ବଲାଙ୍ଗୀର ଅଫିସ, ୧୭ା୯: ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ତଥା ଲରମ୍ଭା ଥାନା ଅନ୍ତର୍ଗତ ଲୁହାସିଂହା ଗ୍ରାମ ପଞ୍ଚାୟତର ଚିଟିକାମାଲ ଗାଁରେ ଗୁଣିଗାରେଡି ସନ୍ଦେହରେ ସୋମବାର ଏକ ଦମ୍ପତିଙ୍କୁ ହତ୍ୟା କରାଯାଇଥିଲା । ଏହି ଘଟଣାରେ ସମ୍ପୃକ୍ତ ସନ୍ଦେହରେ ପୋଲିସ ୪ ଜଣଙ୍କୁ ଅଟକ ରଖି ପଚରାଉଚରା କରୁଛି । ମଙ୍ଗଳବାର ମୃତ ଦମ୍ପତିଙ୍କ ପୁଅ ରମେଶ ବରିହା ଜିଲା ପୋଲିସ କାର୍ଯ୍ୟାଳୟକୁ ଆସି ଏସ୍ପି ମାଡକର ସନ୍ଦୀପ ସମ୍ପତ୍ଙ୍କୁ ଭେଟି ସୁରକ୍ଷା ପାଇଁ ଆକୁଳ ନିବେଦନ କରିଛନ୍ତି । ଏପରିକି ମୃତ ମାତାପିତାଙ୍କ ଅନ୍ତିମ ସଂସ୍କାର କରିବା ପାଇଁ ତାଙ୍କୁ ପୋଲିସ ସୁରକ୍ଷା ଯୋଗାଇବାକୁ ସେ ନିବେଦନ କରିଛନ୍ତି । ଅପପ୍ରଚାର ଓ ଅନ୍ଧବିଶ୍ୱାସରେ ବଶବର୍ତ୍ତୀ ହୋଇ ହତ୍ୟାକାରୀମାନେ ତାଙ୍କ ମାତାପିତାଙ୍କୁ ବୀଭତ୍ସଭାବେ ହତ୍ୟା କରି ତାଙ୍କ ପରିବାରକୁ ଛିନ୍ଭିନ୍ କରିଦେଇଛନ୍ତି ବୋଲି ସେ କହିଛନ୍ତି। ସୁରକ୍ଷା ଲୋଡିବା ପରେ ଏସପି ସମ୍ପତ୍ ରମେଶଙ୍କୁ ପୋଲିସ ସୁରକ୍ଷା ଯୋଗାଇ ଦେଇଛନ୍ତି । ପୋଲିସ ସୁରକ୍ଷା ଭିତରେ ଯାଇ ରମେଶ ମୃତ ମାତାପିତାଙ୍କ ଅନ୍ତିମ ସଂସ୍କାର କରିବେ ବୋଲି ସୂଚନା ମିଳିଛି।
ସୋମବାର ସକାଳୁ ଚିଟିକାମାଲ ଗାଁ ନିକଟ ପାହାଡରୁ ଚିନ୍ତାମଣି ବରିହା (୫୫) ଓ ତାଙ୍କ ସ୍ତ୍ରୀ ରୁକ୍ମିଣୀ ବରିହା (୫୦)ଙ୍କ ମୃତଦେହ ଉଦ୍ଧାର କରାଯାଇଥିଲା ା ଗୁଣିଗାରେଡି ସନ୍ଦେହରେ କେତେକ ଲୋକ ମିଳିତ ଭାବେ ସେମାନଙ୍କୁ ହତ୍ୟା କରି ପାହାଡରେ ଫିଙ୍ଗି ଦେଇଥିତ୍ବା ଅନୁମାନ କରାଯାଉଛି ା ହତ୍ୟାକାଣ୍ଡକୁ ନେଇ ୪ ଜଣ ସନ୍ଦିଗ୍ଧଙ୍କୁ ଲରମ୍ଭା ଥାନାରେ ଅଟକ ରଖାଯାଇ ପଚରାଉଚରା ଜାରି ରହିଛି । ଏବେ ଗାଁ ପୁରୁଷଶୂନ୍ୟ ହୋଇଯାଇଛି। ତଦନ୍ତ ଜାରି ରହିଛି ବୋଲି ଏସ୍ପି ସମ୍ପତ୍ ସୂଚନା ଦେଇଛନ୍ତି ା ଗତ ଅଗଷ୍ଟ ମାସରେ ଚିଟିକାମାଲ ଗାଁରେ ଏକ ଶିଶୁମୃତ୍ୟୁ ହୋଇଥିଲା । ମୃତ ଶିଶୁ ପୋତା ଯାଇଥିତ୍ବା ସ୍ଥାନରେ କେହି ଗତ ଶୁକ୍ରବାର ସିନ୍ଦୂର, ଫୁଲ ପକାଇ ପୂଜାର୍ଚ୍ଚନା କରିଥିଲେ । ଏହାକୁ ନେଇ ଗାଁରେ ଗୁଣିଗାରେଡି ସନ୍ଦେହ କରାଯାଇଥିଲା । ଚିନ୍ତାମଣି ଓ ତାଙ୍କ ସ୍ତ୍ରୀ ରୁକ୍ମିଣୀଙ୍କୁ କେତେଜଣ ଗ୍ରାମବାସୀ ଡାହାଣୀ ଓ ଗୁଣିଗାରେଡି କରୁଥିତ୍ବା ସନ୍ଦେହ କରିଥିଲେ । ଏହାପରେ ଗାଁରେ କଙ୍ଗାରୁ କୋର୍ଟ ବସିଥିଲା । ସେଠାକୁ ଚିନ୍ତାମଣି ଓ ରୁକ୍ମିଣୀଙ୍କୁ ଆସିବା ପାଇଁ ଗ୍ରାମବାସୀ ଡାକିଥିଲେ । ତେବେ ସେଠାକୁ ପ୍ରଥମେ ଚିନ୍ତାମଣି ନ ଯାଇ ଲରମ୍ଭା ଥାନାରେ ଅଭିଯୋଗ କରିଥିଲେ । ପୋଲିସ ମଧ୍ୟ ଏହାକୁ ନେଇ ଗାଁର କେତେଜଣ ଲୋକଙ୍କୁ ଥାନାକୁ ଡାକି ଚିନ୍ତାମଣି ଓ ରୁକ୍ମିଣୀଙ୍କ ଉପସ୍ଥିତିରେ ମିଳାମିଶା କରିଥିଲେ । ରବିବାର ସକାଳ ପ୍ରାୟ ୮ଟାରେ ଚିନ୍ତାମଣି ତାଙ୍କ ପୁଅ ରମେଶଙ୍କୁ ଫୋନ୍ କରି ଗାଁରେ ଏକ ବୈଠକ ବସୁଥିବା ସୂଚନା ଦେଇ ତାଙ୍କୁ ସେଠାକୁ ଡାକିଥିବା ସମ୍ପର୍କରେ କହିଥିଲେ । ଏହାର କିଛି ସମୟ ପରେ ରମେଶ ତାଙ୍କ ପିତାଙ୍କୁ ଫୋନ୍ କରିଥିଲେ ମଧ୍ୟ ତାଙ୍କ ମୋବାଇଲ ସୁଇଜ୍ ଅଫ୍ ଥିତ୍ବା ଜାଣିବାକୁ ପାଇଥିଲେ ।