ମାଧପୁର, ୨୯।୫(ଡି.ଏନ୍.ଏ.): ଅନୁଗୋଳ ଜିଲା ଆଠମଲ୍ଲିକ ବ୍ଲକ ଅନ୍ତର୍ଗତ ବାସୁଦେବପୁର ପଞ୍ଚାୟତ ଗୌତମପୁର ଗ୍ରାମରେ ପାନୀୟଜଳର ଘୋର ଅଭାବ ଦେଖାଦେଇଛି। ଏହି ଗ୍ରାମରେ ଗୋଟିଏ ନଳକୂପ ରହିଛି, ଯାହାର ଅବସ୍ଥା ଅତି ଶୋଚନୀୟ ହୋଇପଡ଼ିଛି। ଏହି ନଳକୂପ ଚତୁଃପାର୍ଶ୍ୱରେ ଖରାପ ପାଣି ଜମି ରହୁଛି। ସେହି ଜଳ ପୁଣି ନଳକୂପକୁ ପ୍ରବେଶ କରୁଥିବା କାରଣରୁ ଏହାର ପାଣି ଦୂଷିତ ହେଉଛି। ନଳକୂପର କୌଣସି ମରାମତି ତଥା ପରିଷ୍କାର କରାଯାଉ ନ ଥିବାରୁ ପାଇପଗୁଡିକରେ କଳଙ୍କି ଲାଗିଯାଇଛି। ଫଳରେ ଏହି ଲୁହାଗୁଣ୍ଡ ପାଣିରେ ବାହାରୁଛି। ନାଲି ମାଟି ବା ପଙ୍କ ମିଶ୍ରିତ ଜଳ ଏବଂ ଜଳରୁ କେଞ୍ଚୁଆ ଭଳି ଜୀବ ମଧ୍ୟ ବାହାରୁଛି। ତେଣୁ ଲୋକେ ଏହି ପାଣି ପିଇବାପାଇଁ ଭୟ କରୁଛନ୍ତି। ଗୋଟିଏ ମାତ୍ର ନଳକୂପ ପୁଣି ଦୂଷିତ ଜଳ ତେଣୁ ଗ୍ରାମବାସୀ ଗାଁର ଅନ୍ୟ ଏକ କୂଅରୁ ପାଣି ଆଣି ବ୍ୟବହାର କରୁଥିବାରୁ ବିଭିନ୍ନ ପ୍ରକାର ରୋଗରେ ପୀଡିତ ହେଉଛନ୍ତି। ଭୀଷଣ ଖରାରେ ଲୋକେ ପାଣି ପାଇଁ ଡହକବିକଳ ହେଉଛନ୍ତି। ତେଣୁ ଗ୍ରାମବାସୀଙ୍କ ତରଫରୁ ଆଉ ଏକ ନଳକୂପ ପାଇଁ ଦାବି ହେଉଛି।
