ବଲାଙ୍ଗୀର ଅଫିସ, ୨୧ା୪- ବଲାଙ୍ଗୀର ଜିଲା ଗ୍ରୀନ୍ ଜୋନ୍ରେ ରହିଛି । ଏଭଳି କ୍ଷେତ୍ରରେ ଏପ୍ରିଲ ୨୦ ତାରିଖ ପରେ ଗ୍ରୀନ୍ ଜୋନ୍ ଜିଲାଗୁଡିକରେ ଲକ୍ଡାଉନ୍ କୋହଳ କରାଯିବ ବୋଲି ଆଲୋଚନା ହେଉଥିଲା। ପୂର୍ବରୁ ମେଡିକାଲ ଷ୍ଟୋର, ଗ୍ରୋସରୀ ଦୋକାନ, ଡେଲିମାର୍କେଟ, ଓମ୍ଫେଡ ଦୋକାନ, ଫଳ ଦୋକାନ ଖୋଲା ରହିଥିଲା । ମଙ୍ଗଳବାରଠାରୁ ସହରରେ ବହି ଦୋକାନ, ଗାଡିମଟର ପଞ୍ଚର ସେଣ୍ଟର, ଲୁହାଦୋକାନ୍, ବିଦ୍ୟୁତ୍ ସାମଗ୍ରୀ ଦୋକାନ, ଏସି, କୁଲର ଦୋକାନ, ମୋବାଇଲ ସେଣ୍ଟର ସହ ଅନ୍ୟ କେତେକ ଦୋକାନ ଖୋଲିଛି । କିଛି ଦୋକାନ ଖୋଲିବା ପରେ ହଠାତ୍ ସକାଳୁ ସହରରେ ଭିଡ ପରିଲକ୍ଷିତ ହୋଇଥିଲା । ବିଭିନ୍ନ ରାସ୍ତାରେ ଲୋକେ ଯାନବାହନ ଧରି ବୁଲାବୁଲି କରୁଥିବା ଦେଖାଯାଇଥିଲା ା ପୋଲିସ ପକ୍ଷରୁ ଚେକିଂ କରାଯାଉ ନ ଥିବା ଜାଣିବା ପରେ ପୂର୍ବାହ୍ନ ୯ରୁ ୧୦ଟା ମଧ୍ୟରେ ସହରରେ ଭିଡ ବଢ଼ି ଯାଇଥିଲା । ଡେଲିମାର୍କେଟରେ ବାଇକ ଓ ଲୋକଙ୍କ ଭିଡ ପରିଲକ୍ଷିତ ହୋଇଥିଲା । ସବୁଠୁ ସାମାଜିକ ଦୂରତ୍ୱ ଉଲ୍ଲଂଘନ ହୋଇଥିତ୍ବା ଦେଖାଯାଇଥିଲା । ଦୋକାନରେ ସାମାଜିକ ଦୂରତ୍ୱ ଅବଲମ୍ବନ ପାଇଁ ମାର୍କିଂ କରାଯାଇଥିଲେ ମଧ୍ୟ ଲୋକେ ସେସବୁ ମାନି ନ ଥିବା ଦେଖାଯାଇଥିଲା। ଗୋଟିଏ ଦିନରେ ସହର ଅର୍ଦ୍ଧେକ ଚଳଚଞ୍ଚଳ ହୋଇପଡିଥିବାରୁ ଦୀର୍ଘ ପ୍ରାୟ ୧ ମାସର ଲକ୍ଡାଉନ୍ ନିଷ୍ପଳ ହୋଇଯିବାର ଆଶଙ୍କା ବୃଦ୍ଧି ପାଇଲାଣି । ଜିଲା ପ୍ରଶାସନ ଏଦିଗରେ ଧ୍ୟାନ ନ ଦେଲେ କରୋନା ଗୋଷ୍ଠୀ ସଂକ୍ରମଣ ଭୟ ବୃଦ୍ଧି ପାଇବା ଆଶଙ୍କା ଲାଗି ରହିଛି ।