ନୂଆଦିଲ୍ଲୀ: ବିଲେଇ ପୁଣି ଗୋଲ୍ କିପିଂ କିରପାରେ! ଏକଥା ଅନେକଙ୍କୁ ବିସ୍ମିତ କରିବା ସ୍ବାଭାବିକ। ହେଲେ ବିଲେଇର ଗୋଲ୍ କିପିଂ ଦକ୍ଷତାକୁ ଲୋକେ ଏବେ ସୋସିଆଲ୍ ମିଡିଆରେ ଦେଖି ଆଶ୍ଚର୍ଯ୍ୟ ହୋଇଯାଇଛନ୍ତି। କ୍ରୀସ୍ ଡିକ୍ସନ ନାମକ ଜଣେ ୟୁଟ୍ୟୁବର ନିଜର ଏକ ଭିଡିଓ ଶେୟାର କରି ଏହା ଜଣାଇଛନ୍ତି। ଡିକ୍ସନ ଫୁଟବଲ୍ ଖେଳୁଥିବା ବେଳର ଏକ ଭିଡିିଓ ଶେୟାର କରିଛନ୍ତି, ଯେଉଁଥିରେ ତାଙ୍କ ପୋଷା ବିଲେଇ ଗୋଲ୍ କିପିଂ କରୁଛି। ଡିକ୍ସନ୍ ବାରମ୍ବାର ବଲ୍ଟିକୁ ଗୋଲ୍ପୋଷ୍ଟ ଭିତରକୁ ପହଞ୍ଚାଇବା ପାଇଁ ଚେଷ୍ଟା କରୁଥିବା ବେଳେ ବିଲେଇଟି ସୁନ୍ଦର ଭାବରେ ଅଟକାଇ ପାରୁଛି। ବିଲେଇର ଏଭଳି ଦକ୍ଷତାକୁ ଦେଖିବା ପାଇଁ ଖୁବ୍ ମଜା ଲାଗୁଛି। ଏମିତିକି ଶେଷ ପର୍ଯ୍ୟନ୍ତ ବିଲେଇଟି ଡିକ୍ସନଙ୍କୁ ଗୋଲ୍ ସ୍କୋର କରିବାର ସୁଯୋଗ ଦେଉନାହିଁ। ସେଥିପାଇଁ ଏବେ ଏହି ଭିଡ଼ିଓଟି ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି। ଏହି ଭିଡ଼ିଓଟି ସୋସିଆଲ୍ ମିଡିଆରେ ଶେୟାର କରିବାର ମାତ୍ର ଦିନକ ପରେ ୩.୭ ମିଲିୟନ୍ରୁ ଅଧିକ ଲୋକ ଦେଖି ସାରିଛନ୍ତି। ପ୍ରାୟ ଦେଢ ଲକ୍ଷ ଲୋକ ଏହାକୁ ଲାଇକ୍ କରିଥିବା ବେଳେ ୩୪ହଜାରରୁ ଅଧିକ ଲୋକ ରିଟୁଇଟ୍ କରି ଛନ୍ତି। ଏହି ସଂଖ୍ୟା ଆହୁରି ବଢ଼ିବାରେ ଲାଗିଛି। ଭିଡିଓକୁ ଦେଖି ଲୋକେ ସୁନ୍ଦର ସୁନ୍ଦର ପ୍ରତିକ୍ରିୟା ଦେଇଛନ୍ତି। କେହି ବିଲେଇକୁ କୁକୁର ଭଳି ଦକ୍ଷ ବୋଲି ବର୍ଣ୍ଣନା କରିଥିବା ବେଳେ କେହି ଆଉକେହି ବିଲେଇକୁ ଖେଳ ପଡ଼ିଆରେ ଖେଳାଳିଙ୍କ ସହ ଭାଗ ନେବା ପାଇଁ ପରାମର୍ଶ ଦେଇଛନ୍ତି।