନ୍ସିସ୍କୋ,୧୦।୫: କରୋନା ପ୍ରଭାବ କମି ନ ଥିବାରୁ ଭାରତରେ ଲକ୍ଡାଉନ ୩.୦ ଲାଗୁ ହୋଇଛି। ସାରା ଦେଶରେ କଟକଣା ସହ କିଛି କିଛି କ୍ଷେତ୍ରରେ ଆର୍ଥତ୍କ କାର୍ଯ୍ୟକଳାପକୁ ବର୍ତ୍ତମାନ ଅନୁମତି ମିଳିଛି। ଏଭଳି ସ୍ଥିତିରେ ଗୁଗଲ ଏବଂ ଫେସ୍ବୁକ ଭଳି ପ୍ରମୁଖ ଟେକ୍ନୋଲୋଜି କମ୍ପାନୀ ସେମାନଙ୍କ କର୍ମଚାରୀଙ୍କୁ ଓ୍ବାର୍କ ଫ୍ରମ୍ ହୋମ୍ ବା ଘରେ ରହି କାମ କରିବା ସୁବିଧା ଦେଇଛନ୍ତି। ଏହି କମ୍ପାନୀଗୁଡିକର ଅଧିକାଂଶ କର୍ମଚାରୀ ଚଳିତ ବର୍ଷ ଶେଷ ଯାଏ ଘରେ ରହି କାମ କରିବା ନେଇ ନିଷ୍ପତ୍ତି ନେଇଥିବା ଜଣାପଡିଛି। ରିପୋର୍ଟ ମୁତାବକ, ଜୁଲାଇ ୬ରେ ଫେସ୍ବୁକ୍ ଏହାର ଅଧିକାଂଶ ଅଫିସ କାର୍ଯ୍ୟକ୍ଷମ କରାଇବ। କେଉଁ କର୍ମଚାରୀଙ୍କୁ ଅଫିସ ଆସିବାକୁ ପଡିବ ସେ ନେଇ ଏହି ସୋସିଆଲ ନେଟ୍ଓ୍ବାର୍କିଂ ସାଇଟ୍ କମ୍ପାନୀ ଏବେ ବିଚାର କରୁଛି। ସେହିଭଳି କୋଭିଡ୍-୧୯ ଭୂତାଣୁର ଭୟାବହତାକୁ ବିଚାରକରି ଗୁଗଲ ସମାନ ପଦକ୍ଷେପ ଗ୍ରହଣ କରିବ ବୋଲି ଜଣାଯାଇଛି।
ଏହି ପରିପ୍ରେକ୍ଷୀରେ ଗୁଗଲ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ସୁନ୍ଦର ପିଚାଇ କହିଛନ୍ତି, ଜୁଲାଇରେ ଅଫିସ ଆରମ୍ଭ ହେଲେ କର୍ମଚାରୀଙ୍କୁ ଡକାଯିବ। ମାତ୍ର ଓ୍ବାର୍କ ଫ୍ରମ୍ ହୋମ୍ ଅନ୍ତର୍ଗତ କାମ କରୁଥିବା କର୍ମଚାରୀ ଚଳିତ ବର୍ଷ ଶେଷ ଯାଏ ସେହିଭଳି ଘରୁ କାମ କରିବେ। ସୂଚନାଯୋଗ୍ୟ, ଜୁନ ୧ ପର୍ଯ୍ୟନ୍ତ ଘରୁ କାମ କରିବା ଲାଗି ଗୁଗଲ ମୁଖ୍ୟତଃ ଯୋଜନା ଧାର୍ଯ୍ୟ କରିଥିଲା। ଫେସ୍ବୁକରେ ବର୍ତ୍ତମାନ ୪୮,୨୬୮ ଜଣ କର୍ମଚାରୀ କାମ କରୁଛନ୍ତି। ଏହି କମ୍ପାନୀର କର୍ମଚାରୀ ଚଳିତ ବର୍ଷ ମାର୍ଚ୍ଚ ପରଠାରୁ ଘରୁ କାମ କରୁଛନ୍ତି। ଅଫିସ ପୁଣି ଥରେ ଖୋଲିବା ଯୋଜନା ସମ୍ପର୍କରେ ଫେସ୍ବୁକ ଶୀଘ୍ର ଘୋଷଣା କରିବ। ଉକ୍ତ କମ୍ପାନୀ ଏହାର ପ୍ରମୁଖ କନ୍ଫରେନ୍ସଗୁଡ଼ିକୁ ମଧ୍ୟ ବାତିଲ କରି ଦେଇଛି। କେବଳ ଅନ୍ଲାଇନ ତଥା ଭର୍ଚୁଆଲ ଭାବେ ବୈଠକ ଅନୁଷ୍ଠିତ ହେଉଥିବା ଫେସ୍ବୁକ ସିଇଓ ମାର୍କ ଜୁକରବର୍ଗ ସୂଚନା ଦେଇଛନ୍ତି। କ୍ଷତିଗ୍ରସ୍ତ ବଜାର ଯୋଗୁ ଅନ୍ୟ କମ୍ପାନୀଗୁଡିକ ଭଳି ଫେସ୍ବୁକର ରାଜସ୍ବ ଏବେ ଗଭୀର ଭାବେ ପ୍ରଭାବ ପଡିଛି। ବାଣିଜ୍ୟ ଆଶା କ୍ଷେତ୍ରରେ ଗଭୀର ଚାପ ଏବେ ସାମ୍ନା କରିବାକୁ ପଡୁଛି। ବାଣିଜ୍ୟ ଉପରେ ରହିଥିବା ଏହି ପ୍ରଭାବ ନିୟନ୍ତ୍ରଣ ବାହାରେ ରହିଛି ବୋଲି ଜୁକରବର୍ଗ ମତ ପ୍ରକାଶ କରିଛନ୍ତି।