ନିରାକାରପୁର,୩୦ା୫(ଡି.ଏନ୍.ଏ.)- ଗୋ ସମ୍ପଦର ବିକାଶ ନିମନ୍ତେ ସରକାର ଅନେକ ଯୋଜନା ପ୍ରଣୟନ କରିଛନ୍ତି। ତେବେ ବାତ୍ୟା ପରେ ଗୋ ବଂଶ ବୃଦ୍ଧି ପ୍ରତି ବିପଦ ସୃଷ୍ଟି ହୋଇଛି। ଏଭଳି ପରିସ୍ଥିତି ଗୋପାଳକଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ଖୋର୍ଦ୍ଧା ଜିଲା ଡିଆ ପଞ୍ଚାୟତ ବାଲିଗାଁ(କପିଳେଶ୍ୱରପୁର)ଗ୍ରାମରେ ଏବେ ଗୋ ମଡ଼କ ଦେଖିବାକୁ ମିଳିଛି। ୫ରୁ ଊର୍ଦ୍ଧ୍ୱ ଗୋରୁ ଓ ବାଛୁରିଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଏଥିସହ ୬୦ରୁ ଊର୍ଦ୍ଧ୍ୱ ଗୋରୁ ରୋଗାକ୍ରାନ୍ତ ହୋଇଥିବାରୁ ଚିକିତ୍ସା କରାଯାଉଛି। ହେଲେ ଗୋରୁ ମୃତ୍ୟୁର କାରଣ ଅସ୍ପଷ୍ଟ ରହିଛି। ମଙ୍ଗଳବାର ଏକ ଭ୍ରାମ୍ୟମାଣ ପ୍ରାଣୀ ଚିକିତ୍ସକ ଟିମ୍ ଗ୍ରାମର ଘରକୁ ଘର ବୁଲି ଗାଈ, ବାଛୁରିଙ୍କ ଚିକିତ୍ସା କରିଥିଲେ। ୫ ଗୋରୁଙ୍କ ଗୋବର ପରୀକ୍ଷା ପରେ ଏମାନେ କୃମିରୋଗରେ ଆକ୍ରାନ୍ତ ହୋଇଥିବା କୁହାଯାଉଛି।
ଏହି ପରିସ୍ଥିତିରେ ଚାଷୀ ବବ୍ରୁବାହନ ଜେନା କୁହନ୍ତି, ମୋର ଗୋଟିଏ ଗାଈ, ୨ଟି ଛଡ଼ା ଓ ଗୋଟିଏ ବାଛୁରି ଅଛି। ମୁଁ କ୍ଷୀର ଓ ଦହି ବିକି ପରିବାର ପୋଷଣ କରେ। ବାତ୍ୟାରେ ଗୋରୁମାନଙ୍କ ପାଇଁ ସରକାରୀ ସାହାଯ୍ୟ ମିଳିନାହଁି। ଖାଦ୍ୟାଭାବ, ରୌଦ୍ରତାପ ଯୋଗୁ ଗୋରୁମାନଙ୍କ ପତଳା ଝାଡ଼ା ହେଉଛି। ଏ ପରିସ୍ଥିତିରେ କ’ଣ କରିବି ମୋତେ କିଛି ବୁଦ୍ଧି ଦେଖାଯାଉନି। ସେହିପରି ଗଁାର ଶଶାଙ୍କ ଜେନା କହିଥିଲେ, ଆମର ଗୋଟିଏ ଜର୍ସି ବାଛୁରି ଥିଲା। ମୁଁହରୁ ଝାଳ ବାହାରି ଗଳା ଫୁଲିଗଲା। ଏହାର ୪ ରୁ ୫ ଘଣ୍ଟା ପରେ ଛଟପଟ ହୋଇ ବାଛୁରିଟି ମରିଗଲା। ଗଁାର ଗୋବିନ୍ଦ ମହାପାତ୍ର କହିଥିଲେ, ବାତ୍ୟାର ଏତେଦିନ ପରେ ମଧ୍ୟ ଗୋ ଖାଦ୍ୟ ମିଳିନାହିଁ ଏବଂ ଅସ୍ବାସ୍ଥ୍ୟକର ପରିବେଶ ମଧ୍ୟରେ ଗାଈ ଓ ବାଛୁରି ରହୁଛନ୍ତି। ଗ୍ରାମର ଗୋ ମଡ଼କ ସ୍ଥିତି ଅନୁଧ୍ୟାନ ନିମନ୍ତେ ଭ୍ରାମ୍ୟମାଣ ପ୍ରାଣୀ ଚିକିତ୍ସା ଗାଡ଼ିରେ ଆସିଥିବା ମେଡିକାଲ ଟିମ୍ର ପ୍ରାଣୀ ଚିକିତ୍ସିକ ଦୀପ୍ତି ପଟ୍ଟନାୟକ କହିଥିଲେ, ଆମେ ଖବରପାଇ ଗ୍ରାମରେ ପହଞ୍ଚତ୍ ୬୦ ଗୋରୁଙ୍କ ଚିକିତ୍ସା ବ୍ୟବସ୍ଥା କରିଛୁ। ଭୋକ ଓ ହଜମ ପାଇଁ ମଲ୍ଟି ଭିଟାମିନ୍ ପାଉଡର ଦେଇଛୁ। ଝାଡା, କାଶ ଓ ଥଣ୍ଡା ପାଇଁ ଔଷଧ ବଣ୍ଟନ କରାଯାଇଛି। ପ୍ରାଣୀ ଚିକିତ୍ସକ ଭକ୍ତ ଚରଣ ଦଳେଇ କହିଥିଲେ ଯେ, ଆମେ ୭ ଦିନ ପୂର୍ବରୁ ଗଁାରେ ପହଞ୍ଚତ୍ ବଜବଜିଆ ରୋଗର ଭାକ୍ସିନ ଏବଂ କୃମିନାଶକ ଔଷଧ ଦେଇଛୁ। ତେବେ କେତେକ ଔଷଧ ଯୋଗାଣ ନ ଥିବାରୁ ଗୋରୁମାନଙ୍କ ରକ୍ତ ନମୁନା ସଂଗ୍ରହ କରିପାରିନୁ। ଅତିଶୀଘ୍ର ରକ୍ତ ନମୁନା ସଂଗ୍ରହ କରି ଫୁଲନଖରାଠାରେ ଥିବା ପ୍ରାଣୀ ରୋଗ ଗବେଷଣା କେନ୍ଦ୍ରକୁ ପଠାଯିବା ପରେ କେଉଁ କାରଣରୁ ଏବଂ କି ପ୍ରକାର ରୋଗ ହେଉଛି ତାହା ଜାଣି ଚିକିତ୍ସା କରାଯିବ। ବିଭିନ୍ନ କାରଣରୁ ପ୍ରାୟ ୮ ରୁ ୯ ମାସର ଗୋରୁଙ୍କ ମୃତ୍ୟୁ ହୋଇଥିବା ନେଇ ସେ ସୂଚନା ଦେଇଥିଲେ।