ଭାପୁର,୩।୭(ଡି.ଏନ.ଏ.)-ଆଷାଢର ପହିଲି ବର୍ଷାରେ ଉଡି ବୁଲନ୍ତି ରଙ୍ଗବେରଙ୍ଗର ଗୁଞ୍ଜର(ପୋକ)। ସେହି ଗୁଞ୍ଜରକୁ ଧରି ସୂତାରେ ବାନ୍ଧି ଉଡାଇ ଆନନ୍ଦ ପାଆନ୍ତି ଗ୍ରାମାଞ୍ଚଳର ପିଲାମାନେ। ହେଲେ ଗୁଞ୍ଜର ଧରିବା ୨ପିଲାଙ୍କ ପାଇଁ କାଳ ହୋଇଛି। ମଙ୍ଗଳବାର ରଙ୍ଗୀନ ଗୁଞ୍ଜର ଧରିବାକୁ ଯାଇ ପାଣିରେ ବୁଡି ୨ଶିଶୁଙ୍କ ମୃତ୍ୟୁ ଘଟିଛି। ମୃତ ଶିଶୁ ଦ୍ୱୟ ହେଲେ ନୟାଗଡ଼ ଜିଲା ଭାପୁର ବ୍ଲକ ନିହଲପ୍ରସାଦ ଗ୍ରାମର ତ୍ରିନାଥ ବେହେରାଙ୍କ ଏକମାତ୍ର ପୁଅ ସୋମନାଥ (ସାଢେ ୪ ବର୍ଷ) ଓ ବିରଞ୍ଚତ୍ ବେହେରାଙ୍କ ପୁଅ ରାଜେଶ (୪ ବର୍ଷ)। ସେମାନେ ଗୋଟିଏ ପରିବାରର ବୋଲି ଜଣାପଡିଛି।
ଗ୍ରାମର ୫ଜଣ ନାବାଳକ ମଧ୍ୟାହ୍ନ ୧୨ଟା ସମୟରେ ଗାଁ ମୁଣ୍ଡରେ ଥିବା ବିଲ ନିକଟସ୍ଥ ଏକ ଗଛ ପାଖକୁ ଯାଇଥିଲେ। ଉକ୍ତ ଗଛ ଡାଳରେ ବହୁ ଗୁଞ୍ଜର ବସୁ ଥିବାରୁ ତାହାକୁ ଧରିବା ପାଇଁ ପିଲାମାନେ ଉଦ୍ୟମ କରିଥିଲେ। ସମସ୍ତ ପିଲାଙ୍କ ବୟସ ୫ ବର୍ଷ ମଧ୍ୟରେ । ସୋମନାଥ ଓ ରାଜେଶ ବିଲ କଡେକଡେ ଆଗରେ ଯାଉଥିବା ବେଳେ ଅନ୍ୟ ପିଲାମାନେ ସେମାନଙ୍କ ପଛେପଛେ ଯାଉଥିଲେ। ବର୍ଷାରେ ବିଲ କଡ କାଦୁଅ ଯୋଗୁ ସୋମନାଥ ଓ ରାଜେଶଙ୍କ ଗୋଡ ଖସି ଯାଇଥିଲା। ସେମାନେ ବିଲ ଭିତରେ ଜମି ରହିଥିବା ପାଣିରେ ବୁଡିଯାଇଥିଲେ। ସମ୍ପୃକ୍ତ ୨ ଜଣ ବୁଡ଼ିଯିବାର ଦେଖି ଅନ୍ୟ ୩ ଜଣ ପିଲା ସେଠାରୁ ଦୌଡି ଯାଇଁ ଗାଁରେ କହିଥିଲେ। ଗ୍ରାମବାସୀ ଘଟଣାସ୍ଥଳରେ ପହଞ୍ଚତ୍ ୨ଶିଶୁଙ୍କୁ ପାଣିରୁ ଉଦ୍ଧାର କରି ଭାପୁର ଡାକ୍ତରଖାନାରେ ଭର୍ତ୍ତି କରିଥିଲେ ହେଁ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ମୃତଦେହ ବ୍ୟବଚ୍ଛେଦ ପାଇଁ ଖଣ୍ଡପଡ଼ା ଡାକ୍ତରଖାନା ପଠାଇ ଦିଆଯାଇଛି। ଫତେଗଡ଼ ରାଜସ୍ବ ନିରୀକ୍ଷକ ବୀରକିଶୋର ବେହେରା ଓ ସିଡିପିଓ ରେଣୁବାଳା ନନ୍ଦ ଘଟଣା ସ୍ଥଳକୁ ଯାଇ ତଦନ୍ତ କରି ଫେରିଛନ୍ତି। ଏହି ଘଟଣା ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।