ନୂଆଦିଲ୍ଲୀ,୧୮।୩: ସୁପ୍ରିମ୍କୋର୍ଟର ପୂର୍ବତନ ପ୍ରଧାନ ବିଚାରପତି ରଞ୍ଜନ ଗୋଗୋଇଙ୍କୁ ରାଷ୍ଟ୍ରପତି ରାମନାଥ କୋବିନ୍ଦ ରାଜ୍ୟ ସଭା ସଦସ୍ୟ ଭାବେ ମନୋନୀତ କରିଛନ୍ତି। ଗୋଗୋଇଙ୍କ ରାଜ୍ୟ ସଭା ସଦସ୍ୟତା ନେଇ ନାନା ଆରୋପ-ପ୍ରତ୍ୟାରୋପ ଜାରି ରହିଛି। ଏନେଇ କଂଗ୍ରେସ ପକ୍ଷରୁ କପିଲ୍ ଶିବଲ୍ ବୁଧବାର ଟୁଇଟ୍ କରି ଗୋଗୋଇଙ୍କୁ ୫ଟି ପ୍ରଶ୍ନ ପଚାରିଛନ୍ତି। ଏବେ ଏହାକୁ ନେଇ ସୋସିଆଲ୍ ମିଡ଼ିଆ ସରଗରମ ହେବାରେ ଲାଗିଛି। ଶିବଲ୍ ପଚାରିଛନ୍ତି ନିଜ ମାମଲାରେ ଗୋଗୋଇ ଫଇସଲା କାହିଁକି ନିଜେ ନେଇଛନ୍ତି? ଲଫାପା ବନ୍ଦ ନ୍ୟାୟିକ ପ୍ରଣାଳୀ କାହିଁିକି?, ନିର୍ବାଚିତ ବୋର୍ଡର ନିଷ୍ପତ୍ତି କାହିଁକି ଗ୍ରହଣ କରାଗଲାନି?, ରାଫାଲ ମାମଲାରେ କାହିଁକି କ୍ଲିନ୍ ଚିଟ୍ ଦିଆଗଲା? ସିବିଆଇ ନିର୍ଦ୍ଦେଶକଙ୍କୁ କାହିଁକି ହଟାଗଲା?। ତେବେ ଗୋଗୋଇ ଶପଥ ନେବା ପରେ ସମସ୍ତ ପ୍ରଶ୍ନର ଉତ୍ତର ଦେବେ ବୋଲି କହିଛନ୍ତି। ସୂଚନାଯୋଗ୍ୟ, ଅବସର ଗ୍ରହଣପରେ ପୁଣି ବିଭିନ୍ନ ପଦବୀ ଗ୍ରହଣ କରିବାକୁ ନିନ୍ଦନୀୟ ଘଟଣା ବୋଲି ପ୍ରଧାନ ବିଚାରପତି ଭାବେ କାର୍ଯ୍ୟ କରୁଥିବା ସମୟରେ ଗୋଗୋଇ କହିଥିଲେ। ମାତ୍ର ଏବେ ସେ ଏଭଳି କରୁଥିବାରୁ ବିଭିନ୍ନ ମହଲରୁ ତାଙ୍କୁ ବିରୋଧ କରାଯାଉଛି।