ଗୋଟିଏ ହସ୍ପିଟାଲରେ ଭର୍ତ୍ତି ଥାଇ ବି ଶେଷ ସମୟରେ ବାପାଙ୍କୁ ଭେଟିପାରିଲେନି ପୁଅ
41 ଥିରୁଭାନନ୍ତପୁରମ,୧୪।୩: ସାରା ବିଶ୍ୱରେ କରୋନା ଭାଇରସ୍ କାୟା ବିସ୍ତାର କରିଚାଲିଛି। ଦିନକୁ ଦିନ ଭାରତରେ କରୋନା ମାମଲା ବୃଦ୍ଧି ପାଇଥିବା ବେଳେ ସଂକ୍ରମିତ ସଂଖ୍ୟା ୮୬ ଓ ୧୧୪ ସନ୍ଦିଗ୍ଧଙ୍କୁ ଚିହ୍ନଟ କରାଯାଇଛି। ସଂକ୍ରମିତଙ୍କ ମଧ୍ୟରୁ ୨ଜଣଙ୍କର ମୃତ୍ୟୁ ହୋଇଥିବା ଜଣାପଡ଼ିଛି। କରୋନା ଏବେ ଏତେ ଭୟଙ୍କର ହୋଇଯାଇଛି ଯେ, ଲୋକମାନେ ନିଜ ପରିବାରଠାରୁ ମଧ୍ୟ ଦୂରେଇ ଯାଉଛନ୍ତି। କରୋନା ଯୋଗୁ କେତେକ ଲୋକ ବିଭିନ୍ନ ସ୍ଥାନରେ ଫସି ରହିଥିବାରୁ ନିଜ ଲୋକଙ୍କୁ ଭେଟି ମଧ୍ୟ ପାରୁ ନାହାନ୍ତି। ଏଭଳି ସ୍ଥିତିରେ କେରଳରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ସୂଚନାଯୋଗ୍ୟ, କେରଳ ଇଡୁକିର ଥୋଡୁପୁଝା ନିକଟସ୍ଥ ଅଲେକୋଡ ଗାଁର ଜଣେ ବ୍ୟକ୍ତି ନିଜ ବାପାଙ୍କ ଅନ୍ତିମ ସଂସ୍କାରରେ ସାମିଲ ହୋଇପାରିନଥିଲେ। ଏନେଇ ସେ ଫେସ୍ବୁକ୍ରେ ନିଜର ଦୁଃଖ ପ୍ରକାଶ କରିଛନ୍ତି। ଉକ୍ତ ବ୍ୟକ୍ତି ଇଟାଲିର କତାରରେ ଥିବା ଏକ ଘରୋଇ ଫାର୍ମରେ କାର୍ଯ୍ୟ କରୁଥିବା ବେଳେ ମାର୍ଚ୍ଚ ୭ରେ ବାପାଙ୍କ ଅସୁସ୍ଥତା ନେଇ ଖବର ପାଇଥିଲେ। ଏହାପରେ ସେ ତୁରନ୍ତ କତାରରୁ କେରଳ ଅଭିମୁଖେ ବାହାରିଥିଲେ। ବିମାନବନ୍ଦରରେ ପହଞ୍ଚିବା ପରେ ତାଙ୍କୁ ସ୍କ୍ରିନିଂ କରାଯାଇଥିଲା। ହେଲେ ତାଙ୍କଠାରେ କରୋନା ସମ୍ବନ୍ଧୀୟ କୌଣସି ଲକ୍ଷଣ ନ ମିଳିବାରୁ ତାଙ୍କୁ ଘରକୁ ଯିବା ପାଇଁ ଅନୁମତି ମିଳିଥିଲା। କୋଟୟାମ ଯିବା ପରେ ତାଙ୍କୁ ଅସୁସ୍ଥ ଅନୁଭବ ହୋଇଥିଲା। ସୁରକ୍ଷା ଦୃଷ୍ଟିରୁ ସେ କୋଟୟାମ ମେଡିକାଲ କଲେଜ୍ରେ ଥିବା କରୋନା ସେଲ୍ରେ ନିଜର ଯାଞ୍ଚ କରାଇଥିଲେ। ଯେହେତୁ କତାରର ବିଭିନ୍ନ ସ୍ଥାନ କରୋନା ଭାଇରସ୍ ସଂକ୍ରମିତ ହୋଇଛି। ତେଣୁ ଆଗୁଆ ସତର୍କତା ଯୋଗୁ ଉକ୍ତ ବ୍ୟକ୍ତିଙ୍କୁ ଆଇସୋଲେଶନ୍ ଓ୍ବାର୍ଡରେ ଭର୍ତ୍ତି କରାଯାଇଥିଲା। ସେଠାରେ ୯ଦିନ ବିତାଇବା ପରେ ତାଙ୍କୁ ଅଚାନକ ବାପାଙ୍କ ମୃତ୍ୟୁ ଖବର ମିଳିଥିଲା। ଯଦିଓ ଗୋଟିଏ ହସ୍ପିଟାଲରେ ବାପା ଓ ପୁଅ ଭର୍ତ୍ତି ହୋଇଥିଲେ, କିନ୍ତୁ ଆଇସୋଲେଟେଡ୍ ପ୍ରୋଟୋକଲ ଯୋଗୁ ଦୁହେଁ ଦୁହିଁଙ୍କୁ ଭେଟି ପାରି ନ ଥିଲେ। ପରଦିନ ହସ୍ପିଟାଲର ମୃତଦେହ ବ୍ୟବଚ୍ଛେଦ ଗୃହକୁ ବାପାଙ୍କ ମୃତଦେହକୁ ଅଣାଯାଇଥିଲା। ଉକ୍ତ ବ୍ୟକ୍ତି ଆଇସୋଲେଶନ୍ ଓ୍ବାର୍ଡର ଝରକାରୁ ବାପାଙ୍କୁ ଅନ୍ତିମ ଦର୍ଶନ କରିଥିଲେ। ଯଦି ସ୍ବେଚ୍ଛାକୃତ ଭାବେ କରୋନା ସେଲ୍ରେ ଭର୍ତ୍ତି ହୋଇ ନ ଥାନ୍ତେ ତେବେ ସେ ବାପାଙ୍କୁ ଦେଖିପାରିଥାନ୍ତେ ବୋଲି ବ୍ୟକ୍ତି ଜଣଙ୍କ ଦୁଃଖ ପ୍ରକାଶ କରି କହିଛନ୍ତି। ସେ ଆହୁରି ମଧ୍ୟ କହିଛନ୍ତି, ଯଦି ସତକର୍ତା ଅବଲମ୍ବନ ନ କରିଥାନ୍ତେ ତେବେ ସବୁଦିନ ପାଇଁ ପରିବାରଠାରୁ ଦୂରେଇ ଯାଇଥାନ୍ତେ। ତାଙ୍କର ଏହି ବଳିଦାନ ଓ ସାହସକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।