ସାକ୍ଷୀଗୋପାଳ,୧୯ା୪(ଡି.ଏନ୍.ଏ.) : ପୁରୀ ଜିଲା ସତ୍ୟବାଦୀ ବ୍ଲକ ସାଣ୍ଢରା ପଞ୍ଚାୟତ ସାମନ୍ତରାପୁରରେ ରବିବାର ଗ୍ୟାସ ସିଲିଣ୍ଡର ଲିକ୍ରୁ ଅଗ୍ନିକାଣ୍ଡ ଘଟି ୫ବଖରା ସହ ଆସବାବପତ୍ର ପୋଡ଼ି ଯାଇଛି। ଦିନବନ୍ଧୁ ସାହୁଙ୍କ ସ୍ତ୍ରୀ ରୋଷେଇ ଘରେ ଗ୍ୟାସ୍ ଲଗାଇବା ସମୟରେ ହଠାତ ନିଆଁ ଲାଗିଯିବାରୁ ସେ ଘରୁ ବାହାରି ଆସିଥିଲେ। ଘରକୁ ଘର ନିଆଁ ବ୍ୟାପିଯାଇ ନଗେନ କୁମାର ସାହୁ ଓ ଗନ୍ଧର୍ବ ସାହୁଙ୍କ ଘର ଜଳିଯାଇଛି। ଖବରପାଇ ସାକ୍ଷୀଗୋପାଳ ଅଗ୍ନିଶମ କେନ୍ଦ୍ର ଅଧିକାରୀ ମନୋଜ କୁମାର ପାତ୍ର କର୍ମଚାରୀମାନଙ୍କ ସହ ପହଞ୍ଚି ନିଆଁକୁ ଆୟତ୍ତ କରିଥିଲେ। ସତ୍ୟବାଦୀ ଅତିରିକ୍ତ ତହସିଲଦାର ମୌସୁମୀ ମିଶ୍ର ରାଜସ୍ବ ନିରୀକ୍ଷକଙ୍କୁ ନେଇ କ୍ଷୟକ୍ଷତି ଆକଳନ କରିଛନ୍ତି। ସରପଞ୍ଚ ପ୍ରଦୀପ ନାୟକ ବିପନ୍ନ ପରିବାରଙ୍କୁ ଶୁଖିଲା ଖାଦ୍ୟ ଓ ପଲିଥିନ ପ୍ରଦାନ କରିଛନ୍ତି।
