ଦିଗପହଣ୍ଡି,୨୫ା୨ (ଡି.ଏନ୍.ଏ): ଦିଗପହଣ୍ଡି ଥାନା ଅନ୍ତର୍ଗତ ପୀତାମ୍ବରପୁର ଗ୍ରାମର ଗାଁ ବୈଦ୍ୟ ବଙ୍ଗାଳି ସେଠୀଙ୍କୁ ଗତ ୧୭ ତାରିଖରେ ହତ୍ୟା କରାଯାଇଥିବା ଘଟଣାର ଶୁକ୍ରବାର ପୋଲିସ ପର୍ଦ୍ଦାଫାସ କରିଛି। ବଙ୍ଗାଳିଙ୍କୁ ଗୁଣି ସନ୍ଦେହରେ ସୁପାରି କିଲରଙ୍କ ଦ୍ୱାରା ହତ୍ୟା କରାଯାଇଥିବା ସୂଚନା ଦେଇଛି। ବହୁ ପୂର୍ବରୁ ଏଥିପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯାଇଥିଲା। ଏହି ଘଟଣାରେ ଜଣେ ମହିଳାଙ୍କ ସମେତ ମୋଟ ୬ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ହତ୍ୟାକାଣ୍ଡରେ ବ୍ୟବହୃତ ଲୁହାଛଡ, ବାଡି, ଗୋଟିଏ ବାଇକ ଏବଂ ୫ଟି ମୋବାଇଲ ଜବତ କରାଯାଇଛି।
ଅନୁଯାୟୀ, ବଙ୍ଗାଳି ସେଠୀ ନିଦ୍ରାବତୀ ଦେବୀଙ୍କ ସାଧକ ଥିଲେ। ବିଭିନ୍ନ ରୋଗ ପାଇଁ ଝଡ଼ାଫୁଙ୍କା, ପୂଜାର୍ଚ୍ଚନା କରିବା ସହ ଜଡିବୁଟି ଦେଉଥିଲେ। ଗତ ପ୍ରାୟ ୭ ବର୍ଷ ପୂର୍ବେ ପଡୋଶୀ ପ୍ରସନ୍ନ ସେଠୀଙ୍କ ବଡ଼ଝିଅ ଅଜଣା ରୋଗରେ ଆକ୍ରାନ୍ତ ଥିବାରୁ ସେ ବଙ୍ଗାଳୀଙ୍କ ଆଶ୍ରୟ ନେଇଥିଲେ। ତେବେ ତାଙ୍କଠାରୁ ଔଷଧ ଖାଇବାର ଗୋଟିଏ ଦିନ ପରେ ଝିଅର ମୃତ୍ୟୁ ହୋଇଯାଇଥିଲା। ସେହିଭଳି ହିଞ୍ଜିଳି ଥାନା ଅନ୍ତର୍ଗତ ପୋଡିଙ୍ଗି ଗ୍ରାମରେ ରହୁଥିବା ପ୍ରସନ୍ନଙ୍କ ଶାଳୀଙ୍କର ମଧ୍ୟ ଗତ ୩ ମାସ ପୂର୍ବେ ମୃତ୍ୟୁ ହୋଇଯାଇଥିଲା। ହିଞ୍ଜିଳି ସିନେମା ହଲ ଛକରେ ରହୁଥିବା ଅରୁଣ ସେଠୀଙ୍କ ଭଉଣୀ ବଙ୍ଗାଳିଙ୍କ ଔଷଧ ଖାଇବା ପରେ ମୃତ୍ୟୁ ହୋଇଥିବାରୁ ସମସ୍ତେ ବଙ୍ଗାଳିଙ୍କ ତନ୍ତ୍ର ସାଧନା ଉପରେ ସନ୍ଦେହ କରିବା ସହ ସେ ହିଁ ଗୁଣିଗାରେଡ଼ି କରି ମାରିଥିବା ସନ୍ଦେହ କରିଥିଲେ। ପ୍ରତିଶୋଧ ନେବାପାଇଁ ପ୍ରସନ୍ନ, ତାଙ୍କ ଶଢୁ ପ୍ରତାପ ଏବଂ ଅରୁଣ ହିଞ୍ଜିଳି ଭଞ୍ଜମାର୍ଗରେ ରହୁଥିବା ତାଙ୍କର ସାଙ୍ଗ ଆଦେଶ ମହାପାତ୍ରଙ୍କ ସହାୟତା