ଚାନ୍ଦବାଲି,୧୭।୨(ଡି.ଏନ୍.ଏ.): ଭଦ୍ରକ ଜିଲା ଚାନ୍ଦବାଲି ବ୍ଲକ ଚଡ଼ଦିଆ ଗ୍ରାମରେ ଏକ ରନ୍ଧନ ଗ୍ୟାସ୍ ଟାଙ୍କି ଲିକ୍ ହୋଇ ଜଣେ ମହିଳାଙ୍କ ଜୀବନ ଯାଇଥିବା ବେଳେ ପଡ଼ୋଶୀଙ୍କ ଘର ସମେତ ୬ ବଖରା ଜଳିଯାଇଛି। ଖବର ପାଇ ଚାନ୍ଦବାଲି ତହସିଲଦାର ଘଟଣାସ୍ଥଳରେ ପହଞ୍ଚି କ୍ଷୟକ୍ଷତିର ଆକଳନ କରିବା ସହିତ ଅଗ୍ନିବିପନ୍ନଙ୍କୁ ସହାୟତା ପ୍ରଦାନ କରିଛନ୍ତି। ବାଂଶଡ଼ା ଥାନା ପକ୍ଷରୁ ଘଟଣାର ତଦନ୍ତ ଆରମ୍ଭ ହୋଇଛି।
ସୂଚନାଯୋଗ୍ୟ, ସୋମବାର ସକାଳେ ଚଡ଼ଦିଆର ତୁଷାରକାନ୍ତ ମହାଳିକଙ୍କ ସ୍ତ୍ରୀ ପୂର୍ଣ୍ଣିମା ଗ୍ୟାସରେ ରୋଷେଇ କରିବାକୁ ଲାଇଟର ଲଗାଇବା ମାତ୍ରେ ଗ୍ୟାସ୍ ଲିକ୍ ଯୋଗୁ ହଠାତ୍ ତାଙ୍କ ଚାଳଘରେ ନିଆଁ ଲାଗିଯାଇଥିଲା। ନିଆଁର ପ୍ରକୋପ ଅଧିକ ଯୋଗୁ ପୂର୍ଣ୍ଣିମା ଘରୁ ବାହାରି ନ ପାରି ଜଳିଯାଇଥିଲେ। ଏହି ନିଆଁ ପଡ଼ୋଶୀ ଦୁର୍ଯ୍ୟୋଧନ ମହାଳିକ, ସୁରେନ୍ଦ୍ର ମହାଳିକ ଓ ଶରତ ମହାଳିକଙ୍କର ଘରକୁ ବ୍ୟାପି ଯାଇଥିଲା। ଗ୍ରାମବାସୀ ନିଆଁ ଲିଭାଇବାକୁ ଚେଷ୍ଟା କରିବା ସହିତ ଅଗ୍ନିଶମ ବିଭାଗକୁ ଖବର ଦେଇଥିଲେ। ମାତ୍ର ଅଗ୍ନିଶମ କର୍ମଚାରୀମାନେ ଘଟଣାସ୍ଥଳରେ ପହଞ୍ଚିବା ବେଳକୁ ୬ ବଖରା ପୋଡ଼ି ପାଉଁଶ ହୋଇଯାଇଛି।