ଭୁବନେଶ୍ୱର, ୨୦।୭(କ୍ରୀଡ଼ା ପ୍ରତିନିଧି)-
ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ଆନୁକୂଲ୍ୟରେ ମେଣ୍ଢାଶାଳସ୍ଥିତ ଗୁରୂକୁଳ ରିସର୍ଟ ଟେନିସ କମ୍ପ୍ଲେକ୍ସରେ ଏଆଇଟିଏ-ଓଟିଏ ପୁରୁଷ ଟେନିସ ଟୁର୍ନାମେଣ୍ଟ ଶୁକ୍ରବାର ଶେଷ ହୋଇଛି। ଗତ ୧୫ ତାରିଖରୁ ଆରମ୍ଭ ହୋଇଥିବା ଏହି ପ୍ରତିଯୋଗିତାର ଉଭୟ ସିଙ୍ଗଲ୍ସ ଓ ଡବଲ୍ସରେ ଚାମ୍ପିୟନ ହୋଇ ଡବଲ ଟାଇଟଲ ହାସଲ କରିଛନ୍ତି ହରିୟାଣାର ଓମିନ୍ଦର ବୈସୋୟା। ସର୍ବଭାରତୀୟ ର଼୍ୟାଙ୍କ୍ର ୯୨ ନମ୍ବର ସ୍ଥାନରେ ଥିବା ଓମିନ୍ଦର ଏଠାରେ ୩ୟ ସିଡ୍ଭାବେ ଖେଳିଥିଲେ। ସିଙ୍ଗଲ୍ସ ଫାଇନାଲରେ ସେ ସର୍ବଭାରତୀୟ ର଼୍ୟାଙ୍କ୍ର ୮୯ତମ ସ୍ଥାନରେ ଥିବା ତଥା ଟପ୍ ସିଡ୍ ଦିଲ୍ଲୀର ଶୁଭମ୍ ମାଲହୋତ୍ରାଙ୍କୁ ୭-୫, ୬-୪ ସେଟ୍ରେ ପରାସ୍ତ କରିଥିଲେ। ଡବଲ୍ସରେ ମହାରାଷ୍ଟ୍ରର ମୈତ୍ରେୟ ଭଗତଙ୍କ ପାର୍ଟନର ହୋଇଥିଲେ ଓମିନ୍ଦର। ଏହି ଯୋଡ଼ି ଫାଇନାଲରେ ରାଜସ୍ଥାନର ଆୟୁଷ ଶର୍ମା ଓ ହରିୟାଣାର ମନଦୀପ ଯାଦବ ଯୋଡ଼ିଙ୍କୁ ୬-୪, ୬-୪ ସେଟ୍ରେ ହରାଇ ଟାଇଟଲ ହାସଲ କରିଥିଲେ। ଏହି ପ୍ରତିଯୋଗିତାରେ ପଶ୍ଚିମବଙ୍ଗ, ତାମିଲନାଡ଼ୁ, ତେଲେଙ୍ଗାନା, ଆନ୍ଧ୍ର ପ୍ରଦେଶ, ମହାରାଷ୍ଟ୍ର, ରାଜସ୍ଥାନ, ଛତିଶଗଡ଼, ଗୁଜରାଟ, ଉତ୍ତର ପ୍ରଦେଶ, ଦିଲ୍ଲୀ, ହରିୟାଣା, ବିହାର ଓ ଆୟୋଜକ ଓଡ଼ିଶା ଆଦି ୧୩ ରାଜ୍ୟର ୪୪ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଚାମ୍ପିୟନ୍ସ ଓ ରନର୍ସଅପ୍ ପ୍ରତିଯୋଗୀ ଯଥାକ୍ରମେ ୨୦ ଓ ୧୫ ର଼୍ୟାଙ୍କିଙ୍ଗ୍ ପଏଣ୍ଟ ପାଇବା ସହ ୧୨,୫୦୦ ଓ ୮,୪୦୦ ଟଙ୍କା ପୁରସ୍କାର ଆକାରରେ ପାଇଛନ୍ତି। ଡବଲ୍ସ ଚାମ୍ପିୟନ ଓ ରନର୍ସଅପ୍ ଯଥାକ୍ରମେ ୧୫ ଓ ୧୦ ର଼୍ୟାଙ୍କିଙ୍ଗ୍ ପଏଣ୍ଟ ପାଇଛନ୍ତି। ପୁରସ୍କାର ଆକାରରେ ଏମାନଙ୍କୁ ୬,୨୦୦ ଓ ୩,୮୦୦ଟଙ୍କା ମିଳିଛି। ଉଦ୍ଯାପନୀ ଉତ୍ସବରେ ଗୁରୁକୁଳ ରିସର୍ଟର ନିର୍ଦ୍ଦେଶକ ଚିନ୍ମୟ ପ୍ରଧାନ, ଟୁର୍ନାମେଣ୍ଟ ରେଫରି ଜତୀନ ବୈତ୍ସ୍ୟ, ଓଡ଼ିଶା ଟେବୁଲ ଟେନିସ ଆସୋସିଏଶନ ମ୍ୟାନେଜର ପ୍ରକାଶ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ। ଚିନ୍ମୟଙ୍କ ମା’ ଡକ୍ଟର ଜେ. ନାୟକ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ।