ଭଞ୍ଜନଗର,୭।୧୧(ଡି.ଏନ.ଏ)-ଗତମାସ ୯ ତାରିଖରେ ଜଗନ୍ନାଥପ୍ରସାଦ ରେଞ୍ଜ ଗୁଣ୍ଡିରିବାଡି ଗ୍ରାମ ନିକଟସ୍ଥ ଲଣ୍ଡେଇହିଲ୍ ପାହାଡ ନିକଟରୁ ଏକ ବାଘୁଣୀର ପାଦ ଚିହ୍ନ ମିଳିବାପରେ ଉକ୍ତ ଜଙ୍ଗଲରେ ବାଘ ଥିବା ପ୍ରମାଣ ମିଳିଥିଲା। ମାସେ ମଧ୍ୟରେ ବାଘୁଣୀଟି ଛାମୁଣ୍ଡା, କୁମୁଣ୍ଡା, ଲଣ୍ଡେଇହିଲ୍ ଅଞ୍ଚଳରେ ବୁଲୁଥିବା ପ୍ରମାଣ ମିଳିଛି। ବିଗତ କିଛିଦିନ ହେବ ଗୁଣ୍ଡିରିବାଡି ଓ ତେନ୍ତୁଳିଆ ଗ୍ରାମର କିଛି ଛେଳି ମରିବାକୁ ନେଇ ଲୋକେ ଆତଙ୍କିତ ହୋଇପଡିଛନ୍ତି। ସୋମବାର ରାତିରେ ଗୁଣ୍ଡିରିବାଡି ଗ୍ରାମବାସୀ ବାଘ ଗ୍ରାମକୁ ଆସିଥିବାର ଦାବି କରୁଛନ୍ତି। ବୁଧବାର ସକାଳେ ବନ ବିଭାଗ କର୍ମଚାରୀ ବାଘୁଣୀର ପାଦ ଚିହ୍ନକୁ ଲଣ୍ଡେଇହିଲ୍ରେ ଠାବ କରିଛନ୍ତି। ତେଣୁ ବାଘଟି ସେଠାରେ ହିଁ ଘୁରି ବୁଲୁଥିବା ଜଣାପଡିଛି। ତେଣୁ ଲୋକେ ଭୟଭୀତ ଅବସ୍ଥାରେ ଅଛନ୍ତି। ସନ୍ଧ୍ୟା ହେଲେ ମେଳି ହୋଇ ଯିବାଆସିବା କରୁଛନ୍ତି। ଜଙ୍ଗଲକୁ ଛେଳି ଚରାଇ ନେବାକୁ ମଧ୍ୟ ଭୟ କରୁଛନ୍ତି। ଲୋକଙ୍କ ଭୟ ଦୂର ପାଇଁ ବନ ବିଭାଗ କର୍ମଚାରୀ ବୁଧବାର ଗୁଣ୍ଡିରିବାଡି ଓ ତେନ୍ତୁଳିଆରେ ଡେରା ପକାଇଛନ୍ତି। ୨ ଗ୍ରାମରେ ବୁଧବାର ସନ୍ଧ୍ୟାରେ ଟ୍ରାପ୍ କ୍ୟାମେରା ଲଗାଯାଇଛି। ଏନେଇ ରେଞ୍ଜର ଉମାକାନ୍ତ ଦାସଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ, ଲୋକେ ଭୟଭୀତ ହୁଅନ୍ତୁ ନାହିଁ। ବନ ବିଭାଗ କର୍ମଚାରୀ ୨୪ ଘଣ୍ଟିଆ ଉକ୍ତ ଦୁଇ ଗ୍ରାମରେ ପାଟ୍ରୋଲିଂ କରୁଛନ୍ତି। ଏଥିସହ ବାଘର ଗତିବିଧି ଉପରେ ନଜର ରଖିଛନ୍ତି ବୋଲି କହିଥିଲେ।