ଚଣ୍ଡିଗଡ, ୨୬।୬:ବଳାତ୍କାର ମାମଲାରେ ଜେଲଦଣ୍ଡ ଭୋଗୁଥିବା ରାମ ରହିମ ୪୨ ଦିନ ପାରୋଲରେ ଯିବା ପାଇଁ ଆବେଦନ କରିବା ପରେ ହରିୟାଣାରେ ରାଜନୈତିକ ପାଣିପାଗ ଉଷ୍ମ ହୋଇଛି। ରାମ ରହିମଙ୍କୁ ହରିୟାଣା ସରକାର ସମର୍ଥନ କରୁଛନ୍ତି। ହାଇକୋର୍ଟ ତାଙ୍କ ଜାମିନ ଆବେଦନ ଖାରଜ କରିବା ପରେ ରାଜ୍ୟ ସରକାର ତାଙ୍କୁ ସମର୍ଥନ କରିବାକୁ ନେଇ ଏବେ ପ୍ରଶ୍ନ ଉଠିଛି। ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର କହିଛନ୍ତି, କିଛି ନ୍ୟାୟିକ ପଦ୍ଧତି ରହିଛି। ତାହା ଅନୁଯାୟୀ ଯଦି ଜଣେ ବ୍ୟକ୍ତିଙ୍କର ଜେଲରୁ ପାରୋଲରେ ଯିବାର ଅଧିକାର ଥାଏ, ତେବେ ସେ ଯାଇପାରିବେ। ରାମ ରହିମ ଜେଲରେ ଉତ୍ତମ ବ୍ୟବହାର ଦେଖାଇ ଥିବାରୁ ପାରୋଲ ତାଙ୍କର ଅଧିକାର ବୋଲି କ୍ୟାବିନେଟ ମନ୍ତ୍ରୀ ଅନିଲ ଭିଜ କହିଛନ୍ତି। ସୂଚନାଯୋଗ୍ୟ, ବଳାତ୍କାର ଘଟଣାରେ ରୋହତକର ସୁନାରିଆ ଜେଲରେ ଦଣ୍ଡାଦେଶ ଭୋଗୁଥିବା ରାମ ରହିମ କୃଷି କାର୍ଯ୍ୟ ପାଇଁ ୪୨ ଦିନ ପାଇଁ ପାରୋଲରେ ଯିବାକୁ ଚାହୁଁଛନ୍ତି। ସୁରକ୍ଷା ଦୃଷ୍ଟିକୋଣରୁ ହାଇକୋର୍ଟ ତାଙ୍କ ଜାମିନ ଆବେଦନକୁ ପୂର୍ବରୁ ଖାରଜ କରିଦେଇଥିଲେ।
