ବନ୍ତ, ୪।୧୦ (ଡି.ଏନ.ଏ.) – ଭଦ୍ରକ ଜିଲା ବନ୍ତସ୍ଥିତ ବାଲେଶ୍ୱର-ଭଦ୍ରକ କେନ୍ଦ୍ର ସମବାୟ ବ୍ୟାଙ୍କ ଶାଖାରୁ ଜଣେ ଗ୍ରାହକଙ୍କର ୬୬ ହଜାର ୮୧୩ ଟଙ୍କା ଉଭାନ ହେବା ଘଟଣା ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ଉକ୍ତ ଗ୍ରାହକ ହେଲେ ଟିଲୋ ଦେବତାଗଢିଆ ଗ୍ରାମର କ୍ଷେତ୍ରବାସୀ ରଣା। ସେ ଏ ନେଇ ବ୍ୟାଙ୍କ ଶାଖା ପରିଚାଳକଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ବିଧିବଦ୍ଧ ତଦନ୍ତ କରାଯାଇ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ତାଙ୍କ ଜମାଖାତାରୁ ଗାଏବ ହୋଇଥିବା ଟଙ୍କା ଫେରସ୍ତ ପାଇଁ ସେ ଦାବି କରିଛନ୍ତି।
କ୍ଷେତ୍ରବାସୀ ଅଭିଯୋଗ କରିଛନ୍ତି ଯେ, ତାଙ୍କର ଉକ୍ତ ବ୍ୟାଙ୍କ ଜମାଖାତାରେ ୬୬ ହଜାର ୮୧୩ ଟଙ୍କା ଥିଲା। ସେ ଡାକ୍ତରୀ ଚିକିତ୍ସା ପାଇଁ ଗୁରୁବାର ସମ୍ପୃକ୍ତ ବ୍ୟାଙ୍କକୁ ଯାଇ ଟଙ୍କା ଉଠାଇବାକୁ ଆବେଦନ କରିଥିଲେ। ବ୍ୟାଙ୍କର ଶାଖା କର୍ମଚାରୀ ତାଙ୍କ ଜମାଖାତା ଦେଖି ଆକାଉଣ୍ଟରୁ ସବୁ ଟଙ୍କା ଏଟିଏମ୍ କାର୍ଡ ସହାୟତାରେ ଉଠାଇ ନିଆଯାଇଥିବା କହିଥିଲେ। କ୍ଷେତ୍ରବାସୀ କୌଣସ ଏଟିଏମ୍ କାର୍ଡ ପାଇ ନ ଥିବାବେଳେ କିପରି ତାଙ୍କ ଜମାଖାତାରୁ ଏଟିଏମ୍ ସହାୟତାରେ ଟଙ୍କା ଉଠାଣ ହେଲା ତାହା ତାଙ୍କୁ ଆଶ୍ଚର୍ଯ୍ୟ କରିଥିଲା। ପୂର୍ବରୁ ସମ୍ପୃକ୍ତ ବ୍ୟାଙ୍କରେ ବହୁ ଗ୍ରାହକଙ୍କ ନିକଟକୁ ଡାକ ଯୋଗେ ଏଟିଏମ୍ କାର୍ଡ ପଠାଯାଉଥିବାବେଳେ ସେ କୌଣସି ଏଟିଏମ୍ କାର୍ଡ ପାଇ ନ ଥିବା କହିଛନ୍ତି। ଉକ୍ତ ବ୍ୟାଙ୍କରୁ ତାଙ୍କ ନାମରେ ଏଟିଏମ୍ ଯାଇଛି କି ନାହିଁ, ଯଦି ଯାଇଛି ତେବେ କିଏ ନେଇଛନ୍ତି ନା ବ୍ୟାଙ୍କ ଶାଖାର କୌଣସି କର୍ମଚାରୀ ଏଭଳି କରିଛନ୍ତି ତଦନ୍ତ କଲେ ସତ୍ୟାସତ୍ୟ ଜଣାପଡ଼ିବ ବୋଲି ସେ ଦାବି କରିଛନ୍ତି। ଏ ସମ୍ପର୍କରେ ବ୍ୟାଙ୍କ ଶାଖା ପରିଚାଳକ ରାମନାରାୟଣ ମହାନ୍ତିଙ୍କୁ ପଚାରିବାରୁ ଘଟଣାର ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି।