ଖଣ୍ଡପଡ଼ା,୯ା୩(ସ୍ବ.ପ୍ର.): ଖଣ୍ଡପଡା ବ୍ଲକ କଣ୍ଟିଲୋ ନିକଟ ପଥରଚକଡା ତଳସାହି ଓ ବଡସାହି ଗୋପାଳ ସମାଜ ପକ୍ଷରୁ ବନ୍ଦାଣ ଉତ୍ସବ ପାଳନ କରାଯାଇଛି । ସମାଜର ବେହେରା କଣ୍ଡୁରୀ ଚରଣ ପ୍ରଧାନଙ୍କ ତତ୍ତ୍ୱାବଧାନରେ ଏହା ଆୟୋଜନ କରାଯାଇଥିଲା। ଅଧିବାସ ଉପଲକ୍ଷେ ଗ୍ରାମର ସମସ୍ତ ଗୋପାଳ ନିଜ ଗୋରୁଙ୍କୁ ଅଁଳା, ବାହାଡା, ହଳଦୀ ଓ ଘିଅ ଲଗାଇ ନଦୀରେ ସ୍ନାନ କରାଇଥିଲେ। ଅପରାହ୍ନ ପ୍ରାୟ ସାଢେ ୫ଟାରେ ଗୋପାଳମାନେ ନିକଟସ୍ଥ ମହାନଦୀ ଘାଟରେ କୁମ୍ଭ ପୂଜାର୍ଚ୍ଚନା କରି ସମାଜର ନିଷ୍ପତ୍ତିକ୍ରମେ ୧୦ଜଣ କମିଟି ସଦସ୍ୟ ନାରାୟଣୀ ପୀଠରେ ରାତ୍ର ପ୍ରାୟ ସାଢେ ୧୨ଟାରେ କୋଠ ଭୋଗ ପ୍ରସ୍ତୁତ କରିଥିଲେ ା ସୋମବାର ଦୋଳ ପୂର୍ଣ୍ଣମୀ ଅବସରରେ ଗୋରୁଙ୍କ ମଳ ଓ ଲାଞ୍ଜରୁ କିଛି ଚୁଟିକାଟି ନଦୀରେ ବିସର୍ଜନ କରିଥିଲେ ା ପରେ ସ୍ନାନ କରି ଆସି ଗୋରୁଙ୍କୁ କଜ୍ଜ୍ୱଳ ଲଗାଇ ମୁଣ୍ଡରେ ଫଗୁ ବୋଳିଥିଲେ ା ନାରାୟଣୀ ପୀଠରେ ପ୍ରସ୍ତୁତ ହୋଇଥିବା କୋଠ ଭୋଗକୁ ଗ୍ରାମବାସୀ ସେବନ କରିଥିଲେ ା ଅପରାହ୍ନ ପ୍ରାୟ ଗୋଟାଏ ସମୟରେ ଗ୍ରାମର ଗୋପାଳମାନେ କଳସରେ ରଖିଥିବା ଜଳ ମିଶ୍ରିତ କ୍ଷୀରକୁ ନୂତନ ବସ୍ତ୍ର ଦ୍ୱାରା ଆଚ୍ଛାଦନ କରି ବାହୁଙ୍ଗିରେ ଧରି ନୀଳମାଧବ ଜୀଉଙ୍କ ପାଖକୁ ଯାଇ ପୂଜାର୍ଚ୍ଚନା କରିଥିଲେ। ପରେ ସେମାନେ ପାଟପଟୁଆରରେ ନନ୍ଦ, ଯଶୋଦା, କୃଷ୍ଣ, ବଳରାମ ବେଶରେ ସଜ୍ଜିତ ହୋଇଥିବା ଲଉଡି ଖେଳ ସହ ଗ୍ରାମ ପରିକ୍ରମା କରିଥିଲେ।