ଘଟଗାଁ, ୧ା୧: ଇଂରାଜୀ ନବବର୍ଷ ଲାଗି ପ୍ର ବୁଧବାର ଦିନ ଘଟଗାଁ ମା’ ତାରିଣୀ ପୀଠରେ ଦର୍ଶନ ପାଇଁ ୨ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଥିବା ଜଣାଯାଇଛି। ଏଥିସହିତ ସେମାନେ ମା’ ତାରିଣୀଙ୍କ ସୁନାବେଶ ଦର୍ଶନ କରିଥିଲେ। ପ୍ରତ୍ୟୁଷରୁ ମା’ଙ୍କ ମାଜଣା, ମଙ୍ଗଳ ଆରତୀ ସହିତ ବଡ଼ ସିଂହାରବେଶ ହେବା ପରେ ସ୍ବର୍ଣ୍ଣ ଅଳଙ୍କାର ପରିଧାନ କରାଯାଇଥିଲା। ମନ୍ଦିର ମୁଖ୍ୟ ଫାଟକ ସକାଳ ୬ଟାରେ ଖୋଲାଯାଇ ଦର୍ଶନ ପାଇଁ ଭିଡ଼ ଲାଗି ଯାଇଥିଲା। ତେବେ ଭକ୍ତମାନେ ୮ଟି ଭୋଗଲଗା ଧାଡ଼ିରେ ନଡ଼ିଆ, ଧୂପ ସିନ୍ଦୂର ଫୁଲ ନେଇ ଯାଇଥିବାବେଳେ ସାଧାରଣ ଦର୍ଶନ ପାଇଁ ୨ ଗୋଟି ଧାଡ଼ି ବ୍ୟବସ୍ଥା କରାଯାଇଥିଲା। ଦିନ ୧୦ଟାରୁ ଭକ୍ତଙ୍କ ସମାଗମ ବୃଦ୍ଧି ପାଇଥିଲା। ଯାହାଫଳରେ ଦିନବେଳା ମା’ଙ୍କର ପହଡ଼ ପଡ଼ି ନ ଥିଲା। ତେଣୁ ଦିନ ତମାମ ମା’ ଭକ୍ତଙ୍କୁ ଦର୍ଶନ ଦେଇଥିଲେ। ମନ୍ଦିର ପୂଜକ ଶ୍ୟାମସୁନ୍ଦର ଦେହୁରୀ, ସଦାନନ୍ଦ ଦେହୁରୀ, ପର୍ଶୁରାମ ଦେହୁରୀ, ଯଯାତି ଦେହୁରୀ ରାଜକିଶୋର ଦେହୁରୀ ପ୍ରମୁଖ ୩୦ରୁ ଊର୍ଦ୍ଧ୍ୱ ପୂଜକ ମନ୍ଦିର ପରିସରରେ ଉପସ୍ଥିତ ରହି ଭକ୍ତଙ୍କ ଭୋଗ ନୈବେଦ୍ୟ ଓ ଦର୍ଶନ କାର୍ଯ୍ୟରେ ସହଯୋଗ କରିଥିଲେ। ମନ୍ଦିର ପରିଚାଳନାବୋର୍ଡ ସଭାପତି ରାଜେନ୍ଦ୍ର ପଟ୍ଟନାୟକ, ରୁଦ୍ର ନାରାୟଣ ମହନ୍ତ, ଆନନ୍ଦ ଚନ୍ଦ୍ର ସିଂହ, ବଳଭଦ୍ର ନନ୍ଦ, ଦୟାନିଧି ମହାନ୍ତ, ନିର୍ମଳ ମହାନ୍ତି, ପୋଲିସ ଏସ୍ଡିପିଓ ରବୀନ୍ଦ୍ର ମଲ୍ଲିକ, ତହସିଲଦାର ଜନକ ନାୟକ, ଥାନାଅଧିକାରୀ ବନ୍ଦନା ପାତ୍ର, ଦୈତାରି, ହରିଚନ୍ଦନପୁର, ପାଟଣା, ଘସିପୁରା, ଆନନ୍ଦପୁର ପ୍ରଭୃତି ଥାନା ଅଧିକାରୀ ସମେତ ୪ ପ୍ଲାଟୁନ ଫୋର୍ସ, ଗାୟତ୍ରୀ ପରିବାର, ସତ୍ୟସାଇ ସେବାସଂଗଠନ ପ୍ରମୁଖ ଉପସ୍ଥିତ ରହି ଭକ୍ତଙ୍କ ଶୃଙ୍ଖଳା ଦର୍ଶନ ବ୍ୟବସ୍ଥାରେ ସହଯୋଗ କରିଥିଲେ। ତେବେ ପାର୍କିଂ ସ୍ଥଳରୁ ଶ୍ରଦ୍ଧାଳୁଙ୍କ ପାଇଁ ଟ୍ରଷ୍ଟବୋର୍ଡ ପକ୍ଷରୁ ମାଗଣା ବସସେବା ସକାଳଠାରୁ ସନ୍ଧ୍ୟା ପର୍ଯ୍ୟନ୍ତ କରାଯାଇଥିଲା। ଫଳରେ ଭକ୍ତମାନେ ବିଭିନ୍ନ ପାର୍କିଂ ସ୍ଥାନରୁ ସୁରୁଖୁରୁରେ ମା ତାରିଣୀ ମନ୍ଦିର ଯିବା ଆସିବା କରିପାରିଥିଲେ। ସେହିପରି ପ୍ରତ୍ୟେକ ବର୍ଷ ପରି ଚଳିତ ବର୍ଷ ସମସ୍ତ ଭକ୍ତଙ୍କୁ ନଡ଼ିଆ ଲଡ଼ୁ ବଣ୍ଟନ କରାଯାଇଥିଲା। ତେବେ ଭକ୍ତଙ୍କ ଗହଳି ସନ୍ଧ୍ୟା ଆରତୀ ପର୍ଯ୍ୟନ୍ତ ଲାଗି ରହିଥିଲା। ମନ୍ଦିର ପରିସରରେ ଭକ୍ତମାନଙ୍କ ଗହଳି ଓ ଟ୍ରାଫିକ୍ ସମସ୍ୟା ପାଇଁ ପୋଲିସ୍ ରାତ୍ର ପର୍ଯ୍ୟନ୍ତ ଉପସ୍ଥିତ ରହିଥିବା ଜଣାଯାଇଛି।