ଭୁବନେଶ୍ୱର,୧୯।୧୨(ବ୍ୟୁରୋ): ସ୍ଥାନୀୟ ଖାରବେଳ ନଗର ଥାନା ଅନ୍ତର୍ଗତ ୟୁନିଟ-୪ ଅଞ୍ଚଳରେ ଏକ ପୋଷା ବିଲେଇକୁ ଗୁଳି କରି ମାରି ଦିଆଯାଇଥିଲା। ଗୁରୁବାର ବିଲେଇର ମୃତଦେହ ବ୍ୟବଚ୍ଛେଦ କରାଯାଇଛି। ତା’ର ଦେହରୁ ୨ଟି ପେଲେଟ ବାହାରିଥିବା ସୂଚନା ମିଳିଛି।
ସୂଚନାଯୋଗ୍ୟ, ବୁଧବାର ପୂର୍ବାହ୍ନରେ ବିଲେଇ ମାଲିକ ସୁଶାନ୍ତ ପଟ୍ଟନାୟକଙ୍କ ମା’ ବିନୋଦିନୀ ପଟ୍ଟନାୟକ ଜୋର୍ରେ ଫୁଟିବା ଶବ୍ଦ ଶୁଣିଥିଲେ। ସେ ବାହାରକୁ ଆସି ରକ୍ତାକ୍ତ ଅବସ୍ଥାରେ ବିଲେଇଟି ପଡ଼ି ଛଟପଟ ହେଉଥିବା ଦେଖିବାକୁ ପାଇଥିଲେ। ଘଟଣା ସମ୍ପର୍କରେ ପିପୁଲ ଫର ଆନିମଲ(ପିଏଫ୍ଏ)ର ଅମୂଲ୍ୟ ନାୟକଙ୍କୁ ଜଣାଇଥିଲେ। ସେ ତାଙ୍କ ଟିମ୍ ସହ ପହଞ୍ଚି ଆହତ ବିଲେଇକୁ ଚିକିତ୍ସା ପାଇଁ ଓୟୁଏଟିକୁ ନେଇଥିଲେ। ହେଲେ ଚିକିତ୍ସା ଆରମ୍ଭ ହେବା ପୂର୍ବରୁ ବିଲେଇଟିର ମୃତ୍ୟୁ ଘଟିଥିଲା। ତେବେ ଏକ୍ସରେ ରିପୋର୍ଟରେ ବିଲେଇ ମୁଣ୍ଡ ଓ ଛାତିରେ ୨ଟି ପେଲେଟ ଥିବା ଜଣାପଡ଼ିବା ପରେ ତାକୁ ଗୁଳି କରାଯାଇଥିବା ସ୍ପଷ୍ଟ ହୋଇଥିଲା। ଏହାପରେ ଅମୂଲ୍ୟଙ୍କ ସହ ସୁଶାନ୍ତ ଥାନାକୁ ଯାଇ ଲିଖିତ ଅଭିଯୋଗ କରିଥିଲେ। ପଡ଼ୋଶୀ ସନ୍ତୋଷ ନାୟକଙ୍କ ପୁଅ ଆଶୁତୋଷ ଓରଫ ଆଶୁ ଏକ ଛର୍ରା ବନ୍ଧୁକରେ ବିଲେଇକୁ ଗୁଳି କରିଥିବା ସେ ଅଭିଯୋଗରେ ଦର୍ଶାଇଥିଲେ। ପରେ ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତଙ୍କୁ ଗିରଫ କରିଥିଲା।