ଅହମଦାବାଦ,୫ା୧୨: ନୂଆ ମୋଟରଯାନ ଆଇନ, ୨୦୧୯କୁ ସାରା ଦେଶରେ କଡ଼ାକଡ଼ି ଭାବେ ଲାଗୁ କରିବା ପାଇଁ ଉଦ୍ୟମ ଚାଲିଥିବାବେଳେ ଭାଜପା ଶାସିତ ଗୁଜରାଟରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ବାଇକ୍ ଆରୋହୀଙ୍କ ସୁରକ୍ଷା ପାଇଁ ଉଦ୍ଦିଷ୍ଟ ହେଲ୍ମେଟକୁ ରାଜ୍ୟର ସହରଗୁଡ଼ିକରେ ଇଚ୍ଛାଧୀନ କରାଯାଇଛି। ଫଳରେ ଯାହାଙ୍କ ଇଚ୍ଛାହେବ ସେ ପିନ୍ଧିବେ। ଇଚ୍ଛା ନ ହେଲେ ପିନ୍ଧିବେ ନାହିଁ। ଆଇନ ଉଲ୍ଲଂଘନକାରୀଙ୍କୁ ଜରିମାନା କୋହଳ କରିବା ପରେ ଗୁଜରାଟ ସରକାର ସହରୀ ବାଇକ୍ ଆରୋହୀଙ୍କ ପାଇଁ ନିୟମ ଆହୁରି କୋହଳ କରିଛନ୍ତି। ପୌରପାଳିକା ଓ ମହାନଗର ନିଗମ ଅଞ୍ଚଳରେ ବାଇକ୍ ଚଳାଉଥିବା ବ୍ୟକ୍ତି ନିଜ ଇଚ୍ଛା ମୁତାବକ ହେଲ୍ମେଟ ପିନ୍ଧିବେ ବୋଲି ବୁଧବାର କ୍ୟାବିନେଟ ବୈଠକରେ ସରକାର ନିଷ୍ପତ୍ତି ନେଇଥିବା ପରିବହନ ମନ୍ତ୍ରୀ ଆର୍.ସି. ଫାଲଦୁ ସୂଚନା ଦେଇଛନ୍ତି। ସହରାଞ୍ଚଳରେ ଲୋକେ ବାଇକ୍ରେ ବେଶି ଦୂରକୁ ଯାଉ ନ ଥିବାରୁ ଏପରି ନିଷ୍ପତ୍ତି ହୋଇଥିବା ସେ କହିଛନ୍ତି। ତେବେ ସହର ବାହାରକୁ କିମ୍ବା ଜାତୀୟ ଅଥବା ରାଜ୍ୟ ରାଜପଥରେ ଯିବାବେଳେ ହେଲ୍ମେଟ ପିନ୍ଧିବା ବାଧ୍ୟତାମୂଳକ କରାଯାଇଛି।