ଆସିକା,୨୫ା୫(ଡି.ଏନ୍.ଏ.)- ସାଧାରଣ ନିର୍ବାଚନ ଭୋଟ ଗଣତି ପୂର୍ବ ରାତିରେ ଦୁର୍ବୃତ୍ତଙ୍କ ଆକ୍ରମଣ ଓ ଗୁଳିମାଡ଼ରେ ଗୁରୁତର ଆହତ ହୋଇଥିବା ଆସିକା କଂଗ୍ରେସ ବିଧାୟକ ପ୍ରାର୍ଥୀ ମନୋଜ ଜେନାଙ୍କ ମୃତ୍ୟୁ ଘଟିଛି। ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଗୁରୁବାର ବିଳମ୍ବିତ ରାତିରେ ତାଙ୍କର ମୃତ୍ୟୁ ଘଟିଥିଲା। ଶୁକ୍ରବାର ରାତି ପ୍ରାୟ ସାଢ଼େ ୯ଟାରେ ମନୋଜଙ୍କ ମୃତଦେହ ଚିନିଶିଳ୍ପ ନୂଆଗାଁସ୍ଥିତ ବାସଭବନରେ ପହଞ୍ଚିଥିଲା। ଶତାଧିକ ସାଥୀ ଓ ସମର୍ଥକ ଶେଷ ଦର୍ଶନ କରିବା ପରେ ମୃତଦେହକୁ ଶୋଭାଯାତ୍ରାରେ ନିଆଯାଇ ଋଷିକୂଲ୍ୟା ଓ ବଡ଼ନଦୀର ସଙ୍ଗମସ୍ଥଳ ବରଗାଁ ଶ୍ମଶାନରେ ଶେଷକୃତ୍ୟ ସମ୍ପନ୍ନ କରାଯାଇଛି।
ପ୍ରକାଶ ଯେ, ବୁଧବାର ରାତି ପ୍ରାୟ ୯ଟାରେ ମନୋଜ ତାଙ୍କ ସହଯୋଗୀ ଅନୀଲ ସ୍ବାଇଁଙ୍କ ସହ ଭୁବନେଶ୍ୱରରୁ କାର୍ରେ ଆସିକା ଫେରୁଥିଲେ। ବ୍ରହ୍ମପୁର ଲାଞ୍ଜିପଲ୍ଲୀ ୧୬ନଂ. ଜାତୀୟ ରାଜପଥ ଇସ୍କନ ମନ୍ଦିର ସମ୍ମୁଖରେ ୨ଟି ବାଇକ୍ରେ ଆସିଥିବା ୬ ଜଣ ଦୁର୍ବୃତ୍ତ ଅତର୍କିତ ଆକ୍ରମଣ କରିଥିଲେ। ସେମାନେ ମନୋଜଙ୍କୁ ଗୁଳିମାଡ଼ କରିବା ସହ ଗଳାକାଟି ଦେଇଥିଲେ। ମନୋଜଙ୍କ ସହ ଅନିଲ ମଧ୍ୟ ଗୁଳିମାଡ଼ର ଶିକାର ହୋଇଥିଲେ ା କାର ଡ୍ରାଇଭର ସୁଶାନ୍ତ କୁମାର ସ୍ବାଇଁ ଗୁରୁତର ଅବସ୍ଥାରେ ମନୋଜ ଓ ଅନୀଲଙ୍କୁ ତୁରନ୍ତ ବ୍ରହ୍ମପୁର ବଡ ମେଡିକାଲକୁ ନେଇ ଆସିଥିଲେ। ମନୋଜଙ୍କ ଅବସ୍ଥା ସଙ୍କଟାପନ୍ନ ଥିବାରୁ ଭୁବନେଶ୍ୱରର ଏକ ଘରୋଇ ଡାକ୍ତରଖାନାକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ଅପରାଧୀମାନେ ଅପରାଧ ଘଟାଇବା ପରେ ଆନ୍ଧ୍ରପ୍ରଦେଶ ଅଭିମୁଖେ ବାଇକରେ ଚମ୍ପଟ ମାରୁଥିବା ବେଳେ ଗୋଳନ୍ଥରା ନିକଟରେ ରାସ୍ତା ଅତିକ୍ରମ କରୁଥିବା ଦୁଇଜଣ ଛାତ୍ରଙ୍କୁ ଧକ୍କା ଦେଇଥିଲେ। ଧରା ପଡ଼ିଯିବା ଭୟରେ ଦୁର୍ବୃତ୍ତମାନେ ବାଇକ ଛାଡ଼ି ଚମ୍ପଟ ମାରୁଥିବା ବେଳେ ସେମାନେ ଧରିଥିବା ଏକ ବନ୍ଧୁକ ମଧ୍ୟ ଖସି ପଡ଼ିଥିଲା। ପୋଲିସ ଉକ୍ତ ବାଇକକୁ ଯାଞ୍ଚ କରି ତଦନ୍ତ ଚଳାଇଛି। ଏଥିସହ ମନୋଜ, ଡ୍ରାଇଭର ସୁଶାନ୍ତ ଓ ଆହତ ଅନିଲଙ୍କ ମୋବାଇଲ ଫୋନକୁ ପୋଲିସ ଜବତ କରି ଟ୍ରାକିଂ କରୁଥିବା ଜଣାପଡ଼ିଛି। ୨୦୧୦ରୁ ଆସିକା ଲୋକ ସଭା ନିର୍ବାଚନ ମଣ୍ଡଳୀ ଯୁବ କଂଗ୍ରେସର ସଭାପତି ଦାୟିତ୍ୱ ଗ୍ରହଣ କରି ମନୋଜ କଂଗ୍ରେସ ଦଳୀୟ ସଙ୍ଗଠନରେ ସାମିଲ ହୋଇଥିଲେ ା ରାଜ୍ୟ କଂଗ୍ରେସର ଅନ୍ୟତମ ସମ୍ପାଦକ ଭାବେ ମଧ୍ୟ ଦାୟିତ୍ୱ ଗ୍ରହଣ କରିଥିଲେ ା ବିଧାୟକ ଆସନରେ ପ୍ରତିଦ୍ୱନ୍ଦିତା କରିବା ପରେ ତାଙ୍କୁ ରାଜନୌତିକ ଶତ୍ରୁତା ନା ଅନ୍ୟ କେଉଁ କାରଣରୁ ହତ୍ୟା କରାଯାଇଛି ତାହା ସ୍ପଷ୍ଟ ହୋଇନାହିଁ। ଗୁରୁବାରଠାରୁ ଆସିକାର ବିଜୁ ପଟ୍ଟନାୟକ ଛକ, ବସଷ୍ଟାଣ୍ଡ, ଚିନିଶିଳ୍ପ ଛକ, ନୂଆଗାଁ, କଲେଜ ଛକ ଆଦି ଅଞ୍ଚଳରେ ପୋଲିସ ମୁତୟନ କରାଯାଇଛି।