ଲୋଡିଥିଲେ। ତେବେ ଜରଡ଼ା ଥାନା ପାତ୍ରପୁର ଖଣ୍ଡିଆସାହିରେ ରହୁଥିବା ଆଦେଶଙ୍କ ମାମୁ ସୁପାରି କିଲରଙ୍କ ଯୋଗାଯୋଗରେ ରହି ବଙ୍ଗାଳିଙ୍କ ହତ୍ୟା ପାଇଁ ଦେଢ଼ଲକ୍ଷ ଟଙ୍କା ଚୁକ୍ତି ହୋଇଥିଲା। ଚୁକ୍ତି ପ୍ରକାରେ ଭୁବନେଶ୍ୱରର ମନୋଜ ବେହେରା ଏବଂ ବିଶୁ ଟଙ୍କା ପାଇବା ପରେ ସମସ୍ତେ ମିଶି ପୀତାମ୍ବରପୁର ଅଭିମୁଖେ ବାହାରି ଥିଲେ। ସମସ୍ତେ ମିଶି ଏକ କଲଭର୍ଟ ନିକଟରେ ହତ୍ୟା ପାଇଁ ପ୍ରସ୍ତୁତ ହୋଇ ରହିବା ସହ ବଙ୍ଗାଳିଙ୍କ ଚଳପ୍ରଚଳ ସମ୍ପର୍କରେ ପଡୋଶୀ ପ୍ରସନ୍ନଙ୍କ ସ୍ତ୍ରୀ କବିତାଙ୍କ ଠାରୁ ସୂଚନା ସଂଗ୍ରହ କରିଥିଲେ। ବଙ୍ଗାଳି ଏକ ସାଇକେଲରେ ଚାହା ପିଇବା ପାଇଁ ଗାଁରୁ ପୀତାମ୍ବରପୁର ଛକକୁ ଯାଉଥିବା ବେଳେ ମରଣାନ୍ତକ ଆକ୍ରମଣ କରିଥିଲେ। ସମସ୍ତ ଅଭିଯୁକ୍ତ ଘଟଣା ସ୍ଥଳରୁ ଚମ୍ପଟ ମାରିଥିଲେ। ବଙ୍ଗାଳିଙ୍କୁ ପ୍ରଥମେ ଦିଗପହଣ୍ଡି ଓ ପରେ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲେ ମଧ୍ୟ ତାଙ୍କର ମୃତ୍ୟୁ ହୋଇଥିଲା। ଏହି ଘଟଣାରେ ଆଇଆଇସି ଦିପ୍ତିରଞ୍ଜନ ବେହେରା ନଂ. ୭୫/୨୩ରେ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲେ। ଏହି ଘଟଣାରେ ସଂପୃକ୍ତ ଥିବା ପୀତାମ୍ବରପୁର ଗ୍ରାମର ପ୍ରସନ୍ନ ସେଠୀ, ସ୍ତ୍ରୀ କବିତା ସେଠୀ, ଶଢୁ ପ୍ରତାପ ସେଠୀ, ହିଞ୍ଜିଳିର ଅରୁଣ ସେଠୀ, ଆଦେଶ ମହାପାତ୍ର ଏବଂ ପାତ୍ରପୁରର ସନ୍ତୋଷ ନାୟକଙ୍କୁ ସେମାନଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି। ମୁଖ୍ୟ ସୁପାରୀ କିଲର ମନୋଜ ବେହେରା ଅନ୍ୟ ଏକ ମାମଲାରେ ଘଟଣାର ଦୁଇଦିନ ପରେ ଭୁବନେଶ୍ୱର ଖାରବେଳ ନଗର ପୋଲିସ ହାତରେ ଧରାପଡି ଜେଲ ଯାଇଥିବା ଜଣାପଡିଛି। ଅନ୍ୟତମ ଅଭିଯୁକ୍ତ ବିଶୁକୁ ଧରିବା ପାଇଁ ଉଦ୍ୟମ ଅବ୍ୟାହତ ରହିଥିବା ତଦନ୍ତକାରୀ ଅଧିକାରୀ କହିଛନ୍ତି।