ଲୀଡ୍ସ, ୫।୭-ଓ୍ବେଷ୍ଟଇଣ୍ଡିଜ ଓପନର କ୍ରିସ ଗେଲ୍ଙ୍କ ବିଶ୍ୱକପ ଅଭିଯାନ ନୈରାଶ୍ୟର ସହ ଶେଷ ହୋଇଛି। ପ୍ରତିଯୋଗିତାରେ ଆଶାନୁରୂପ ପ୍ରଦର୍ଶନ କରି ନ ପାରି ଓ୍ବେଷ୍ଟଇଣ୍ଡିଜ ଲିଗ୍ ପର୍ଯ୍ୟାୟରୁ ବିଦାୟ ନେଇଛି। ଫଳରେ ଏହି ମେଗା ଇଭେଣ୍ଟରେ ବିସ୍ଫୋରକ ଓପନରଙ୍କ ଖେଳ ମଧ୍ୟ ସମାପ୍ତ ହୋଇଛି। କାରଣ ବିଶ୍ୱକପ ପରେ ଭାରତ ବିପକ୍ଷ ସିରିଜ ଖେଳି ଅନ୍ତର୍ଜାତୀୟ କ୍ରିକେଟରୁ ଅବସର ନେବେବୋଲି ଗେଲ୍ ପୂର୍ବରୁ ଘୋଷଣା କରି ସାରିଛନ୍ତି। ଗତ ମେ ୩୧ରେ ପାକିସ୍ତାନ ବିପକ୍ଷ ମ୍ୟାଚରେ ୩୪ ବଲରୁ ୫୦ ରନର ଇନିଂସ ଖେଳି ଅଭିଯାନ ଆରମ୍ଭ କରିଥିବା ଗେଲ୍ ଜୁନ ୬ରେ ଅଷ୍ଟ୍ରେଲିଆ ବିପକ୍ଷରେ ୧୭ ବଲରୁ ୨୧ ରନକରି ଆଉଟ ହୋଇଥିଲେ। ଜୁନ ୧୦ରେ ଦକ୍ଷିଣଆଫ୍ରିକା ବିପକ୍ଷ ମ୍ୟାଚ ବର୍ଷାଯୋଗୁ ଅଧାରୁ ବନ୍ଦ ହୋଇଯିବାରୁ ଗେଲ୍ ବ୍ୟାଟିଂ ସୁଯୋଗ ପାଇ ନ ଥିଲେ। ଜୁନ ୧୪ରେ ଓ୍ବେଷ୍ଟଇଣ୍ଡିଜ ବିପକ୍ଷ ମ୍ୟାଚରେ ୪୧ ବଲରୁ ୩୬ ରନ କରିଥିବାବେଳେ ୧୭ରେ ବାଂଲାଦେଶ ବିପକ୍ଷରେ ୧୩ ବଲ ଖେଳିଥିଲେହେଁ ଖାତା ଖୋଲିପାରି ନ ଥିଲେ। ଜୁନ ୨୨ରେ ନ୍ୟୁଜିଲାଣ୍ଡ ବିପକ୍ଷରେ ୮୪ ବଲରୁ ୮୭ ରନକରି ସେ ସଫଳ ପ୍ରତ୍ୟାବର୍ତ୍ତନ କରିଥିଲେ। ଏହି ମ୍ୟାଚରେ ୨ ଓଭରରେ ୮ ରନ ଦେଇ ସେ ଗୋଟିଏ ଉଇକେଟ ମଧ୍ୟ ନେଇଥିଲେ। ୨୭ ତାରିଖରେ ପରବର୍ତ୍ତୀ ମ୍ୟାଚରେ ସେ ଭାରତ ବିପକ୍ଷରେ ମାତ୍ର ୬(୧୯ ବଲ) ରନ କରିବାକୁ ସକ୍ଷମ ହୋଇଥିବାବେଳେ ଜୁଲାଇ ୧ରେ ଶ୍ରୀଲଙ୍କା ବିପକ୍ଷରେ ୪୮ ବଲରୁ ୩୫ ରନ ସ୍କୋର କରିଥିଲେ। ଜୁଲାଇ ୪ରେ ନିଜର ଶେଷ ବିଶ୍ୱକପ ମ୍ୟାଚରେ ସେ ଦୁର୍ବଳ ପ୍ରତିଦ୍ୱନ୍ଦ୍ୱୀ ଆଫଗାନିସ୍ତାନ ବିପକ୍ଷରେ ୧୮ ବଲ ଖେଳିଥିଲେ ହେଁ ମାତ୍ର
୭ ରନ କରିବାକୁ ସକ୍ଷମ ହେଇଥିଲେ। ୧୯୭୯ ସେପ୍ଟେମ୍ବର ୨୧ରେ ଜାମାଇକାରରେ ଜନ୍ମିତ ଗେଲ୍ କ୍ୟାରିୟରରେ ୨୯୮ଟି ଦିନିକିଆ ଖେଳି ୩୫.୫୩ ଆଭରେଜରେ ୫୯୦୫ ରନ ସ୍କୋର କରିଛନ୍ତି।
