କେନ୍ଦ୍ରାପଡା ଅଫିସ, ୨୪।୨: କେନ୍ଦ୍ରାପଡ଼ା ଜିଲା ମାର୍ଶାଘାଇ କେନାଲ୍ ବ୍ରିଜର ଗୋସେଇଁବନ୍ଧ ଗ୍ରାମ ନିକଟରେ ନିର୍ମାଣାଧୀନ ହରିଦାସପୁର-ପାରାଦୀପ ରେଳପଥ ଧସିବା ପ୍ରଭାବରେ କ୍ଷତିଗ୍ରସ୍ତ ୫ ପରିବାରଙ୍କୁ ରାଜ୍ୟସରକାର ସ୍ବତନ୍ତ୍ର କ୍ଷତିପୂରଣ ପ୍ରଦାନ କରିବାକୁ ବରିଷ୍ଠ ଭାଜପା ନେତା ବିଜୟ ମହାପାତ୍ର ଶନିବାର ଦାବି ଉପସ୍ଥାପନ କରିଛନ୍ତି। ଏ ସମ୍ପର୍କରେ ମହାପାତ୍ର କହିଛନ୍ତି ଯେ, ରେଳ ଲାଇନ୍ ଧସିବା ଘଟଣା ନେଇ ତଦନ୍ତ ହେବା ଆବଶ୍ୟକ। ଏଠାରେ ପ୍ରାୟ ୫ ମିଟର ମାଟି ତଳକୁ ଧସିଯାଇଥିବା ବେଳେ ପ୍ରାୟ ୨୦୦ ମିଟର ପର୍ଯ୍ୟନ୍ତ ରାସ୍ତା ଫାଟିଛି। ଏଥିସହିତ ୫୦ମିଟର ମଧ୍ୟରେ ଥିବା ଦୁମୁକା ପଞ୍ଚାୟତ ଗୋସେଇଁବନ୍ଧ ଗ୍ରାମର ରବୀନ୍ଦ୍ରନାଥ ଦାସ, ଅରୁଣ କୁମାର ଦାସ, ଅଶୋକ କୁମାର ନାୟକ, ବିଜୟ କୁମାର ସ୍ବାଇଁ ଓ ଜିତେନ୍ଦ୍ର ନାୟକଙ୍କ ଘରକୁ କ୍ଷତି ପହଞ୍ଚତ୍ଛି। ଏହି ଘଟଣାରେ ରବୀନ୍ଦ୍ରନାଥ ଓ ଅରୁଣଙ୍କ ଘର ଭାଙ୍ଗି ଯାଇଥିବାରୁ ସେମାନେ ନିକଟସ୍ଥ ସ୍କୁଲ ଘରେ ରହୁଛନ୍ତି। ଘରଗୁଡିକ କେଉଁ ସମୟରେ ଭାଙ୍ଗିଯିବା ଭୟରେ ଆତଙ୍କିତ ଅଛନ୍ତି। ଘଟଣାକୁ ଇତିମଧ୍ୟରେ ୧୦ଦିନ ବିତି ଯାଇଥିଲେ ବି ଜିଲା ପ୍ରଶାସନିକ ଅଧିକାରୀ ଓ ଆରଭିଏନ୍ଏଲ୍ ଅଧିକାରୀ ଘଟଣାସ୍ଥଳକୁ ଅନୁଧ୍ୟାନ ପାଇଁ ନ ଆସିବା ଦୁର୍ଭାଗ୍ୟଜନକ। ଗୋସେଇଁବନ୍ଧ ଦୁର୍ଘଟଣାସ୍ଥଳକୁ ବରିଷ୍ଠ ନେତା ମହାପାତ୍ରଙ୍କ ପରିଦର୍ଶନ ସମୟରେ ଜିଲା ପରିଷଦ ସଭ୍ୟ ଗଣେଶ ଚନ୍ଦ୍ର ସାମଲ, ପୂର୍ବତନ ଜିଲା ଭାଜପା ସଭାପତି ସୁକାନ୍ତ ଦ୍ୱିବେଦୀ, ସରପଞ୍ଚ ପ୍ରତାପ ରାଉତ, ବରିଷ୍ଠ ନେତା ଶାରଦା ପ୍ରସାଦ ବେଉରା ପ୍ରମୁଖ ସାମିଲ ହୋଇଥିଲେ।
