ଢେଙ୍କାନାଳ ଅଫିସ,୧୭।୭: ଢେଙ୍କାନାଳ ଜିଲାର ବିଭିନ୍ନ ଥାନା, ଫାଣ୍ଡିରେ କାର୍ଯ୍ୟରତ ଗ୍ରାମରକ୍ଷୀମାନଙ୍କୁ ୪ ମାସ ହେଲା ଦରମା ମିଳିନାହିଁ। ଆର୍ଥିକ ଅନଟନ ମଧ୍ୟରେ ସେମାନେ ଦୁର୍ଦ୍ଦିନରେ କାଳାତିପାତ କରୁଛନ୍ତି। ବକେୟା ପରିଶ୍ରମିକ ତୁରନ୍ତ ଦେବାକୁ ବୁଧବାର ଗ୍ରାମରକ୍ଷୀ ସଂଘର କର୍ମକର୍ତ୍ତାମାନେ ଏସ୍ପିଙ୍କୁ ଦ୍ୱାରସ୍ଥ ହୋଇଥିେଲେ। ଅଭିଯୋଗ ଅନୁଯାୟୀ, ଗ୍ରାମରକ୍ଷୀମାନେ ବର୍ଷତମାମ ଆଇନଶୃଙ୍ଖଳା ରକ୍ଷାରେ ନିୟୋଜିତ ହେଉଛନ୍ତି। ସେମାନଙ୍କୁ ମିଳୁଥିବା ଦରମା ହିଁ ପରିବାର ପ୍ରତିପୋଷଣର ଏକମାତ୍ର ମାଧ୍ୟମ। ହେଲେ ନିୟମିତ ଦରମା ପ୍ରଦାନ କରାଯାଉ ନ ଥିବାରୁ ସେମାନେ ନାହିଁ ନ ଥିବା ହୀନସ୍ତା ହେଉଛନ୍ତି। ତେଣୁ ତୁରନ୍ତ ବକେୟା ଟଙ୍କା ପ୍ରଦାନ କରିବାକୁ ସଂଘର କର୍ମକର୍ତ୍ତାମାନେ ଏସ୍ପି୍ଙ୍କୁ ଲିଖିତ ଭାବେ ଜଣାଇଛନ୍ତି। ଦାବିପତ୍ର ପ୍ରଦାନ ବେଳେ ଭାଗୀରଥି ପାତ୍ର, ମନୋଜ ମଳିକ, ଅଜୟ ମଳିକ, ରବୀନ୍ଦ୍ର ମଳିକ, ସୁଦର୍ଶନ ମଳିକ, ରମେଶ ନାଏକ, ଦିବାକର ନାଏକ ପ୍ରମୁଖ ଉପସ୍ଥିତ ଥିଲେ।