ଜୈସପୁର,୨୧।୫: ଛତିଶଗଡ଼ର ଜୈସପୁର ଜିଲାର ବ।ଘଡୋଲରେ ଏକ ନିଆରା ବିବାହ ଦେଖିବାକୁ ମିଳିଛି। ଉକ୍ତ ଗାଁର ଜଣେ ସିଆରପିଏଫ୍ ଯବାନ ୨ଜଣ ମହିଳାଙ୍କ ସହ ଏକା ସାଙ୍ଗରେ ବିବାହ କରିଥିବା ଜଣାପଡ଼ିଛି। ଏକା ସାଙ୍ଗରେ ବିବାହ ମଣ୍ଡପରେ ଜଣେ ତାଙ୍କର ଗର୍ଲଫ୍ରେଣ୍ଡ ଓ ଅନ୍ୟଜଣକ ପୂର୍ବରୁ ବିବାହିତା ପତ୍ନୀ ରହିଛନ୍ତି। ଅର୍ଥାତ୍ ଯବାନ ଜଣଙ୍କ ନିଜ ପତ୍ନୀଙ୍କୁ ଦ୍ୱିତୀୟ ଥର ବିବାହ କରିଥିବା ଜଣାପଡ଼ିଛି। ଅନିନ ପାଇକରା ନିଜ ପତ୍ନୀ ଓ ଗର୍ଲଫ୍ରେଣ୍ଡଙ୍କୁ ପୁରା ରୀତିନୀତିରେ ବିବାହ କରିଥିଲେ। ଏହି ବିବାହକୁ ନେଇ ଆଖପାଖ ଅଞ୍ଚଳର ଲୋକେ ଆଶ୍ଚର୍ଯ୍ୟ ହେବା ସହ ସମାଲୋଚନା ମଧ୍ୟ କରିଥିଲେ। ସୂଚନାଯୋଗ୍ୟ, ଅନିନଙ୍କ ବିବାହ ଗତ ୪ ବର୍ଷରୁ ହୋଇସାରିଛି। କିନ୍ତୁ ଏହାରି ଭିତରେ ଜଣେ ଅଙ୍ଗନଓ୍ବାଡି କର୍ମୀଙ୍କ ସହ ତାଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା ବୋଲି ଚର୍ଚ୍ଚା ହେଉଛି। ଅପରପକ୍ଷରେ ଏହି ବିବାହର ପଛରେ ଅନ୍ୟ କାରଣ ଦର୍ଶାଇଛନ୍ତି ଅନିନ। ସେ କହିଛନ୍ତି, ପ୍ରଥମ ବିବାହରୁ ତାଙ୍କୁ କୌଣସି ସନ୍ତାନ ହୋଇ ନ ଥିବାରୁ ସେ ଦ୍ୱିତୀୟ ବିବାହ କରିଛନ୍ତି। ଆଉ ଏଥିପାଇଁ ତାଙ୍କ ପ୍ରଥମ ପତ୍ନୀ ମଧ୍ୟ ସହମତି ଥିବା ସେ କହିଛନ୍ତି। ଅପରପକ୍ଷରେ ନିୟମ ଅନୁସାରେ, ସରକାରୀ କର୍ମଚାରୀଙ୍କ ପାଇଁ ବିବାହିତା ରହି ଦ୍ୱୀତିୟ ବିବାହ କରିବା ମିସ୍କଣ୍ଡକ୍ଟ ବୋଲି କୁହାଯାଇଥାଏ। ନିୟମ ଅନୁସାରେ ଏକା ସାଙ୍ଗରେ ଦୁଇ ଜଣ ସ୍ତ୍ରୀଙ୍କ ସହ ଯବାନ ରହି ପାରିବେନି। କାରଣ ଯବାନଙ୍କ ପାଇଁ ଏହା ସମସ୍ୟାର କାରଣ ହୋଇପାରେ ବୋଲି ସିଆରପିଏଫ୍ର ପ୍ରବକ୍ତା ବିସି ପାତ୍ର କହିଛନ୍ତି।